Read Roman Urdu Geo romiyoṅ 2 Bible Online

romiyoṅ 2 - Roman Urdu Geo bible

romiyoṅ 2

¹ai insān, kyā tū dūsroṅ ko mujrim ṭhahrātā hai? tū jo koī bhī ho terā koī uzr nahīṅ. kyūṅki tū ḳhud bhī wuhī kuchh kartā hai jis meṅ tū dūsroṅ ko mujrim ṭhahrātā hai aur yūṅ apne āp ko bhī mujrim qarār detā hai.

²ab ham jānte haiṅ ki aise kām karne wāloṅ par allāh kā faislā munsifānā hai.

³tāham tū wuhī kuchh kartā hai jis meṅ tū dūsroṅ ko mujrim ṭhahrātā hai. kyā tū samajhtā hai ki ḳhud allāh kī adālat se bach jāegā?

⁴yā kyā tū us kī wasī mehrbānī, tahammul aur sabar ko haqīr jāntā hai? kyā tujhe mālūm nahīṅ ki allāh kī mehrbānī tujhe taubā tak le jānā chāhtī hai?

⁵lekin tū haṭdharm hai, tū taubā karne ke lie tayyār nahīṅ aur yūṅ apnī sazā meṅ izāfā kartā jā rahā hai, wuh sazā jo us din dī jāegī jab allāh kā ġhazab nāzil hogā, jab us kī rāst adālat zāhir hogī.

⁶allāh har ek ko us ke kāmoṅ kā badlā degā.

⁷kuchh log sābitqadmī se nek kām karte aur jalāl, izzat aur baqā ke tālib rahte haiṅ. unheṅ allāh abadī zindagī atā karegā.

⁸lekin kuchh log ḳhudġharz haiṅ aur sachchāī kī nahīṅ balki nārāstī kī pairawī karte haiṅ. un par allāh kā ġhazab aur qahr nāzil hogā.

⁹musībat aur pareshānī har us insān par āegī jo burāī kartā hai, pahle yahūdī par, phir yūnānī par.

¹⁰lekin jalāl, izzat aur salāmatī har us insān ko hāsil hogī jo nekī kartā hai, pahle yahūdī ko, phir yūnānī ko.

¹¹kyūṅki allāh kisī kā bhī tarafdār nahīṅ.

¹²ġhairyahūdiyoṅ ke pās mūswī sharīat nahīṅ hai, is lie wuh sharīat ke baġhair hī gunāh karke halāk ho jāte haiṅ. yahūdiyoṅ ke pās sharīat hai, lekin wuh bhī nahīṅ bacheṅge. kyūṅki jab wuh gunāh karte haiṅ to sharīat hī unheṅ mujrim ṭhahrātī hai.

¹³kyūṅki allāh ke nazdīk yih kāfī nahīṅ ki ham sharīat kī bāteṅ suneṅ balki wuh hameṅ us waqt hī rāstbāz qarār detā hai jab sharīat par amal bhī karte haiṅ.

¹⁴aur go ġhairyahūdiyoṅ ke pās sharīat nahīṅ hotī lekin jab bhī wuh fitratī taur par wuh kuchh karte haiṅ jo sharīat farmātī hai to zāhir karte haiṅ ki go hamāre pās sharīat nahīṅ to bhī ham apne āp ke lie ḳhud sharīat haiṅ.

¹⁵is meṅ wuh sābit karte haiṅ ki sharīat ke taqāze un ke dil par likhe hue haiṅ. un kā zamīr bhī is kī gawāhī detā hai, kyūṅki un ke ḳhayālāt kabhī ek dūsre kī mazammat aur kabhī ek dūsre kā difā bhī karte haiṅ.

¹⁶ġharz, merī ḳhushḳhabrī ke mutābiq har ek ko us din apnā ajr milegā jab allāh īsā masīh kī mārifat insānoṅ kī poshīdā bātoṅ kī adālat karegā.

¹⁷achchhā, tū apne āp ko yahūdī kahtā hai. tū sharīat par inhisār kartā aur allāh ke sāth apne tālluq par faḳhr kartā hai.

¹⁸tū us kī marzī ko jāntā hai aur sharīat kī tālīm pāne ke bāis sahīh rāh kī pahchān rakhtā hai.

¹⁹tujhe pūrā yaqīn hai, ‘maiṅ andhoṅ kā qāid, tārīkī meṅ basne wāloṅ kī raushnī,

²⁰besamjhoṅ kā muallim aur bachchoṅ kā ustād hūṅ.’ ek lihāz se yih durust bhī hai, kyūṅki sharīat kī sūrat meṅ tere pās ilm-o-irfān aur sachchāī maujūd hai.

²¹ab batā, tū jo auroṅ ko sikhātā hai apne āp ko kyūṅ nahīṅ sikhātā? tū jo chorī na karne kī munādī kartā hai, ḳhud chorī kyūṅ kartā hai?

²²tū jo auroṅ ko zinā karne se manā kartā hai, ḳhud zinā kyūṅ kartā hai? tū jo butoṅ se ghin khātā hai, ḳhud mandiroṅ ko kyūṅ lūṭtā hai?

²³tū jo sharīat par faḳhr kartā hai, kyūṅ is kī ḳhilāfwarzī karke allāh kī be'izzatī kartā hai?

²⁴yih wuhī bāt hai jo kalām-e-muqaddas meṅ likhī hai, “tumhāre sabab se ġhairyahūdiyoṅ meṅ allāh ke nām par kufr bakā jātā hai.”

²⁵ḳhatne kā fāidā to us waqt hotā hai jab tū sharīat par amal kartā hai. lekin agar tū us kī hukmadūlī kartā hai to tū nāmaḳhtūn jaisā hai.

²⁶is ke baraks agar nāmaḳhtūn ġhairyahūdī sharīat ke taqāzoṅ ko pūrā kartā hai to kyā allāh use maḳhtūn yahūdī ke barābar nahīṅ ṭhahrāegā?

²⁷chunāṅche jo nāmaḳhtūn ġhairyahūdī sharīat par amal karte haiṅ wuh āp yahūdiyoṅ ko mujrim ṭhahrāeṅge jin kā ḳhatnā huā hai aur jin ke pās sharīat hai, kyūṅki āp sharīat par amal nahīṅ karte.

²⁸āp is binā par haqīqī yahūdī nahīṅ haiṅ ki āp ke wālidain yahūdī the yā āp ke badan kā ḳhatnā zāhirī taur par huā hai.

²⁹balki haqīqī yahūdī wuh hai jo bātin meṅ yahūdī hai. aur haqīqī ḳhatnā us waqt hotā hai jab dil kā ḳhatnā huā hai. aisā ḳhatnā sharīat se nahīṅ balki rūh-ul-quds ke wasīle se kiyā jātā hai. aur aise yahūdī ko insān kī taraf se nahīṅ balki allāh kī taraf se tārīf miltī hai.