Read Roman Urdu Geo 1-kurinthiyoṅ 13 Bible Online

1-kurinthiyoṅ 13 - Roman Urdu Geo bible

1-kurinthiyoṅ 13

¹agar maiṅ insānoṅ aur farishtoṅ kī zabāneṅ bolūṅ, lekin muhabbat na rakhūṅ to phir maiṅ bas gūṅjtā huā ghaṛiyāl yā ṭanṭanātī huī jhāṅjh hī hūṅ.

²agar merī nabuwwat kī nemat ho aur mujhe tamām bhedoṅ aur har ilm se wāqifiyat ho, sāth hī merā aisā īmān ho ki pahāṛoṅ ko khiskā sakūṅ, lekin merā dil muhabbat se ḳhālī ho to maiṅ kuchh bhī nahīṅ.

³agar maiṅ apnā sārā māl ġharīboṅ meṅ taqsīm kar dūṅ balki apnā badan jalāe jāne ke lie de dūṅ, lekin merā dil muhabbat se ḳhālī ho to mujhe kuchh fāidā nahīṅ.

⁴muhabbat sabar se kām letī hai, muhabbat mehrbān hai. na yih hasad kartī hai na ḍīṅgeṅ mārtī hai. yih phūltī bhī nahīṅ.

⁵muhabbat badtamīzī nahīṅ kartī na apne hī fāide kī talāsh meṅ rahtī hai. yih jaldī se ġhusse meṅ nahīṅ ā jātī aur dūsroṅ kī ġhaltiyoṅ kā rikārḍ nahīṅ rakhtī.

⁶yih nāinsāfī dekh kar ḳhush nahīṅ hotī balki sachchāī ke ġhālib āne par hī ḳhushī manātī hai.

⁷yih hameshā dūsroṅ kī kamzoriyāṅ bardāsht kartī hai, hameshā etimād kartī hai, hameshā ummīd rakhtī hai, hameshā sābitqadam rahtī hai.

⁸muhabbat kabhī ḳhatm nahīṅ hotī. is ke muqābale meṅ nabuwwateṅ ḳhatm ho jāeṅgī, ġhairzabāneṅ jātī raheṅgī, ilm miṭ jāegā.

⁹kyūṅki is waqt hamārā ilm nāmukammal hai aur hamārī nabuwwat sab kuchh zāhir nahīṅ kartī.

¹⁰lekin jab wuh kuchh āegā jo kāmil hai to yih adhūrī chīzeṅ jātī raheṅgī.

¹¹jab maiṅ bachchā thā to bachche kī tarah boltā, bachche kī sī soch rakhtā aur bachche kī sī samajh se kām letā thā. lekin ab maiṅ bāliġh hūṅ, is lie maiṅ ne bachche kā sā andāz chhoṛ diyā hai.

¹²is waqt hameṅ āīne meṅ dhundlā sā dikhāī detā hai, lekin us waqt ham rū-ba-rū dekheṅge. ab maiṅ juzwī taur par jāntā hūṅ, lekin us waqt kāmil taur se jān lūṅgā, aise hī jaise allāh ne mujhe pahle se jān liyā hai.

¹³ġharz īmān, ummīd aur muhabbat tīnoṅ qāim rahte haiṅ, lekin in meṅ afzal muhabbat hai.