Read Roman Urdu Geo āmāl 4 Bible Online

āmāl 4 - Roman Urdu Geo bible

āmāl 4

¹patras aur yūhannā logoṅ se bāt kar hī rahe the ki imām, bait-ul-muqaddas ke pahredāroṅ kā kaptān aur sadūqī un ke pās pahuṅche.

²wuh nārāz the ki rasūl īsā ke jī uṭhne kī munādī karke logoṅ ko murdoṅ meṅ se jī uṭhne kī tālīm de rahe haiṅ.

³unhoṅ ne unheṅ giriftār karke agle din tak jel meṅ ḍāl diyā, kyūṅki shām ho chukī thī.

⁴lekin jinhoṅ ne un kā paiġhām sun liyā thā un meṅ se bahut se log īmān lāe. yūṅ īmāndāroṅ meṅ mardoṅ kī tādād baṛh kar taqrīban 5,000 tak pahuṅch gaī.

⁵agle din yarūshalam meṅ yahūdī adālat-e-āliyā ke sardāroṅ, buzurgoṅ aur sharīat ke ulamā kā ijlās mun'aqid huā.

⁶imām-e-āzam hannā aur isī tarah kāifā, yūhannā, sikandar aur imām-e-āzam ke ḳhāndān ke dīgar mard bhī shāmil the.

⁷unhoṅ ne donoṅ ko apne darmiyān khaṛā karke pūchhā, “tum ne yih kām kis quwwat aur nām se kiyā?”

⁸patras ne rūh-ul-quds se māmūr ho kar un se kahā, “qaum ke rāhnumāo aur buzurgo,

⁹āj hamārī pūchh-gachh kī jā rahī hai ki ham ne māzūr ādmī par rahm kā izhār kis ke wasīle se kiyā ki use shifā mil gaī hai.

¹⁰to phir āp sab aur pūrī qaum isrāīl jān le ki yih nāsarat ke īsā masīh ke nām se huā hai, jise āp ne maslūb kiyā aur jise allāh ne murdoṅ meṅ se zindā kar diyā. yih ādmī usī ke wasīle se sehhat pā kar yahāṅ āp ke sāmne khaṛā hai.

¹¹īsā wuh patthar hai jis ke bāre meṅ kalām-e-muqaddas meṅ likhā hai, ‘jis patthar ko makān banāne wāloṅ ne radd kiyā wuh kone kā bunyādī patthar ban gayā.’ aur āp hī ne use radd kar diyā hai.

¹²kisī dūsre ke wasīle se najāt hāsil nahīṅ hotī, kyūṅki āsmān ke tale ham insānoṅ ko koī aur nām nahīṅ baḳhshā gayā jis ke wasīle se ham najāt pā sakeṅ.”

¹³patras aur yūhannā kī bāteṅ sun kar log hairān hue kyūṅki wuh dilerī se bāt kar rahe the agarche wuh na to ālim the, na unhoṅ ne sharīat kī ḳhās tālīm pāī thī. sāth sāth sunane wāloṅ ne yih bhī jān liyā ki donoṅ īsā ke sāthī haiṅ.

¹⁴lekin chūṅki wuh apnī āṅkhoṅ se us ādmī ko dekh rahe the jo shifā pā kar un ke sāth khaṛā thā is lie wuh is ke ḳhilāf koī bāt na kar sake.

¹⁵chunāṅche unhoṅ ne un donoṅ ko ijlās meṅ se bāhar jāne ko kahā aur āpas meṅ salāh-mashwarā karne lage,

¹⁶“ham in logoṅ ke sāth kyā sulūk kareṅ? bāt wāzih hai ki un ke zarī'e ek ilāhī nishān dikhāyā gayā hai. is kā yarūshalam ke tamām bāshindoṅ ko ilm huā hai. ham is kā inkār nahīṅ kar sakte.

¹⁷lekin lāzim hai ki unheṅ dhamkī de kar hukm deṅ ki wuh kisī bhī shaḳhs se yih nām le kar bāt na kareṅ, warnā yih muāmalā qaum meṅ mazīd phail jāegā.”

¹⁸chunāṅche unhoṅ ne donoṅ ko bulā kar hukm diyā ki wuh āindā īsā ke nām se na kabhī boleṅ aur na tālīm deṅ.

¹⁹lekin patras aur yūhannā ne jawāb meṅ kahā, “āp ḳhud faislā kar leṅ, kyā yih allāh ke nazdīk ṭhīk hai ki ham us kī nisbat āp kī bāt māneṅ?

²⁰mumkin hī nahīṅ ki jo kuchh ham ne dekh aur sun liyā hai use dūsroṅ ko sunāne se bāz raheṅ.”

²¹tab ijlās ke maimbarān ne donoṅ ko mazīd dhamkiyāṅ de kar chhoṛ diyā. wuh faislā na kar sake ki kyā sazā deṅ, kyūṅki tamām log patras aur yūhannā ke is kām kī wajah se allāh kī tamjīd kar rahe the.

²²kyūṅki jis ādmī ko mojizānā taur par shifā milī thī wuh chālīs sāl se zyādā langaṛā rahā thā.

²³un kī rihāī ke bād patras aur yūhannā apne sāthiyoṅ ke pās wāpas gae aur sab kuchh sunāyā jo rāhnumā imāmoṅ aur buzurgoṅ ne unheṅ batāyā thā.

²⁴yih sun kar tamām īmāndāroṅ ne mil kar ūṅchī āwāz se duā kī, “ai āqā, tū ne āsmān-o-zamīn aur samundar ko aur jo kuchh un meṅ hai ḳhalaq kiyā hai.

²⁵aur tū ne apne ḳhādim hamāre bāp dāūd ke muṅh se rūh-ul-quds kī mārifat kahā, ‘aqwām kyūṅ taish meṅ ā gaī haiṅ? ummateṅ kyūṅ bekār sāzisheṅ kar rahī haiṅ?

²⁶duniyā ke bādshāh uṭh khaṛe hue, hukmrān rab aur us ke masīh ke ḳhilāf jamā ho gae haiṅ.’

²⁷aur wāqaī yihī kuchh is shahr meṅ huā. herodes antipās, puntiyus pīlātus, ġhairyahūdī aur yahūdī sab tere muqaddas ḳhādim īsā ke ḳhilāf jamā hue jise tū ne masah kiyā thā.

²⁸lekin jo kuchh unhoṅ ne kiyā wuh tū ne apnī qudrat aur marzī se pahle hī se muqarrar kiyā thā.

²⁹ai rab, ab un kī dhamkiyoṅ par ġhaur kar. apne ḳhādimoṅ ko apnā kalām sunāne kī baṛī dilerī atā farmā.

³⁰apnī qudrat kā izhār kar tāki ham tere muqaddas ḳhādim īsā ke nām se shifā, ilāhī nishān aur mojize dikhā sakeṅ.”

³¹duā ke iḳhtitām par wuh jagah hil gaī jahāṅ wuh jamā the. sab rūh-ul-quds se māmūr ho gae aur dilerī se allāh kā kalām sunāne lage.

³²īmāndāroṅ kī pūrī jamā'at yakdil thī. kisī ne bhī apnī milkiyat kī kisī chīz ke bāre meṅ nahīṅ kahā ki yih merī hai balki un kī har chīz mushtarakā thī.

³³aur rasūl baṛe iḳhtiyār ke sāth ḳhudāwand īsā ke jī uṭhne kī gawāhī dete rahe. allāh kī baṛī mehrbānī un sab par thī.

³⁴un meṅ se koī bhī zarūratmand nahīṅ thā, kyūṅki jis ke pās bhī zamīneṅ yā makān the us ne unheṅ faroḳht karke raqm

³⁵rasūloṅ ke pāoṅ meṅ rakh dī. yūṅ jamāshudā paisoṅ meṅ se har ek ko utne die jāte jitnoṅ kī use zarūrat hotī thī.

³⁶masalan yūsuf nāmī ek ādmī thā jis kā nām rasūloṅ ne barnabās (hauslā-afzāī kā beṭā) rakhā thā. wuh lāwī qabīle se aur jazīrā-e-qubrus kā rahne wālā thā.

³⁷us ne apnā ek khet faroḳht karke paise rasūloṅ ke pāoṅ meṅ rakh die.