Read Roman Urdu Geo 1-kurinthiyoṅ 12 Bible Online

1-kurinthiyoṅ 12 - Roman Urdu Geo bible

1-kurinthiyoṅ 12

¹bhāiyo, maiṅ nahīṅ chāhtā ki āp ruhānī nematoṅ ke bāre meṅ nāwāqif raheṅ.

²āp jānte haiṅ ki īmān lāne se peshtar āp ko bār bār bahkāyā aur gūṅge butoṅ kī taraf khaiṅchā jātā thā.

³isī ke pesh-e-nazar maiṅ āp ko āgāh kartā hūṅ ki allāh ke rūh kī hidāyat se bolne wālā kabhī nahīṅ kahegā, “īsā par lānat.” aur rūh-ul-quds kī hidāyat se bolne wāle ke siwā koī nahīṅ kahegā, “īsā ḳhudāwand hai.”

⁴go tarah tarah kī nemateṅ hotī haiṅ, lekin rūh ek hī hai.

⁵tarah tarah kī ḳhidmateṅ hotī haiṅ, lekin ḳhudāwand ek hī hai.

⁶allāh apnī qudrat kā izhār muḳhtalif andāz se kartā hai, lekin ḳhudā ek hī hai jo sab meṅ har tarah kā kām kartā hai.

⁷ham meṅ se har ek meṅ rūh-ul-quds kā izhār kisī nemat se hotā hai. yih nemateṅ is lie dī jātī haiṅ tāki ham ek dūsre kī madad kareṅ.

⁸ek ko rūh-ul-quds hikmat kā kalām atā kartā hai, dūsre ko wuhī rūh ilm-o-irfān kā kalām.

⁹tīsre ko wuhī rūh puḳhtā īmān detā hai aur chauthe ko wuhī ek rūh shifā dene kī nemateṅ.

¹⁰wuh ek ko mojize karne kī tāqat detā hai, dūsre ko nabuwwat karne kī salāhiyat aur tīsre ko muḳhtalif rūhoṅ meṅ imtiyāz karne kī nemat. ek ko us se ġhairzabāneṅ bolne kī nemat miltī hai aur dūsre ko in kā tarjumā karne kī.

¹¹wuhī ek rūh yih tamām nemateṅ taqsīm kartā hai. aur wuhī faislā kartā hai ki kis ko kyā nemat milnī hai.

¹²insānī jism ke bahut se āzā hote haiṅ, lekin yih tamām āzā ek hī badan ko tashkīl dete haiṅ. masīh kā badan bhī aisā hai.

¹³ḳhwāh ham yahūdī the yā yūnānī, ġhulām the yā āzād, baptisme se ham sab ko ek hī rūh kī mārifat ek hī badan meṅ shāmil kiyā gayā hai, ham sab ko ek hī rūh pilāyā gayā hai.

¹⁴badan ke bahut se hisse hote haiṅ, na sirf ek.

¹⁵farz kareṅ ki pāoṅ kahe, “maiṅ hāth nahīṅ hūṅ is lie badan kā hissā nahīṅ.” kyā yih kahne par us kā badan se tālluq ḳhatm ho jāegā?

¹⁶yā farz kareṅ ki kān kahe, “maiṅ āṅkh nahīṅ hūṅ is lie badan kā hissā nahīṅ.” kyā yih kahne par us kā badan se nātā ṭūṭ jāegā?

¹⁷agar pūrā jism āṅkh hī hotā to phir sunane kī salāhiyat kahāṅ hotī? agar sārā badan kān hī hotā to phir sūṅghne kā kyā bantā?

¹⁸lekin allāh ne jism ke muḳhtalif āzā banā kar har ek ko wahāṅ lagāyā jahāṅ wuh chāhtā thā.

¹⁹agar ek hī azu pūrā jism hotā to phir yih kis qism kā jism hotā?

²⁰nahīṅ, bahut se āzā hote haiṅ, lekin jism ek hī hai.

²¹āṅkh hāth se nahīṅ kah saktī, “mujhe terī zarūrat nahīṅ,” na sar pāoṅ se kah saktā hai, “mujhe tumhārī zarūrat nahīṅ.”

²²balki agar dekhā jāe to aksar aisā hotā hai ki jism ke jo āzā zyādā kamzor lagte haiṅ un kī zyādā zarūrat hotī hai.

²³wuh āzā jinheṅ ham kam izzat ke lāiq samajhte haiṅ unheṅ ham zyādā izzat ke sāth ḍhāṅp lete haiṅ, aur wuh āzā jinheṅ ham sharm se chhupā kar rakhte haiṅ un hī kā ham zyādā ehtirām karte haiṅ.

²⁴is ke baraks hamāre izzatdār āzā ko is kī zarūrat hī nahīṅ hotī ki ham un kā ḳhās ehtirām kareṅ. lekin allāh ne jism ko is tarah tartīb diyā ki us ne kamqadar āzā ko zyādā izzatdār ṭhahrāyā,

²⁵tāki jism ke āzā meṅ tafriqā na ho balki wuh ek dūsre kī fikr kareṅ.

²⁶agar ek azu dukh meṅ ho to us ke sāth dīgar tamām āzā bhī dukh mahsūs karte haiṅ. agar ek azu sarfarāz ho jāe to us ke sāth bāqī tamām āzā bhī masrūr hote haiṅ.

²⁷āp sab mil kar masīh kā badan haiṅ aur infirādī taur par us ke muḳhtalif āzā.

²⁸aur allāh ne apnī jamā'at meṅ pahle rasūl, dūsre nabī aur tīsre ustād muqarrar kie haiṅ. phir us ne aise log bhī muqarrar kie haiṅ jo mojize karte, shifā dete, dūsroṅ kī madad karte, intizām chalāte aur muḳhtalif qism kī ġhairzabāneṅ bolte haiṅ.

²⁹kyā sab rasūl haiṅ? kyā sab nabī haiṅ? kyā sab ustād haiṅ? kyā sab mojize karte haiṅ?

³⁰kyā sab ko shifā dene kī nemateṅ hāsil haiṅ? kyā sab ġhairzabāneṅ bolte haiṅ? kyā sab in kā tarjumā karte haiṅ?

³¹lekin āp un nematoṅ kī talāsh meṅ raheṅ jo afzal haiṅ. ab maiṅ āp ko is se kahīṅ umdā rāh batātā hūṅ.