Read Roman Urdu Geo āmāl 26 Bible Online

āmāl 26 - Roman Urdu Geo bible

āmāl 26

¹agrippā ne paulus se kahā, “āp ko apne difā meṅ bolne kī ijāzat hai.” paulus ne hāth se ishārā karke apne difā meṅ bolne kā āġhāz kiyā,

²“agrippā bādshāh, maiṅ apne āp ko ḳhushnasīb samajhtā hūṅ ki āj āp hī merā yih difāī bayān sun rahe haiṅ jo mujhe yahūdiyoṅ ke tamām ilzāmāt ke jawāb meṅ denā paṛ rahā hai.

³ḳhāskar is lie ki āp yahūdiyoṅ ke rasm-o-riwāj aur tanāzoṅ se wāqif haiṅ. merī arz hai ki āp sabar se merī bāt suneṅ.

⁴tamām yahūdī jānte haiṅ ki maiṅ ne jawānī se le kar ab tak apnī qaum balki yarūshalam meṅ kis tarah zindagī guzārī.

⁵wuh mujhe baṛī der se jānte haiṅ aur agar chāheṅ to is kī gawāhī bhī de sakte haiṅ ki maiṅ farīsī kī zindagī guzārtā thā, hamāre mazhab ke usī firqe kī jo sab se kaṭar hai.

⁶aur āj merī adālat is wajah se kī jā rahī hai ki maiṅ us wāde par ummīd rakhtā hūṅ jo allāh ne hamāre bāpdādā se kiyā.

⁷haqīqat meṅ yih wuhī ummīd hai jis kī wajah se hamāre bārah qabīle din rāt aur baṛī lagan se allāh kī ibādat karte rahte haiṅ aur jis kī takmīl ke lie wuh taṛapte haiṅ. to bhī ai bādshāh, yih log mujh par yih ummīd rakhne kā ilzām lagā rahe haiṅ.

⁸lekin āp sab ko yih ḳhayāl kyūṅ nāqābil-e-yaqīn lagtā hai ki allāh murdoṅ ko zindā kar detā hai?

⁹pahle maiṅ bhī samajhtā thā ki har mumkin tarīqe se īsā nāsarī kī muḳhālafat karnā merā farz hai.

¹⁰aur yih maiṅ ne yarūshalam meṅ kiyā bhī. rāhnumā imāmoṅ se iḳhtiyār le kar maiṅ ne wahāṅ ke bahut se muqaddasoṅ ko jel meṅ ḍalwā diyā. aur jab kabhī unheṅ sazā-e-maut dene kā faislā karnā thā to maiṅ ne bhī is haq meṅ woṭ diyā.

¹¹maiṅ tamām ibādatḳhānoṅ meṅ gayā aur bahut dafā unheṅ sazā dilā kar īsā ke bāre meṅ kufr bakne par majbūr karne kī koshish kartā rahā. maiṅ itne taish meṅ ā gayā thā ki un kī īzārasānī kī ġharz se bairūn-e-mulk bhī gayā.

¹²ek din maiṅ rāhnumā imāmoṅ se iḳhtiyār aur ijāzatnāmā le kar damishq jā rahā thā.

¹³dopahar taqrīban bārah baje maiṅ saṛak par chal rahā thā ki ek raushnī dekhī jo sūraj se zyādā tez thī. wuh āsmān se ā kar mere aur mere hamsafaroṅ ke girdāgird chamkī.

¹⁴ham sab zamīn par gir gae aur maiṅ ne arāmī zabān meṅ ek āwāz sunī, ‘sāūl, sāūl, tū mujhe kyūṅ satātā hai? yūṅ mere āṅkus ke ḳhilāf pāoṅ mārnā tere lie hī dushwārī kā bāis hai.’

¹⁵maiṅ ne pūchhā, ‘ḳhudāwand, āp kaun haiṅ?’ ḳhudāwand ne jawāb diyā, ‘maiṅ īsā hūṅ, wuhī jise tū satātā hai.

¹⁶lekin ab uṭh kar khaṛā ho jā, kyūṅki maiṅ tujhe apnā ḳhādim aur gawāh muqarrar karne ke lie tujh par zāhir huā hūṅ. jo kuchh tū ne dekhā hai us kī tujhe gawāhī denī hai aur us kī bhī jo maiṅ āindā tujh par zāhir karūṅga.

¹⁷maiṅ tujhe terī apnī qaum se bachāe rakhūṅgā aur un ġhairyahūdī qaumoṅ se bhī jin ke pās tujhe bhejūṅgā.

¹⁸tū un kī āṅkhoṅ ko khol degā tāki wuh tārīkī aur iblīs ke iḳhtiyār se nūr aur allāh kī taraf rujū kareṅ. phir un ke gunāhoṅ ko muāf kar diyā jāegā aur wuh un ke sāth āsmānī mīrās meṅ sharīk hoṅge jo mujh par īmān lāne se muqaddas kie gae haiṅ.’

¹⁹ai agrippā bādshāh, jab maiṅ ne yih sunā to maiṅ ne is āsmānī royā kī nāfarmānī na kī

²⁰balki is bāt kī munādī kī ki log taubā karke allāh kī taraf rujū kareṅ aur apne amal se apnī tabdīlī kā izhār bhī kareṅ. maiṅ ne is kī tablīġh pahle damishq meṅ kī, phir yarūshalam aur pūre yahūdiyā meṅ aur is ke bād ġhairyahūdī qaumoṅ meṅ bhī.

²¹isī wajah se yahūdiyoṅ ne mujhe bait-ul-muqaddas meṅ pakaṛ kar qatl karne kī koshish kī.

²²lekin allāh ne āj tak merī madad kī hai, is lie maiṅ yahāṅ khaṛā ho kar chhoṭoṅ aur baṛoṅ ko apnī gawāhī de saktā hūṅ. jo kuchh maiṅ sunātā hūṅ wuh wuhī kuchh hai jo mūsā aur nabiyoṅ ne kahā hai,

²³ki masīh dukh uṭhā kar pahlā shaḳhs hogā jo murdoṅ meṅ se jī uṭhegā aur ki wuh yūṅ apnī qaum aur ġhairyahūdiyoṅ ke sāmne allāh ke nūr kā parchār karegā.”

²⁴achānak festus paulus kī bāt kāṭ kar chillā uṭhā, “paulus, hosh meṅ āo! ilm kī ziyādatī ne tumheṅ dīwānā kar diyā hai.”

²⁵paulus ne jawāb diyā, “muazzaz festus, maiṅ dīwānā nahīṅ hūṅ. merī yih bāteṅ haqīqī aur māqūl haiṅ.

²⁶bādshāh salāmat in se wāqif haiṅ, is lie maiṅ un se khul kar bāt kar saktā hūṅ. mujhe yaqīn hai ki yih sab kuchh un se chhupā nahīṅ rahā, kyūṅki yih poshīdagī meṅ yā kisī kone meṅ nahīṅ huā.

²⁷ai agrippā bādshāh, kyā āp nabiyoṅ par īmān rakhte haiṅ? balki maiṅ jāntā hūṅ ki āp un par īmān rakhte haiṅ.”

²⁸agrippā ne kahā, “āp to baṛī jaldī se mujhe qāil karke masīhī banānā chāhte haiṅ.”

²⁹paulus ne jawāb diyā, “jald yā bader maiṅ allāh se duā kartā hūṅ ki na sirf āp balki tamām hāzirīn merī mānind ban jāeṅ, siwāe merī zanjīroṅ ke.”

³⁰phir bādshāh, gawarnar, birnīke aur bāqī sab uṭh kar chale gae.

³¹wahāṅ se nikal kar wuh ek dūsre se bāt karne lage. sab is par muttafiq the ki “is ādmī ne kuchh nahīṅ kiyā jo sazā-e-maut yā qaid ke lāiq ho.”

³²aur agrippā ne festus se kahā, “agar is ne shahanshāh se apīl na kī hotī to ise rihā kiyā jā saktā thā.”