Read Roman Urdu Geo āmāl 23 Bible Online

āmāl 23 - Roman Urdu Geo bible

āmāl 23

¹paulus ne ġhaur se adālat-e-āliyā ke maimbarān kī taraf dekh kar kahā, “bhāiyo, āj tak maiṅ ne sāf zamīr ke sāth allāh ke sāmne zindagī guzārī hai.”

²is par imām-e-āzam hananiyāh ne paulus ke qarīb khaṛe logoṅ se kahā ki wuh us ke muṅh par thappaṛ māreṅ.

³paulus ne us se kahā, “makkār! [4] allāh tum ko hī māregā, kyūṅki tum yahāṅ baiṭhe sharīat ke mutābiq merā faislā karnā chāhte ho jabki mujhe mārne kā hukm de kar ḳhud sharīat kī ḳhilāfwarzī kar rahe ho!”

⁴paulus ke qarīb khaṛe ādmiyoṅ ne kahā, “tum allāh ke imām-e-āzam ko burā kahne kī jur'at kyūṅkar karte ho?”

⁵paulus ne jawāb diyā, “bhāiyo, mujhe mālūm na thā ki wuh imām-e-āzam haiṅ, warnā aise alfāz istemāl na kartā. kyūṅki kalām-e-muqaddas meṅ likhā hai ki apnī qaum ke hākimoṅ ko burā-bhalā mat kahnā.”

⁶paulus ko ilm thā ki adālat-e-āliyā ke kuchh log sadūqī haiṅ jabki dīgar farīsī haiṅ. is lie wuh ijlās meṅ pukār uṭhā, “bhāiyo, maiṅ farīsī balki farīsī kā beṭā bhī hūṅ. mujhe is lie adālat meṅ pesh kiyā gayā hai ki maiṅ murdoṅ meṅ se jī uṭhne kī ummīd rakhtā hūṅ.”

⁷is bāt se farīsī aur sadūqī ek dūsre se jhagaṛne lage aur ijlās ke afrād do gurohoṅ meṅ baṭ gae.

⁸wajah yih thī ki sadūqī nahīṅ mānte ki ham jī uṭheṅge. wuh farishtoṅ aur rūhoṅ kā bhī inkār karte haiṅ. is ke muqābale meṅ farīsī yih sab kuchh mānte haiṅ.

⁹hote hote baṛā shor mach gayā. farīsī firqe ke kuchh ālim khaṛe ho kar josh se bahs karne lage, “hameṅ is ādmī meṅ koī ġhaltī nazar nahīṅ ātī, shāyad koī rūh yā farishtā is se hamkalām huā ho.”

¹⁰jhagaṛe ne itnā zor pakaṛā ki kamānḍar ḍar gayā, kyūṅki ḳhatrā thā ki wuh paulus ke ṭukṛe kar ḍāleṅ. is lie us ne apne faujiyoṅ ko hukm diyā ki wuh utreṅ aur paulus ko yahūdiyoṅ ke bīch meṅ se chhīn kar qile meṅ wāpas lāeṅ.

¹¹usī rāt ḳhudāwand paulus ke pās ā khaṛā huā aur kahā, “hauslā rakh, kyūṅki jis tarah tū ne yarūshalam meṅ mere bāre meṅ gawāhī dī hai lāzim hai ki isī tarah rom shahr meṅ bhī gawāhī de.”

¹²agle din kuchh yahūdiyoṅ ne sāzish karke qasam khāī, “ham na to kuchh khāeṅge, na pieṅge jab tak paulus ko qatl na kar leṅ.”

¹³chālīs se zyādā mardoṅ ne is sāzish meṅ hissā liyā.

¹⁴wuh rāhnumā imāmoṅ aur buzurgoṅ ke pās gae aur kahā, “ham ne pakkī qasam khāī hai ki kuchh nahīṅ khāeṅge jab tak paulus ko qatl na kar leṅ.

¹⁵ab zarā yahūdī adālat-e-āliyā ke sāth mil kar kamānḍar se guzārish kareṅ ki wuh use dubārā āp ke pās lāeṅ. bahānā yih pesh kareṅ ki āp mazīd tafsīl se us ke muāmale kā jāizā lenā chāhte haiṅ. jab use lāyā jāegā to ham us ke yahāṅ pahuṅchne se pahle pahle use mār ḍālne ke lie tayyār hoṅge.”

¹⁶lekin paulus ke bhānje ko is bāt kā patā chal gayā. us ne qile meṅ jā kar paulus ko ittilā dī.

¹⁷is par paulus ne romī afsaroṅ [5] meṅ se ek ko bulā kar kahā, “is jawān ko kamānḍar ke pās le jāeṅ. is ke pās un ke lie ḳhabar hai.”

¹⁸afsar bhānje ko kamānḍar ke pās le gayā aur kahā, “qaidī paulus ne mujhe bulā kar mujh se guzārish kī ki is naujawān ko āp ke pās le āūṅ. us ke pās āp ke lie ḳhabar hai.”

¹⁹kamānḍar naujawān kā hāth pakaṛ kar dūsroṅ se alag ho gayā. phir us ne pūchhā, “kyā ḳhabar hai jo āp mujhe batānā chāhte haiṅ?”

²⁰us ne jawāb diyā, “yahūdī āp se darḳhwāst karne par muttafiq ho gae haiṅ ki āp kal paulus ko dubārā yahūdī adālat-e-āliyā ke sāmne lāeṅ. bahānā yih hogā ki wuh aur zyādā tafsīl se us ke bāre meṅ mālūmāt hāsil karnā chāhte haiṅ.

²¹lekin un kī bāt na māneṅ, kyūṅki un meṅ se chālīs se zyādā ādmī us kī tāk meṅ baiṭhe haiṅ. unhoṅ ne qasam khāī hai ki ham na kuchh khāeṅge na pieṅge jab tak use qatl na kar leṅ. wuh abhī tayyār baiṭhe haiṅ aur sirf is intizār meṅ haiṅ ki āp un kī bāt māneṅ.”

²²kamānḍar ne naujawān ko ruḳhsat karke kahā, “jo kuchh āp ne mujhe batā diyā hai us kā kisī se zikr na karnā.”

²³phir kamānḍar ne apne afsaroṅ meṅ se do ko bulāyā jo sau sau faujiyoṅ par muqarrar the. us ne hukm diyā, “do sau faujī, sattar ghuṛsawār aur do sau nezābāz tayyār kareṅ. unheṅ āj rāt ko nau baje qaisariyā jānā hai.

²⁴paulus ke lie bhī ghoṛe tayyār rakhnā tāki wuh sahīh-salāmat gawarnar ke pās pahuṅche.”

²⁵phir us ne yih ḳhat likhā,

²⁶“az: klaudiyus lūsiyās muazzaz gawarnar feliks ko salām.

²⁷yahūdī is ādmī ko pakaṛ kar qatl karne ko the. mujhe patā chalā ki yih romī shahrī hai, is lie maiṅ ne apne dastoṅ ke sāth ā kar ise nikāl kar bachā liyā.

²⁸maiṅ mālūm karnā chāhtā thā ki wuh kyūṅ is par ilzām lagā rahe haiṅ, is lie maiṅ utar kar ise un kī adālat-e-āliyā ke sāmne lāyā.

²⁹mujhe mālūm huā ki un kā ilzām un kī sharīat se tālluq rakhtā hai. lekin is ne aisā kuchh nahīṅ kiyā jis kī binā par yih jel meṅ ḍālne yā sazā-e-maut ke lāiq ho.

³⁰phir mujhe ittilā dī gaī ki is ādmī ko qatl karne kī sāzish kī gaī hai, is lie maiṅ ne ise fauran āp ke pās bhej diyā. maiṅ ne ilzām lagāne wāloṅ ko bhī hukm diyā ki wuh is par apnā ilzām āp ko hī pesh kareṅ.”

³¹faujiyoṅ ne usī rāt kamānḍar kā hukm pūrā kiyā. paulus ko sāth le kar wuh antīpatris tak pahuṅch gae.

³²agle din piyāde qile ko wāpas chale jabki ghuṛsawāroṅ ne paulus ko le kar safar jārī rakhā.

³³qaisariyā pahuṅch kar unhoṅ ne paulus ko ḳhat samet gawarnar feliks ke sāmne pesh kiyā.

³⁴us ne ḳhat paṛh liyā aur phir paulus se pūchhā, “āp kis sūbe ke haiṅ?” paulus ne kahā, “kilikiyā kā.”

³⁵is par gawarnar ne kahā, “maiṅ āp kī samā'at us waqt karūṅga jab āp par ilzām lagāne wāle pahuṅcheṅge.” aur us ne hukm diyā ki herodes ke mahal meṅ paulus kī pahrādārī kī jāe.