Read Roman Urdu Geo āmāl 8 Bible Online

āmāl 8 - Roman Urdu Geo bible

āmāl 8

¹aur sāūl ko bhī stifanus kā qatl manzūr thā. us din yarūshalam meṅ maujūd jamā'at saḳht īzārasānī kī zad meṅ ā gaī. is lie siwāe rasūloṅ ke tamām īmāndār yahūdiyā aur sāmariyya ke ilāqoṅ meṅ titar-bitar ho gae.

²kuchh ḳhudātars ādmiyoṅ ne stifanus ko dafn karke ro ro kar us kā mātam kiyā.

³lekin sāūl īsā kī jamā'at ko tabāh karne par tulā huā thā. us ne ghar ghar jā kar īmāndār mard-o-ḳhawātīn ko nikāl diyā aur unheṅ ghasīṭ kar qaidḳhāne meṅ ḍalwā diyā.

⁴jo īmāndār bikhar gae the wuh jagah jagah jā kar allāh kī ḳhushḳhabrī sunāte phire.

⁵is tarah filippus sāmariyya ke kisī shahr ko gayā aur wahāṅ ke logoṅ ko masīh ke bāre meṅ batāyā.

⁶jo kuchh bhī filippus ne kahā aur jo bhī ilāhī nishān us ne dikhāe, us par sunane wāle hujūm ne yakdil ho kar tawajjuh dī.

⁷bahut se logoṅ meṅ se badrūheṅ zordār chīḳheṅ mār mār kar nikal gaīṅ, aur bahut se maflūjoṅ aur langaṛoṅ ko shifā mil gaī.

⁸yūṅ us shahr meṅ baṛī shādmānī phail gaī.

⁹wahāṅ kāfī arse se ek ādmī rahtā thā jis kā nām shamāūn thā. wuh jādūgar thā aur us ke hairatangez kām se sāmariyya ke log bahut muta'assir the. us kā apnā dāwā thā ki maiṅ koī ḳhās shaḳhs hūṅ.

¹⁰is lie sab log chhoṭe se le kar baṛe tak us par ḳhās tawajjuh dete the. un kā kahnā thā, ‘yih ādmī wuh ilāhī quwwat hai jo azīm kahlātī hai.’

¹¹wuh is lie us ke pīchhe lag gae the ki us ne unheṅ baṛī der se apne hairatangez kāmoṅ se muta'assir kar rakhā thā.

¹²lekin ab log filippus kī allāh kī bādshāhī aur īsā ke nām ke bāre meṅ ḳhushḳhabrī par īmān le āe, aur mard-o-ḳhawātīn ne baptismā liyā.

¹³ḳhud shamāūn ne bhī īmān lā kar baptismā liyā aur filippus ke sāth rahā. jab us ne wuh baṛe ilāhī nishān aur mojize dekhe jo filippus ke hāth se zāhir hue to wuh hakkā-bakkā rah gayā.

¹⁴jab yarūshalam meṅ rasūloṅ ne sunā ki sāmariyya ne allāh kā kalām qabūl kar liyā hai to unhoṅ ne patras aur yūhannā ko un ke pās bhej diyā.

¹⁵wahāṅ pahuṅch kar unhoṅ ne un ke lie duā kī ki unheṅ rūh-ul-quds mil jāe,

¹⁶kyūṅki abhī rūh-ul-quds un par nāzil nahīṅ huā thā balki unheṅ sirf ḳhudāwand īsā ke nām meṅ baptismā diyā gayā thā.

¹⁷ab jab patras aur yūhannā ne apne hāth un par rakhe to unheṅ rūh-ul-quds mil gayā.

¹⁸shamāūn ne dekhā ki jab rasūl logoṅ par hāth rakhte haiṅ to un ko rūh-ul-quds miltā hai. is lie us ne unheṅ paise pesh karke

¹⁹kahā, “mujhe bhī yih iḳhtiyār de deṅ ki jis par maiṅ hāth rakhūṅ use rūh-ul-quds mil jāe.”

²⁰lekin patras ne jawāb diyā, “āp ke paise āp ke sāth ġhārat ho jāeṅ, kyūṅki āp ne sochā ki allāh kī nemat paisoṅ se ḳharīdī jā saktī hai.

²¹is ḳhidmat meṅ āp kā koī hissā nahīṅ hai, kyūṅki āp kā dil allāh ke sāmne ḳhālis nahīṅ hai.

²²apnī is sharārat se taubā karke ḳhudāwand se duā kareṅ. shāyad wuh āp ko is irāde kī muāfī de jo āp ne dil meṅ rakhā hai.

²³kyūṅki maiṅ deḳhtā hūṅ ki āp kaṛwe pit se bhare aur nārāstī ke bandhan meṅ jakaṛe hue haiṅ.”

²⁴shamāūn ne kahā, “phir ḳhudāwand se mere lie duā kareṅ ki āp kī mazkūrā musībatoṅ meṅ se mujh par koī na āe.”

²⁵ḳhudāwand ke kalām kī gawāhī dene aur us kī munādī karne ke bād patras aur yūhannā wāpas yarūshalam ke lie rawānā hue. rāste meṅ unhoṅ ne sāmariyya ke bahut se dehātoṅ meṅ allāh kī ḳhushḳhabrī sunāī.

²⁶ek din rab ke farishte ne filippus se kahā, “uṭh kar junūb kī taraf us rāh par jā jo registān meṅ se guzar kar yarūshalam se ġhazzā ko jātī hai.”

²⁷filippus uṭh kar rawānā huā. chalte chalte us kī mulāqāt ethūpiyā kī malikā kandāke ke ek ḳhwājāsarā se huī. malikā ke pūre ḳhazāne par muqarrar yih darbārī ibādat karne ke lie yarūshalam gayā thā

²⁸aur ab apne mulk meṅ wāpas jā rahā thā. us waqt wuh rath meṅ sawār yasāyāh nabī kī kitāb kī tilāwat kar rahā thā.

²⁹rūh-ul-quds ne filippus se kahā, “us ke pās jā kar rath ke sāth ho le.”

³⁰filippus dauṛ kar rath ke pās pahuṅchā to sunā ki wuh yasāyāh nabī kī kitāb kī tilāwat kar rahā hai. us ne pūchhā, “kyā āp ko us sab kī samajh ātī hai jo āp paṛh rahe haiṅ?”

³¹darbārī ne jawāb diyā, “maiṅ kyūṅkar samjhūṅ jab tak koī merī rāhnumāī na kare?” aur us ne filippus ko rath meṅ sawār hone kī dāwat dī.

³²kalām-e-muqaddas kā jo hawālā wuh paṛh rahā thā yih thā, ‘use bheṛ kī tarah zabah karne ke lie le gae. jis tarah lelā bāl katarne wāle ke sāmne ḳhāmosh rahtā hai, usī tarah us ne apnā muṅh na kholā.

³³us kī tazlīl kī gaī aur use insāf na milā. kaun us kī nasl bayān kar saktā hai? kyūṅki us kī jān duniyā se chhīn lī gaī.’

³⁴darbārī ne filippus se pūchhā, “mehrbānī karke mujhe batā dījie ki nabī yahāṅ kis kā zikr kar rahā hai, apnā yā kisī aur kā?”

³⁵jawāb meṅ filippus ne kalām-e-muqaddas ke isī hawāle se shurū karke use īsā ke bāre meṅ ḳhushḳhabrī sunāī.

³⁶saṛak par safar karte karte wuh ek jagah se guzare jahāṅ pānī thā. ḳhwājāsarā ne kahā, “dekheṅ, yahāṅ pānī hai. ab mujhe baptismā lene se kaun sī chīz rok saktī hai?”

³⁷[filippus ne kahā, “agar āp pūre dil se īmān lāeṅ to le sakte haiṅ.” us ne jawāb diyā, “maiṅ īmān rakhtā hūṅ ki īsā masīh allāh kā farzand hai.”]

³⁸us ne rath ko rokne kā hukm diyā. donoṅ pānī meṅ utar gae aur filippus ne use baptismā diyā.

³⁹jab wuh pānī se nikal āe to ḳhudāwand kā rūh filippus ko uṭhā le gayā. is ke bād ḳhwājāsarā ne use phir kabhī na dekhā, lekin us ne ḳhushī manāte hue apnā safar jārī rakhā.

⁴⁰itne meṅ filippus ko ashdūd shahr meṅ pāyā gayā. wuh wahāṅ aur qaisariyā tak ke tamām shahroṅ meṅ se guzar kar allāh kī ḳhushḳhabrī sunātā gayā.