Read Roman Urdu Geo romiyoṅ 6 Bible Online

romiyoṅ 6 - Roman Urdu Geo bible

romiyoṅ 6

¹kyā is kā matlab yih hai ki ham gunāh karte raheṅ tāki allāh ke fazl meṅ izāfā ho?

²hargiz nahīṅ! ham to mar kar gunāh se lātālluq ho gae haiṅ. to phir ham kis tarah gunāh ko apne āp par hukūmat karne de sakte haiṅ?

³yā kyā āp ko mālūm nahīṅ ki ham sab jinheṅ baptismā diyā gayā hai is se masīh īsā kī maut meṅ shāmil ho gae haiṅ?

⁴kyūṅki baptisme se hameṅ dafnāyā gayā aur us kī maut meṅ shāmil kiyā gayā tāki ham masīh kī tarah naī zindagī guzāreṅ, jise bāp kī jalālī qudrat ne murdoṅ meṅ se zindā kiyā.

⁵chūṅki is tarah ham us kī maut meṅ us ke sāth paiwast ho gae haiṅ is lie ham us ke jī uṭhne meṅ bhī us ke sāth paiwast hoṅge.

⁶kyūṅki ham jānte haiṅ ki hamārā purānā insān masīh ke sāth maslūb ho gayā tāki gunāh ke qabze meṅ yih jism nest ho jāe aur yūṅ ham gunāh ke ġhulām na raheṅ.

⁷kyūṅki jo mar gayā wuh gunāh se āzād ho gayā hai.

⁸aur hamārā īmān hai ki chūṅki ham masīh ke sāth mar gae haiṅ is lie ham us ke sāth zindā bhī hoṅge,

⁹kyūṅki ham jānte haiṅ ki masīh murdoṅ meṅ se jī uṭhā hai aur ab kabhī nahīṅ maregā. ab maut kā us par koī iḳhtiyār nahīṅ.

¹⁰marte waqt wuh hameshā ke lie gunāh kī hukūmat se nikal gayā, aur ab jab wuh dubārā zindā hai to us kī zindagī allāh ke lie maḳhsūs hai.

¹¹āp bhī apne āp ko aisā samjheṅ. āp bhī mar kar gunāh kī hukūmat se nikal gae haiṅ aur ab āp kī masīh meṅ zindagī allāh ke lie maḳhsūs hai.

¹²chunāṅche gunāh āp ke fānī badan meṅ hukūmat na kare. dhyān deṅ ki āp us kī burī ḳhwāhishāt ke tābe na ho jāeṅ.

¹³apne badan ke kisī bhī azu ko gunāh kī ḳhidmat ke lie pesh na kareṅ, na use nārāstī kā hathiyār banane deṅ. is ke bajāe apne āp ko allāh kī ḳhidmat ke lie pesh kareṅ. kyūṅki pahle āp murdā the, lekin ab āp zindā ho gae haiṅ. chunāṅche apne tamām āzā ko allāh kī ḳhidmat ke lie pesh kareṅ aur unheṅ rāstī ke hathiyār banane deṅ.

¹⁴āindā gunāh āp par hukūmat nahīṅ karegā, kyūṅki āp apnī zindagī sharīat ke taht nahīṅ guzārte balki allāh ke fazl ke taht.

¹⁵ab sawāl yih hai, chūṅki ham sharīat ke taht nahīṅ balki fazl ke taht haiṅ to kyā is kā matlab yih hai ki hameṅ gunāh karne ke lie khulā chhoṛ diyā gayā hai? hargiz nahīṅ!

¹⁶kyā āp ko mālūm nahīṅ ki jab āp apne āp ko kisī ke tābe karke us ke ġhulām ban jāte haiṅ to āp us mālik ke ġhulām haiṅ jis ke tābe āp haiṅ? yā to gunāh āp kā mālik ban kar āp ko maut tak le jāegā, yā farmāṅbardārī āp kī mālikan ban kar āp ko rāstbāzī tak le jāegī.

¹⁷darhaqīqat āp pahle gunāh ke ġhulām the, lekin ḳhudā kā shukr hai ki ab āp pūre dil se usī tālīm ke tābe ho gae haiṅ jo āp ke sapurd kī gaī hai.

¹⁸ab āp ko gunāh se āzād kar diyā gayā hai, rāstbāzī hī āp kī mālikan ban gaī hai.

¹⁹(āp kī fitratī kamzorī kī wajah se maiṅ ġhulāmī kī yih misāl de rahā hūṅ tāki āp merī bāt samajh pāeṅ.) pahle āp ne apne āzā ko najāsat aur bedīnī kī ġhulāmī meṅ de rakhā thā jis ke natīje meṅ āp kī bedīnī baṛhtī gaī. lekin ab āp apne āzā ko rāstbāzī kī ġhulāmī meṅ de deṅ tāki āp muqaddas ban jāeṅ.

²⁰jab gunāh āp kā mālik thā to āp rāstbāzī se āzād the.

²¹aur is kā natījā kyā thā? jo kuchh āp ne us waqt kiyā us se āp ko āj sharm ātī hai aur us kā anjām maut hai.

²²lekin ab āp gunāh kī ġhulāmī se āzād ho kar allāh ke ġhulām ban gae haiṅ, jis ke natīje meṅ āp maḳhsūs-o-muqaddas ban jāte haiṅ aur jis kā anjām abadī zindagī hai.

²³kyūṅki gunāh kā ajr maut hai jabki allāh hamāre ḳhudāwand masīh īsā ke wasīle se hameṅ abadī zindagī kī muft nemat atā kartā hai.