Read Roman Urdu Geo romiyoṅ 10 Bible Online

romiyoṅ 10 - Roman Urdu Geo bible

romiyoṅ 10

¹bhāiyo, merī dilī ārzū aur merī allāh se duā yih hai ki isrāīliyoṅ ko najāt mile.

²maiṅ is kī tasdīq kar saktā hūṅ ki wuh allāh kī ġhairat rakhte haiṅ. lekin is ġhairat ke pīchhe ruhānī samajh nahīṅ hotī.

³wuh us rāstbāzī se nāwāqif rahe haiṅ jo allāh kī taraf se hai. is kī bajāe wuh apnī zātī rāstbāzī qāim karne kī koshish karte rahe haiṅ. yūṅ unhoṅ ne apne āp ko allāh kī rāstbāzī ke tābe nahīṅ kiyā.

⁴kyūṅki masīh meṅ sharīat kā maqsad pūrā ho gayā, hāṅ wuh anjām tak pahuṅch gaī hai. chunāṅche jo bhī masīh par īmān rakhtā hai wuhī rāstbāz ṭhahartā hai.

⁵mūsā ne us rāstbāzī ke bāre meṅ likhā jo sharīat se hāsil hotī hai, “jo shaḳhs yūṅ karegā wuh jītā rahegā.”

⁶lekin jo rāstbāzī īmān se hāsil hotī hai wuh kahtī hai, “apne dil meṅ na kahnā ki ‘kaun āsmān par chaṛhegā?’ (tāki masīh ko nīche le āe).

⁷yih bhī na kahnā ki ‘kaun pātāl meṅ utregā?’ (tāki masīh ko murdoṅ meṅ se wāpas le āe).”

⁸to phir kyā karnā chāhie? īmān kī rāstbāzī farmātī hai, “yih kalām tere qarīb balki tere muṅh aur dil meṅ maujūd hai.” kalām se murād īmān kā wuh paiġhām hai jo ham sunāte haiṅ.

⁹yānī yih ki agar tū apne muṅh se iqrār kare ki īsā ḳhudāwand hai aur dil se īmān lāe ki allāh ne use murdoṅ meṅ se zindā kar diyā to tujhe najāt milegī.

¹⁰kyūṅki jab ham dil se īmān lāte haiṅ to allāh hameṅ rāstbāz qarār detā hai, aur jab ham apne muṅh se iqrār karte haiṅ to hameṅ najāt miltī hai.

¹¹yūṅ kalām-e-muqaddas farmātā hai, “jo bhī us par īmān lāe use sharmindā nahīṅ kiyā jāegā.”

¹²is meṅ koī farq nahīṅ ki wuh yahūdī ho yā ġhairyahūdī. kyūṅki sab kā ek hī ḳhudāwand hai, jo fayyāzī se har ek ko detā hai jo use pukārtā hai.

¹³kyūṅki “jo bhī ḳhudāwand kā nām legā najāt pāegā.”

¹⁴lekin wuh kis tarah use pukār sakeṅge agar wuh us par kabhī īmān nahīṅ lāe? aur wuh kis tarah us par īmān lā sakte haiṅ agar unhoṅ ne kabhī us ke bāre meṅ sunā nahīṅ? aur wuh kis tarah us ke bāre meṅ sun sakte haiṅ agar kisī ne unheṅ yih paiġhām sunāyā nahīṅ?

¹⁵aur sunāne wāle kis tarah dūsroṅ ke pās jāeṅge agar unheṅ bhejā na gayā? is lie kalām-e-muqaddas farmātā hai, “un ke qadam kitne pyāre haiṅ jo ḳhushḳhabrī sunāte haiṅ.”

¹⁶lekin sab ne allāh kī yih ḳhushḳhabrī qabūl nahīṅ kī. yūṅ yasāyāh nabī farmātā hai, “ai rab, kaun hamāre paiġhām par īmān lāyā?”

¹⁷ġharz, īmān paiġhām sunane se paidā hotā hai, yānī masīh kā kalām sunane se.

¹⁸to phir sawāl yih hai ki kyā isrāīliyoṅ ne yih paiġhām nahīṅ sunā? unhoṅ ne ise zarūr sunā. kalām-e-muqaddas meṅ likhā hai, “un kī āwāz nikal kar pūrī duniyā meṅ sunāī dī, un ke alfāz duniyā kī intihā tak pahuṅch gae.”

¹⁹to kyā isrāīl ko is bāt kī samajh na āī? nahīṅ, use zarūr samajh āī. pahle mūsā is kā jawāb detā hai, “maiṅ ḳhud hī tumheṅ ġhairat dilāūṅgā, ek aisī qaum ke zarī'e jo haqīqat meṅ qaum nahīṅ hai. ek nādān qaum ke zarī'e maiṅ tumheṅ ġhussā dilāūṅgā.”

²⁰aur yasāyāh nabī yih kahne kī jur'at kartā hai, “jo mujhe talāsh nahīṅ karte the unheṅ maiṅ ne mujhe pāne kā mauqā diyā, jo mere bāre meṅ daryāft nahīṅ karte the un par maiṅ zāhir huā.”

²¹lekin isrāīl ke bāre meṅ wuh farmātā hai, “din bhar maiṅ ne apne hāth phailāe rakhe tāki ek nāfarmān aur sarkash qaum kā istiqbāl karūṅ.”