Read Roman Urdu Geo āmāl 3 Bible Online

āmāl 3 - Roman Urdu Geo bible

āmāl 3

¹ek dopahar patras aur yūhannā duā karne ke lie bait-ul-muqaddas kī taraf chal paṛe. tīn baj gae the.

²us waqt log ek paidāishī langaṛe ko uṭhā kar wahāṅ lā rahe the. rozānā use sahan ke us darwāze ke pās lāyā jātā thā jo ‘ḳhūbsūrat darwāzā’ kahlātā thā tāki wuh bait-ul-muqaddas ke sahnoṅ meṅ dāḳhil hone wāloṅ se bhīk māṅg sake.

³patras aur yūhannā bait-ul-muqaddas meṅ dāḳhil hone wāle the to langaṛā un se bhīk māṅgne lagā.

⁴patras aur yūhannā ġhaur se us kī taraf deḳhne lage. phir patras ne kahā, “hamārī taraf dekheṅ.”

⁵is tawaqqo se ki use kuchh milegā langaṛā un kī taraf mutawajjih huā.

⁶lekin patras ne kahā, “mere pās na to chāṅdī hai, na sonā, lekin jo kuchh hai wuh āp ko de detā hūṅ. nāsarat ke īsā masīh ke nām se uṭheṅ aur chaleṅ phireṅ!”

⁷us ne us kā dahnā hāth pakaṛ kar use khaṛā kiyā. usī waqt langaṛe ke pāoṅ aur ṭaḳhne mazbūt ho gae.

⁸wuh uchhal kar khaṛā huā aur chalne phirne lagā. phir wuh chalte, kūdte aur allāh kī tamjīd karte hue un ke sāth bait-ul-muqaddas meṅ dāḳhil huā.

⁹aur tamām logoṅ ne use chalte phirte aur allāh kī tamjīd karte hue dekhā.

¹⁰jab unhoṅ ne jān liyā ki yih wuhī ādmī hai jo ḳhūbsūrat nāmī darwāze par baiṭhā bhīk māṅgā kartā thā to wuh us kī tabdīlī dekh kar dang rah gae.

¹¹wuh sab dauṛ kar sulaimān ke barāmde meṅ āe jahāṅ bhīk māṅgne wālā ab tak patras aur yūhannā se lipṭā huā thā.

¹²yih dekh kar patras un se muḳhātib huā, “isrāīl ke hazarāt, āp yih dekh kar kyūṅ hairān haiṅ? āp kyūṅ ghūr ghūr kar hamārī taraf dekh rahe haiṅ goyā ham ne apnī zātī tāqat yā dīndārī ke bāis yih kiyā hai ki yih ādmī chal phir sake?

¹³yih hamāre bāpdādā ke ḳhudā, ibrāhīm, is'hāq aur yāqūb ke ḳhudā kī taraf se hai jis ne apne bande īsā ko jalāl diyā hai. yih wuhī īsā hai jise āp ne dushman ke hawāle karke pīlātus ke sāmne radd kiyā, agarche wuh use rihā karne kā faislā kar chukā thā.

¹⁴āp ne us quddūs aur rāstbāz ko radd karke taqāzā kiyā ki pīlātus us ke iwaz ek qātil ko rihā karke āp ko de de.

¹⁵āp ne zindagī ke sardār ko qatl kiyā, lekin allāh ne use murdoṅ meṅ se zindā kar diyā. ham is bāt ke gawāh haiṅ.

¹⁶āp to is ādmī se wāqif haiṅ jise dekh rahe haiṅ. ab wuh īsā ke nām par īmān lāne se bahāl ho gayā hai, kyūṅki jo īmān īsā ke zarī'e miltā hai usī ne is ādmī ko āp ke sāmne pūrī sehhatmandī atā kī.

¹⁷mere bhāiyo, maiṅ jāntā hūṅ ki āp aur āp ke rāhnumāoṅ ko sahīh ilm nahīṅ thā, is lie āp ne aisā kiyā.

¹⁸lekin allāh ne wuh kuchh pūrā kiyā jis kī peshgoī us ne tamām nabiyoṅ kī mārifat kī thī, yānī yih ki us kā masīh dukh uṭhāegā.

¹⁹ab taubā kareṅ aur allāh kī taraf rujū lāeṅ tāki āp ke gunāhoṅ ko miṭāyā jāe.

²⁰phir āp ko rab ke huzūr se tāzagī ke din muyassar āeṅge aur wuh dubārā īsā yānī masīh ko bhej degā jise āp ke lie muqarrar kiyā gayā hai.

²¹lāzim hai ki wuh us waqt tak āsmān par rahe jab tak allāh sab kuchh bahāl na kar de, jis tarah wuh ibtidā se apne muqaddas nabiyoṅ kī zabānī farmātā āyā hai.

²²kyūṅki mūsā ne kahā, ‘rab tumhārā ḳhudā tumhāre wāste tumhāre bhāiyoṅ meṅ se mujh jaise nabī ko barpā karegā. jo bhī bāt wuh kahe us kī sunanā.

²³jo nahīṅ sunegā use miṭā kar qaum se nikāl diyā jāegā.’

²⁴aur samūel se le kar har nabī ne in dinoṅ kī peshgoī kī hai.

²⁵āp to in nabiyoṅ kī aulād aur us ahd ke wāris haiṅ jo allāh ne āp ke bāpdādā se qāim kiyā thā, kyūṅki us ne ibrāhīm se kahā thā, ‘terī aulād se duniyā kī tamām qaumeṅ barkat pāeṅgī.’

²⁶jab allāh ne apne bande īsā ko barpā kiyā to pahle use āp ke pās bhej diyā tāki wuh āp meṅ se har ek ko us kī burī rāhoṅ se pher kar barkat de.”