Read Roman Urdu Geo romiyoṅ 13 Bible Online

romiyoṅ 13 - Roman Urdu Geo bible

romiyoṅ 13

¹har shaḳhs iḳhtiyār rakhne wāle hukmrānoṅ ke tābe rahe, kyūṅki tamām iḳhtiyār allāh kī taraf se hai. jo iḳhtiyār rakhte haiṅ unheṅ allāh kī taraf se muqarrar kiyā gayā hai.

²chunāṅche jo hukmrān kī muḳhālafat kartā hai wuh allāh ke farmān kī muḳhālafat kartā aur yūṅ apne āp par allāh kī adālat lātā hai.

³kyūṅki hukmrān un ke lie ḳhauf kā bāis nahīṅ hote jo sahīh kām karte haiṅ balki un ke lie jo ġhalat kām karte haiṅ. kyā āp hukmrān se ḳhauf khāe baġhair zindagī guzārnā chāhte haiṅ? to phir wuh kuchh kareṅ jo achchhā hai to wuh āp ko shābāsh degā.

⁴kyūṅki wuh allāh kā ḳhādim hai jo āp kī behtarī ke lie ḳhidmat kartā hai. lekin agar āp ġhalat kām kareṅ to ḍareṅ, kyūṅki wuh apnī talwār ko ḳhwāh-ma-ḳhwāh thāme nahīṅ rakhtā. wuh allāh kā ḳhādim hai aur us kā ġhazab ġhalat kām karne wāle par nāzil hotā hai.

⁵is lie lāzim hai ki āp hukūmat ke tābe raheṅ, na sirf sazā se bachne ke lie balki is lie bhī ki āp ke zamīr par dāġh na lage.

⁶yihī wajah hai ki āp ṭaiks adā karte haiṅ, kyūṅki sarkārī mulāzim allāh ke ḳhādim haiṅ jo is ḳhidmat ko saranjām dene meṅ lage rahte haiṅ.

⁷chunāṅche har ek ko wuh kuchh deṅ jo us kā haq hai, ṭaiks lene wāle ko ṭaiks aur kasṭam ḍyūṭī lene wāle ko kasṭam ḍyūṭī. jis kā ḳhauf rakhnā āp par farz hai us kā ḳhauf māneṅ aur jis kā ehtirām karnā āp par farz hai us kā ehtirām kareṅ.

⁸kisī ke bhī qarzdār na raheṅ. sirf ek qarz hai jo āp kabhī nahīṅ utār sakte, ek dūsre se muhabbat rakhne kā qarz. yih karte raheṅ kyūṅki jo dūsroṅ se muhabbat rakhtā hai us ne sharīat ke tamām taqāze pūre kie haiṅ.

⁹masalan sharīat meṅ likhā hai, “qatl na karnā, zinā na karnā, chorī na karnā, lālach na karnā.” aur dīgar jitne ahkām haiṅ is ek hī hukm meṅ samāe hue haiṅ ki “apne paṛosī se waisī muhabbat rakhnā jaisī tū apne āp se rakhtā hai.”

¹⁰jo kisī se muhabbat rakhtā hai wuh us se ġhalat sulūk nahīṅ kartā. yūṅ muhabbat sharīat ke tamām taqāze pūre kartī hai.

¹¹aisā karnā lāzim hai, kyūṅki āp ḳhud is waqt kī ahmiyat ko jānte haiṅ ki nīnd se jāg uṭhne kī ghaṛī ā chukī hai. kyūṅki jab ham īmān lāe the to hamārī najāt itnī qarīb nahīṅ thī jitnī ki ab hai.

¹²rāt ḍhalne wālī hai aur din nikalne wālā hai. is lie āeṅ, ham tārīkī ke kām gande kapṛoṅ kī tarah utār kar nūr ke hathiyār bāndh leṅ.

¹³ham sharīf zindagī guzāreṅ, aise logoṅ kī tarah jo din kī raushnī meṅ chalte haiṅ. is lie lāzim hai ki ham in chīzoṅ se bāz raheṅ: badmastoṅ kī rangraliyoṅ aur sharābnoshī se, zinākārī aur ayyāshī se, aur jhagaṛe aur hasad se.

¹⁴is ke bajāe ḳhudāwand īsā masīh ko pahan leṅ aur apnī purānī fitrat kī parwarish yūṅ na kareṅ ki gunāhālūdā ḳhwāhishāt bedār ho jāeṅ.