Read Roman Urdu Geo romiyoṅ 16 Bible Online

romiyoṅ 16 - Roman Urdu Geo bible

romiyoṅ 16

¹hamārī bahan fībe āp ke pās ā rahī hai. wuh kinḳhriyā shahr kī jamā'at meṅ ḳhādimā hai. maiṅ us kī sifārish kartā hūṅ

²balki ḳhudāwand meṅ arz hai ki āp us kā waise hī istiqbāl kareṅ jaise ki muqaddasīn ko karnā chāhie. jis muāmale meṅ bhī use āp kī madad kī zarūrat ho us meṅ us kā sāth deṅ, kyūṅki us ne bahut logoṅ kī balki merī bhī madad kī hai.

³priskillā aur akwilā ko merā salām denā jo masīh īsā meṅ mere hamḳhidmat rahe haiṅ.

⁴unhoṅ ne mere lie apnī jān par khelā. na sirf maiṅ balki ġhairyahūdiyoṅ kī jamā'ateṅ un kī ehsānmand haiṅ.

⁵un ke ghar meṅ jamā hone wālī jamā'at ko bhī merā salām denā. mere azīz dost ipinetus ko merā salām denā. wuh sūbā āsiyā meṅ masīh kā pahlā pairokār yānī us ilāqe kī fasal kā pahlā phal thā.

⁶mariyam ko merā salām jis ne āp ke lie baṛī mehnat-mashaqqat kī hai.

⁷andrūnīkus aur yūniyā ko merā salām. wuh mere hamwatan haiṅ aur jel meṅ mere sāth waqt guzārā hai. rasūloṅ meṅ wuh numāyāṅ haisiyat rakhte haiṅ, aur wuh mujh se pahle masīh ke pīchhe ho lie the.

⁸ampliyātus ko salām. wuh ḳhudāwand meṅ mujhe azīz hai.

⁹masīh meṅ hamāre hamḳhidmat urbānus ko salām aur isī tarah mere azīz dost istaḳhus ko bhī.

¹⁰apellis ko salām jis kī masīh ke sāth wafādārī ko āzmāyā gayā hai. aristubūlus ke ghar wāloṅ ko salām.

¹¹mere hamwatan herodiyon ko salām aur isī tarah narkissus ke un ghar wāloṅ ko bhī jo masīh ke pīchhe ho lie haiṅ.

¹²trūfenā aur trūfosā ko salām jo ḳhudāwand kī ḳhidmat meṅ mehnat-mashaqqat kartī haiṅ. merī azīz bahan parsis ko salām jis ne ḳhudāwand kī ḳhidmat meṅ baṛī mehnat-mashaqqat kī hai.

¹³hamāre ḳhudāwand ke chune hue bhāī rūfus ko salām aur isī tarah us kī māṅ ko bhī jo merī māṅ bhī hai.

¹⁴asinkritus, faligon, hirmes, patrobās, hirmās aur un ke sāthī bhāiyoṅ ko merā salām denā.

¹⁵filulugus aur yūliyā, neriyūs aur us kī bahan, ulimpās aur un ke sāth tamām muqaddasīn ko salām.

¹⁶ek dūsre ko muqaddas bosā de kar salām kareṅ. masīh kī tamām jamā'atoṅ kī taraf se āp ko salām.

¹⁷bhāiyo, maiṅ āp ko tākīd kartā hūṅ ki āp un se ḳhabardār raheṅ jo pārṭībāzī aur ṭhokar kā bāis bante haiṅ. yih us tālīm ke ḳhilāf hai jo āp ko dī gaī hai. un se kinārā kareṅ

¹⁸kyūṅki aise log hamāre ḳhudāwand masīh kī ḳhidmat nahīṅ kar rahe balki apne peṭ kī. wuh apnī mīṭhī aur chiknī-chupṛī bātoṅ se sādālauh logoṅ ke diloṅ ko dhokā dete haiṅ.

¹⁹āp kī farmāṅbardārī kī ḳhabar sab tak pahuṅch gaī hai. yih dekh kar maiṅ āp ke bāre meṅ ḳhush hūṅ. lekin maiṅ chāhtā hūṅ ki āp achchhā kām karne ke lihāz se dānishmand aur burā kām karne ke lihāz se bequsūr hoṅ.

²⁰salāmatī kā ḳhudā jald hī iblīs ko āp ke pāoṅ tale kuchalwā ḍālegā. hamāre ḳhudāwand īsā kā fazl āp ke sāth ho.

²¹merā hamḳhidmat tīmuthiyus āp ko salām detā hai, aur isī tarah mere hamwatan lūkiyus, yāson aur sosipātrus.

²²maiṅ, tirtiyus is ḳhat kā kātib hūṅ. merī taraf se bhī ḳhudāwand meṅ āp ko salām.

²³gayus kī taraf se āp ko salām. maiṅ aur pūrī jamā'at us ke mehmān rahe haiṅ. shahr ke ḳhazāṅchī irāstus aur hamāre bhāī kwārtus bhī āp ko salām kahte haiṅ.

²⁴[hamāre ḳhudāwand īsā kā fazl āp sab ke sāth hotā rahe.]

²⁵allāh kī tamjīd ho, jo āp ko mazbūt karne par qādir hai, kyūṅki īsā masīh ke bāre meṅ us ḳhushḳhabrī se jo maiṅ sunātā hūṅ aur us bhed ke inkishāf se jo azal se poshīdā rahā wuh āp ko qāim rakh saktā hai.

²⁶ab is bhed kī haqīqat nabiyoṅ ke sahīfoṅ se zāhir kī gaī hai aur abadī ḳhudā ke hukm par tamām qaumoṅ ko mālūm ho gaī hai tāki sab īmān lā kar allāh ke tābe ho jāeṅ.

²⁷allāh kī tamjīd ho jo wāhid dānishmand hai. usī kā īsā masīh ke wasīle se abad tak jalāl hotā rahe! āmīn.