Read Roman Urdu Geo romiyoṅ 8 Bible Online

romiyoṅ 8 - Roman Urdu Geo bible

romiyoṅ 8

¹ab jo masīh īsā meṅ haiṅ unheṅ mujrim nahīṅ ṭhahrāyā jātā.

²kyūṅki rūh kī sharīat ne jo hameṅ masīh meṅ zindagī atā kartī hai tujhe gunāh aur maut kī sharīat se āzād kar diyā hai.

³mūswī sharīat hamārī purānī fitrat kī kamzor hālat kī wajah se hameṅ na bachā sakī. is lie allāh ne wuh kuchh kiyā jo sharīat ke bas meṅ na thā. us ne apnā farzand bhej diyā tāki wuh gunāhgār kā sā jism iḳhtiyār karke hamāre gunāhoṅ kā kaffārā de. is tarah allāh ne purānī fitrat meṅ maujūd gunāh ko mujrim ṭhahrāyā

⁴tāki ham meṅ sharīat kā taqāzā pūrā ho jāe, ham jo purānī fitrat ke mutābiq nahīṅ balki rūh ke mutābiq chalte haiṅ.

⁵jo purānī fitrat ke iḳhtiyār meṅ haiṅ wuh purānī soch rakhte haiṅ jabki jo rūh ke iḳhtiyār meṅ haiṅ wuh ruhānī soch rakhte haiṅ.

⁶purānī fitrat kī soch kā anjām maut hai jabki rūh kī soch zindagī aur salāmatī paidā kartī hai.

⁷purānī fitrat kī soch allāh se dushmanī rakhtī hai. yih apne āp ko allāh kī sharīat ke tābe nahīṅ rakhtī, na hī aisā kar saktī hai.

⁸is lie wuh log allāh ko pasand nahīṅ ā sakte jo purānī fitrat ke iḳhtiyār meṅ haiṅ.

⁹lekin āp purānī fitrat ke iḳhtiyār meṅ nahīṅ balki rūh ke iḳhtiyār meṅ haiṅ. shart yih hai ki rūh-ul-quds āp meṅ basā huā ho. agar kisī meṅ masīh kā rūh nahīṅ to wuh masīh kā nahīṅ.

¹⁰lekin agar masīh āp meṅ hai to phir āp kā badan gunāh kī wajah se murdā hai jabki rūh-ul-quds āp ko rāstbāz ṭhahrāne kī wajah se āp ke lie zindagī kā bāis hai.

¹¹us kā rūh āp meṅ bastā hai jis ne īsā ko murdoṅ meṅ se zindā kiyā. aur chūṅki rūh-ul-quds āp meṅ bastā hai is lie allāh is ke zarī'e āp ke fānī badanoṅ ko bhī masīh kī tarah zindā karegā.

¹²chunāṅche mere bhāiyo, hamārī purānī fitrat kā koī haq na rahā ki hameṅ apne mutābiq zindagī guzārne par majbūr kare.

¹³kyūṅki agar āp apnī purānī fitrat ke mutābiq zindagī guzāreṅ to āp halāk ho jāeṅge. lekin agar āp rūh-ul-quds kī quwwat se apnī purānī fitrat ke ġhalat kāmoṅ ko nest-o-nābūd kareṅ to phir āp zindā raheṅge.

¹⁴jis kī bhī rāhnumāī rūh-ul-quds kartā hai wuh allāh kā farzand hai.

¹⁵kyūṅki allāh ne jo rūh āp ko diyā hai us ne āp ko ġhulām banā kar ḳhaufzadā hālat meṅ nahīṅ rakhā balki āp ko allāh ke farzand banā diyā hai, aur usī ke zarī'e ham pukār kar allāh ko “abbā” yānī “ai bāp” kah sakte haiṅ.

¹⁶rūh-ul-quds ḳhud hamārī rūh ke sāth mil kar gawāhī detā hai ki ham allāh ke farzand haiṅ.

¹⁷aur chūṅki ham us ke farzand haiṅ is lie ham wāris haiṅ, allāh ke wāris aur masīh ke hammīrās. kyūṅki agar ham masīh ke dukh meṅ sharīk hoṅ to us ke jalāl meṅ bhī sharīk hoṅge.

¹⁸mere ḳhayāl meṅ hamārā maujūdā dukh us āne wāle jalāl kī nisbat kuchh bhī nahīṅ jo ham par zāhir hogā.

¹⁹hāṅ, tamām kāināt yih deḳhne ke lie taṛaptī hai ki allāh ke farzand zāhir ho jāeṅ,

²⁰kyūṅki kāināt allāh kī lānat ke taht ā kar fānī ho gaī hai. yih us kī apnī nahīṅ balki allāh kī marzī thī jis ne us par yih lānat bhejī. to bhī yih ummīd dilāī gaī

²¹ki ek din kāināt ko ḳhud us kī fānī hālat kī ġhulāmī se chhuṛāyā jāegā. us waqt wuh allāh ke farzandoṅ kī jalālī āzādī meṅ sharīk ho jāegī.

²²kyūṅki ham jānte haiṅ ki āj tak tamām kāināt karāhtī aur dard-e-zah meṅ taṛaptī rahtī hai.

²³na sirf kāināt balki ham ḳhud bhī andar hī andar karāhte haiṅ, go hameṅ āne wāle jalāl kā pahlā phal rūh-ul-quds kī sūrat meṅ mil chukā hai. ham karāhte karāhte shiddat se is intizār meṅ haiṅ ki yih bāt zāhir ho jāe ki ham allāh ke farzand haiṅ aur hamāre badanoṅ ko najāt mile.

²⁴kyūṅki najāt pāte waqt hameṅ yih ummīd dilāī gaī. lekin agar wuh kuchh nazar ā chukā hotā jis kī ummīd ham rakhte to yih darhaqīqat ummīd na hotī. kaun us kī ummīd rakhe jo use nazar ā chukā hai?

²⁵lekin chūṅki ham us kī ummīd rakhte haiṅ jo abhī nazar nahīṅ āyā to lāzim hai ki ham sabar se us kā intizār kareṅ.

²⁶isī tarah rūh-ul-quds bhī hamārī kamzor hālat meṅ hamārī madad kartā hai, kyūṅki ham nahīṅ jānte ki kis tarah munāsib duā māṅgeṅ. lekin rūh-ul-quds ḳhud nāqābil-e-bayān āheṅ bharte hue hamārī shafā'at kartā hai.

²⁷aur ḳhudā bāp jo tamām diloṅ kī tahqīq kartā hai rūh-ul-quds kī soch ko jāntā hai, kyūṅki pāk rūh allāh kī marzī ke mutābiq muqaddasīn kī shafā'at kartā hai.

²⁸aur ham jānte haiṅ ki jo allāh se muhabbat rakhte haiṅ un ke lie sab kuchh mil kar bhalāī kā bāis bantā hai, un ke lie jo us ke irāde ke mutābiq bulāe gae haiṅ.

²⁹kyūṅki allāh ne pahle se apne logoṅ ko chun liyā, us ne pahle se unheṅ is ke lie muqarrar kiyā ki wuh us ke farzand ke hamshakl ban jāeṅ aur yūṅ masīh bahut se bhāiyoṅ meṅ pahlauṭhā ho.

³⁰lekin jinheṅ us ne pahle se muqarrar kiyā unheṅ us ne bulāyā bhī, jinheṅ us ne bulāyā unheṅ us ne rāstbāz bhī ṭhahrāyā aur jinheṅ us ne rāstbāz ṭhahrāyā unheṅ us ne jalāl bhī baḳhshā.

³¹in tamām bātoṅ ke jawāb meṅ ham kyā kaheṅ? agar allāh hamāre haq meṅ hai to kaun hamāre ḳhilāf ho saktā hai?

³²us ne apne farzand ko bhī dareġh na kiyā balki use ham sab ke lie dushman ke hawāle kar diyā. jis ne hameṅ apne farzand ko de diyā kyā wuh hameṅ us ke sāth sab kuchh muft nahīṅ degā?

³³ab kaun allāh ke chune hue logoṅ par ilzām lagāegā jab allāh ḳhud unheṅ rāstbāz qarār detā hai?

³⁴kaun hameṅ mujrim ṭhahrāegā jab masīh īsā ne hamāre lie apnī jān dī? balki hamārī ḳhātir is se bhī zyādā huā. use zindā kiyā gayā aur wuh allāh ke dahne hāth baiṭh gayā, jahāṅ wuh hamārī shafā'at kartā hai.

³⁵ġharz kaun hameṅ masīh kī muhabbat se judā karegā? kyā koī musībat, tangī, īzārasānī, kāl, nangāpan, ḳhatrā yā talwār?

³⁶jaise kalām-e-muqaddas meṅ likhā hai, “terī ḳhātir hameṅ din bhar maut kā sāmnā karnā paṛtā hai, log hameṅ zabah hone wālī bheṛoṅ ke barābar samajhte haiṅ.”

³⁷koī bāt nahīṅ, kyūṅki masīh hamāre sāth hai aur ham se muhabbat rakhtā hai. us ke wasīle se ham in sab ḳhatroṅ ke rū-ba-rū zabardast fath pāte haiṅ.

³⁸kyūṅki mujhe yaqīn hai ki hameṅ us kī muhabbat se koī chīz judā nahīṅ kar saktī: na maut aur na zindagī, na farishte aur na hukmrān, na hāl aur na mustaqbil, na tāqateṅ,

³⁹na nasheb aur na farāz, na koī aur maḳhlūq hameṅ allāh kī us muhabbat se judā kar sakegī jo hameṅ hamāre ḳhudāwand masīh īsā meṅ hāsil hai.