Read Roman Urdu Geo āmāl 25 Bible Online

āmāl 25 - Roman Urdu Geo bible

āmāl 25

¹qaisariyā pahuṅchne ke tīn din bād festus yarūshalam chalā gayā.

²wahāṅ rāhnumā imāmoṅ aur bāqī yahūdī rāhnumāoṅ ne us ke sāmne paulus par apne ilzāmāt pesh kie. unhoṅ ne baṛe zor se

³minnat kī ki wuh un kī riāyat karke paulus ko yarūshalam muntaqil kare. wajah yih thī ki wuh ghāt meṅ baiṭh kar rāste meṅ paulus ko qatl karnā chāhte the.

⁴lekin festus ne jawāb diyā, “paulus ko qaisariyā meṅ rakhā gayā hai aur maiṅ ḳhud wahāṅ jāne ko hūṅ.

⁵agar us se koī jurm sarzad huā hai to āp ke kuchh rāhnumā mere sāth wahāṅ jā kar us par ilzām lagāeṅ.”

⁶festus ne mazīd āṭh das din un ke sāth guzāre, phir qaisariyā chalā gayā. agle din wuh adālat karne ke lie baiṭhā aur paulus ko lāne kā hukm diyā.

⁷jab paulus pahuṅchā to yarūshalam se āe hue yahūdī us ke irdgird khaṛe hue aur us par kaī sanjīdā ilzāmāt lagāe, lekin wuh koī bhī bāt sābit na kar sake.

⁸paulus ne apnā difā karke kahā, “mujh se na yahūdī sharīat, na bait-ul-muqaddas aur na shahanshāh ke ḳhilāf jurm sarzad huā hai.”

⁹lekin festus yahūdiyoṅ ke sāth riāyat baratnā chāhtā thā, is lie us ne pūchhā, “kyā āp yarūshalam jā kar wahāṅ kī adālat meṅ mere sāmne pesh kie jāne ke lie tayyār haiṅ?”

¹⁰paulus ne jawāb diyā, “maiṅ shahanshāh kī romī adālat meṅ khaṛā hūṅ aur lāzim hai ki yihīṅ merā faislā kiyā jāe. āp bhī is se ḳhūb wāqif haiṅ ki maiṅ ne yahūdiyoṅ se koī nāinsāfī nahīṅ kī.

¹¹agar mujh se koī aisā kām sarzad huā ho jo sazā-e-maut ke lāiq ho to maiṅ marne se inkār nahīṅ karūṅga. lekin agar bequsūr hūṅ to kisī ko bhī mujhe in ādmiyoṅ ke hawāle karne kā haq nahīṅ hai. maiṅ shahanshāh se apīl kartā hūṅ!”

¹²yih sun kar festus ne apnī kaunsal se mashwarā karke kahā, “āp ne shahanshāh se apīl kī hai, is lie āp shahanshāh hī ke pās jāeṅge.”

¹³kuchh din guzar gae to agrippā bādshāh apnī bahan birnīke ke sāth festus se milne āyā.

¹⁴wuh kaī din wahāṅ ṭhahre rahe. itne meṅ festus ne paulus ke muāmale par bādshāh ke sāth bāt kī. us ne kahā, “yahāṅ ek qaidī hai jise feliks chhoṛ kar chalā gayā hai.

¹⁵jab maiṅ yarūshalam gayā to rāhnumā imāmoṅ aur yahūdī buzurgoṅ ne us par ilzāmāt lagā kar use mujrim qarār dene kā taqāzā kiyā.

¹⁶maiṅ ne unheṅ jawāb diyā, ‘romī qānūn kisī ko adālat meṅ pesh kie baġhair mujrim qarār nahīṅ detā. lāzim hai ki use pahle ilzām lagāne wāloṅ kā sāmnā karne kā mauqā diyā jāe tāki apnā difā kar sake.’

¹⁷jab us par ilzām lagāne wāle yahāṅ pahuṅche to maiṅ ne tāḳhīr na kī. maiṅ ne agle hī din adālat mun'aqid karke paulus ko pesh karne kā hukm diyā.

¹⁸lekin jab us ke muḳhālif ilzām lagāne ke lie khaṛe hue to wuh aise jurm nahīṅ the jin kī tawaqqo maiṅ kar rahā thā.

¹⁹un kā us ke sāth koī aur jhagaṛā thā jo un ke apne mazhab aur ek murdā ādmī banām īsā se tālluq rakhtā hai. is īsā ke bāre meṅ paulus dāwā kartā hai ki wuh zindā hai.

²⁰maiṅ uljhan meṅ paṛ gayā kyūṅki mujhe mālūm nahīṅ thā ki kis tarah is muāmale kā sahīh jāizā lūṅ. chunāṅche maiṅ ne pūchhā, ‘kyā āp yarūshalam jā kar wahāṅ adālat meṅ pesh kie jāne ke lie tayyār haiṅ?’

²¹lekin paulus ne apīl kī, ‘shahanshāh hī merā faislā kare.’ phir maiṅ ne hukm diyā ki use us waqt tak qaid meṅ rakhā jāe jab tak use shahanshāh ke pās bhejne kā intizām na karwā sakūṅ.”

²²agrippā ne festus se kahā, “maiṅ bhī us shaḳhs ko sunanā chāhtā hūṅ.” us ne jawāb diyā, “kal hī āp us ko sun leṅge.”

²³agle din agrippā aur birnīke baṛī dhūmdhām ke sāth āe aur baṛe faujī afsaroṅ aur shahr ke nāmwar ādmiyoṅ ke sāth dīwān-e-ām meṅ dāḳhil hue. festus ke hukm par paulus ko andar lāyā gayā.

²⁴festus ne kahā, “agrippā bādshāh aur tamām ḳhawātīn-o-hazarāt! āp yahāṅ ek ādmī ko deḳhte haiṅ jis ke bāre meṅ tamām yahūdī ḳhwāh wuh yarūshalam ke rahne wāle hoṅ, ḳhwāh yahāṅ ke, shor machā kar sazā-e-maut kā taqāzā kar rahe haiṅ.

²⁵merī dānist meṅ to is ne koī aisā kām nahīṅ kiyā jo sazā-e-maut ke lāiq ho. lekin is ne shahanshāh se apīl kī hai, is lie maiṅ ne ise rom bhejne kā faislā kiyā hai.

²⁶lekin maiṅ shahanshāh ko kyā likh dūṅ? kyūṅki is par koī sāf ilzām nahīṅ lagāyā gayā. is lie maiṅ ise āp sab ke sāmne lāyā hūṅ, ḳhāskar agrippā bādshāh āp ke sāmne, tāki āp is kī taftīsh kareṅ aur maiṅ kuchh likh sakūṅ.

²⁷kyūṅki mujhe betukī sī bāt lag rahī hai ki ham ek qaidī ko rom bhejeṅ jis par ab tak sāf ilzāmāt nahīṅ lagāe gae haiṅ.”