Read Roman Urdu Geo 1-kurinthiyoṅ 10 Bible Online

1-kurinthiyoṅ 10 - Roman Urdu Geo bible

1-kurinthiyoṅ 10

¹bhāiyo, maiṅ nahīṅ chāhtā ki āp is bāt se nāwāqif raheṅ ki hamāre bāpdādā sab bādal ke nīche the. wuh sab samundar meṅ se guzare.

²un sab ne bādal aur samundar meṅ mūsā kā baptismā liyā.

³sab ne ek hī ruhānī ḳhurāk khāī

⁴aur sab ne ek hī ruhānī pānī piyā. kyūṅki masīh ruhānī chaṭān kī sūrat meṅ un ke sāth sāth chaltā rahā aur wuhī un sab ko pānī pilātā rahā.

⁵is ke bāwujūd un meṅ se beshtar log allāh ko pasand na āe, is lie wuh registān meṅ halāk ho gae.

⁶yih sab kuchh hamārī ibrat ke lie wāqe huā tāki ham un logoṅ kī tarah burī chīzoṅ kī hawas na kareṅ.

⁷un meṅ se bāz kī tarah butparast na baneṅ, jaise muqaddas nawishtoṅ meṅ likhā hai, “log khāne-pīne ke lie baiṭh gae aur phir uṭh kar rangraliyoṅ meṅ apne dil bahlāne lage.”

⁸ham zinā bhī na kareṅ jaise un meṅ se bāz ne kiyā aur natīje meṅ ek hī din meṅ 23,000 afrād ḍher ho gae.

⁹ham ḳhudāwand kī āzmāish bhī na kareṅ jis tarah un meṅ se bāz ne kī aur natīje meṅ sāṅpoṅ se halāk hue.

¹⁰aur na buṛbuṛāeṅ jis tarah un meṅ se bāz buṛbuṛāne lage aur natīje meṅ halāk karne wāle farishte ke hāthoṅ māre gae.

¹¹yih mājare ibrat kī ḳhātir un par wāqe hue aur ham aḳhīr zamāne meṅ rahne wāloṅ kī nasīhat ke lie likhe gae.

¹²ġharz jo samajhtā hai ki wuh mazbūtī se khaṛā hai, ḳhabardār rahe ki gir na paṛe.

¹³āp sirf aisī āzmāishoṅ meṅ paṛe haiṅ jo insān ke lie ām hotī haiṅ. aur allāh wafādār hai. wuh āp ko āp kī tāqat se zyādā āzmāish meṅ nahīṅ paṛne degā. jab āp āzmāish meṅ paṛ jāeṅge to wuh us meṅ se nikalne kī rāh bhī paidā kar degā tāki āp use bardāsht kar sakeṅ.

¹⁴ġharz mere pyāro, butparastī se bhāgeṅ.

¹⁵maiṅ āp ko samajhdār jān kar bāt kar rahā hūṅ. āp ḳhud merī is bāt kā faislā kareṅ.

¹⁶jab ham ashā-e-rabbānī ke mauqe par barkat ke pyāle ko barkat de kar us meṅ se pīte haiṅ to kyā ham yūṅ masīh ke ḳhūn meṅ sharīk nahīṅ hote? aur jab ham roṭī toṛ kar khāte haiṅ to kyā masīh ke badan meṅ sharīk nahīṅ hote?

¹⁷roṭī to ek hī hai, is lie ham jo bahut se haiṅ ek hī badan haiṅ, kyūṅki ham sab ek hī roṭī meṅ sharīk hote haiṅ.

¹⁸banī isrāīl par ġhaur kareṅ. kyā bait-ul-muqaddas meṅ qurbāniyāṅ khāne wāle qurbāngāh kī rifāqat meṅ sharīk nahīṅ hote?

¹⁹kyā maiṅ yih kahnā chāhtā hūṅ ki butoṅ ke chaṛhāwe kī koī haisiyat hai? yā ki but kī koī haisiyat hai? hargiz nahīṅ.

²⁰maiṅ yih kahtā hūṅ ki jo qurbāniyāṅ wuh guzarāṅte haiṅ allāh ko nahīṅ balki shayātīn ko guzarāṅte haiṅ. aur maiṅ nahīṅ chāhtā ki āp shayātīn kī rifāqat meṅ sharīk hoṅ.

²¹āp ḳhudāwand ke pyāle aur sāth hī shayātīn ke pyāle se nahīṅ pī sakte. āp ḳhudāwand ke rifāqatī khāne aur sāth hī shayātīn ke rifāqatī khāne meṅ sharīk nahīṅ ho sakte.

²²yā kyā ham allāh kī ġhairat ko uksānā chāhte haiṅ? kyā ham us se tāqatwar haiṅ?

²³sab kuchh rawā to hai, lekin sab kuchh mufīd nahīṅ. sab kuchh jāiz to hai, lekin sab kuchh hamārī tāmīr-o-taraqqī kā bāis nahīṅ hotā.

²⁴har koī apne hī fāide kī talāsh meṅ na rahe balki dūsre ke.

²⁵bāzār meṅ jo kuchh biktā hai use khāeṅ aur apne zamīr ko mutma'in karne kī ḳhātir pūchh-gachh na kareṅ,

²⁶kyūṅki “zamīn aur jo kuchh us par hai rab kā hai.”

²⁷agar koī ġhairīmāndār āp kī dāwat kare aur āp us dāwat ko qabūl kar leṅ to āp ke sāmne jo kuchh bhī rakhā jāe use khāeṅ. apne zamīr ke itmīnān ke lie taftīsh na kareṅ.

²⁸lekin agar koī āp ko batā de, “yih butoṅ kā chaṛhāwā hai” to phir us shaḳhs kī ḳhātir jis ne āp ko āgāh kiyā hai aur zamīr kī ḳhātir use na khāeṅ.

²⁹matlab hai apne zamīr kī ḳhātir nahīṅ balki dūsre ke zamīr kī ḳhātir. kyūṅki yih kis tarah ho saktā hai ki kisī dūsre kā zamīr merī āzādī ke bāre meṅ faislā kare?

³⁰agar maiṅ ḳhudā kā shukr karke kisī khāne meṅ sharīk hotā hūṅ to phir mujhe kyūṅ burā kahā jāe? maiṅ to use ḳhudā kā shukr karke khātā hūṅ.

³¹chunāṅche sab kuchh allāh ke jalāl kī ḳhātir kareṅ, ḳhwāh āp khāeṅ, pieṅ yā aur kuchh kareṅ.

³²kisī ke lie ṭhokar kā bāis na baneṅ, na yahūdiyoṅ ke lie, na yūnāniyoṅ ke lie aur na allāh kī jamā'at ke lie.

³³isī tarah maiṅ bhī sab ko pasand āne kī har mumkin koshish kartā hūṅ. maiṅ apne hī fāide ke ḳhayāl meṅ nahīṅ rahtā balki dūsroṅ ke tāki bahutere najāt pāeṅ.