Read Roman Urdu Geo 1-kurinthiyoṅ 14 Bible Online

1-kurinthiyoṅ 14 - Roman Urdu Geo bible

1-kurinthiyoṅ 14

¹muhabbat kā dāman thāme rakheṅ. lekin sāth hī ruhānī nematoṅ ko sargarmī se istemāl meṅ lāeṅ, ḳhusūsan nabuwwat kī nemat ko.

²ġhairzabān bolne wālā logoṅ se nahīṅ balki allāh se bāt kartā hai. koī us kī bāt nahīṅ samajhtā kyūṅki wuh rūh meṅ bhed kī bāteṅ kartā hai.

³is ke baraks nabuwwat karne wālā logoṅ se aisī bāteṅ kartā hai jo un kī tāmīr-o-taraqqī, hauslā-afzāī aur tasallī kā bāis bantī haiṅ.

⁴ġhairzabān bolne wālā apnī tāmīr-o-taraqqī kartā hai jabki nabuwwat karne wālā jamā'at kī.

⁵maiṅ chāhtā hūṅ ki āp sab ġhairzabāneṅ boleṅ, lekin is se zyādā yih ḳhwāhish rakhtā hūṅ ki āp nabuwwat kareṅ. nabuwwat karne wālā ġhairzabāneṅ bolne wāle se aham hai. hāṅ, ġhairzabāneṅ bolne wālā bhī aham hai basharteki apnī zabān kā tarjumā kare, kyūṅki is se ḳhudā kī jamā'at kī tāmīr-o-taraqqī hotī hai.

⁶bhāiyo, agar maiṅ āp ke pās ā kar ġhairzabāneṅ bolūṅ, lekin mukāshafe, ilm, nabuwwat aur tālīm kī koī bāt na karūṅ to āp ko kyā fāidā hogā?

⁷bejān sāzoṅ par ġhaur karne se bhī yihī bāt sāmne ātī hai. agar bāṅsrī yā sarod ko kisī ḳhās sur ke mutābiq na bajāyā jāe to phir sunane wāle kis tarah pahchān sakeṅge ki in par kyā kyā pesh kiyā jā rahā hai?

⁸isī tarah agar bigul kī āwāz jang ke lie tayyār ho jāne ke lie sāf taur se na baje to kyā faujī kamarbastā ho jāeṅge?

⁹agar āp sāf sāf bāt na kareṅ to āp kī hālat bhī aisī hī hogī. phir āp kī bāt kaun samjhegā? kyūṅki āp logoṅ se nahīṅ balki hawā se bāteṅ kareṅge.

¹⁰is duniyā meṅ bahut zyādā zabāneṅ bolī jātī haiṅ aur in meṅ se koī bhī nahīṅ jo bemānī ho.

¹¹agar maiṅ kisī zabān se wāqif nahīṅ to maiṅ us zabān meṅ bolne wāle ke nazdīk ajnabī ṭhahrūṅga aur wuh mere nazdīk.

¹²yih usūl āp par bhī lāgū hotā hai. chūṅki āp ruhānī nematoṅ ke lie taṛapte haiṅ to phir ḳhāskar un nematoṅ meṅ māhir banane kī koshish kareṅ jo ḳhudā kī jamā'at ko tāmīr kartī haiṅ.

¹³chunāṅche ġhairzabān bolne wālā duā kare ki is kā tarjumā bhī kar sake.

¹⁴kyūṅki agar maiṅ ġhairzabān meṅ duā karūṅ to merī rūh to duā kartī hai magar merī aql beamal rahtī hai.

¹⁵to phir kyā karūṅ? maiṅ rūh meṅ duā karūṅga, lekin aql ko bhī istemāl karūṅga. maiṅ rūh meṅ hamd-o-sanā karūṅga, lekin aql ko bhī istemāl meṅ lāūṅgā.

¹⁶agar āp sirf rūh meṅ hamd-o-sanā kareṅ to hāzirīn meṅ se jo āp kī bāt nahīṅ samajhtā wuh kis tarah āp kī shukrguzārī par “āmīn” kah sakegā? use to āp kī bātoṅ kī samajh hī nahīṅ āī.

¹⁷beshak āp achchhī tarah ḳhudā kā shukr kar rahe hoṅge, lekin is se dūsre shaḳhs kī tāmīr-o-taraqqī nahīṅ hogī.

¹⁸maiṅ ḳhudā kā shukr kartā hūṅ ki āp sab kī nisbat zyādā ġhairzabānoṅ meṅ bāt kartā hūṅ.

¹⁹phir bhī maiṅ ḳhudā kī jamā'at meṅ aisī bāteṅ pesh karnā chāhtā hūṅ jo dūsre samajh sakeṅ aur jin se wuh tarbiyat hāsil kar sakeṅ. kyūṅki ġhairzabānoṅ meṅ bolī gaī beshumār bātoṅ kī nisbat pāṅch tarbiyat dene wāle alfāz kahīṅ behtar haiṅ.

²⁰bhāiyo, bachchoṅ jaisī soch se bāz āeṅ. burāī ke lihāz se to zarūr bachche bane raheṅ, lekin samajh meṅ bāliġh ban jāeṅ.

²¹sharīat meṅ likhā hai, “rab farmātā hai ki maiṅ ġhairzabānoṅ aur ajnabiyoṅ ke hoṅṭoṅ kī mārifat is qaum se bāt karūṅga. lekin wuh phir bhī merī nahīṅ suneṅge.”

²²is se zāhir hotā hai ki ġhairzabāneṅ īmāndāroṅ ke lie imtiyāzī nishān nahīṅ hotīṅ balki ġhairīmāndāroṅ ke lie. is ke baraks nabuwwat ġhairīmāndāroṅ ke lie imtiyāzī nishān nahīṅ hotī balki īmāndāroṅ ke lie.

²³ab farz kareṅ ki īmāndār ek jagah jamā haiṅ aur tamām hāzirīn ġhairzabāneṅ bol rahe haiṅ. isī asnā meṅ ġhairzabān ko na samajhne wāle yā ġhairīmāndār ā shāmil hote haiṅ. āp ko is hālat meṅ dekh kar kyā wuh āp ko dīwānā qarār nahīṅ deṅge?

²⁴is ke muqābale meṅ agar tamām log nabuwwat kar rahe hoṅ aur koī ġhairīmāndār andar āe to kyā hogā? wuh sab use qāil kar leṅge ki gunāhgār hai aur sab use parakh leṅge.

²⁵yūṅ us ke dil kī poshīdā bāteṅ zāhir ho jāeṅgī, wuh gir kar allāh ko sijdā karegā aur taslīm karegā ki filhaqīqat allāh āp ke darmiyān maujūd hai.

²⁶bhāiyo, phir kyā honā chāhie? jab āp jamā hote haiṅ to har ek ke pās koī gīt yā tālīm yā mukāshafā yā ġhairzabān yā is kā tarjumā ho. in sab kā maqsad ḳhudā kī jamā'at kī tāmīr-o-taraqqī ho.

²⁷ġhairzabān meṅ bolte waqt sirf do yā zyādā se zyādā tīn ashḳhās boleṅ aur wuh bhī bārī bārī. sāth hī koī un kā tarjumā bhī kare.

²⁸agar koī tarjumā karne wālā na ho to ġhairzabān bolne wālā jamā'at meṅ ḳhāmosh rahe, albattā use apne āp se aur allāh se bāt karne kī āzādī hai.

²⁹nabiyoṅ meṅ se do yā tīn nabuwwat kareṅ aur dūsre un kī bātoṅ kī sehhat ko parkheṅ.

³⁰agar is daurān kisī baiṭhe hue shaḳhs ko koī mukāshafā mile to pahlā shaḳhs ḳhāmosh ho jāe.

³¹kyūṅki āp sab bārī bārī nabuwwat kar sakte haiṅ tāki tamām log sīkheṅ aur un kī hauslā-afzāī ho.

³²nabiyoṅ kī rūh nabiyoṅ ke tābe rahtī haiṅ,

³³kyūṅki allāh betartībī kā nahīṅ balki salāmatī kā ḳhudā hai. jaisā muqaddasīn kī tamām jamā'atoṅ kā dastūr hai

³⁴ḳhawātīn jamā'at meṅ ḳhāmosh raheṅ. unheṅ bolne kī ijāzat nahīṅ, balki wuh farmāṅbardār raheṅ. sharīat bhī yihī farmātī hai.

³⁵agar wuh kuchh sīkhnā chāheṅ to apne ghar par apne shauhar se pūchh leṅ, kyūṅki aurat kā ḳhudā kī jamā'at meṅ bolnā sharm kī bāt hai.

³⁶kyā allāh kā kalām āp meṅ se niklā hai, yā kyā wuh sirf āp hī tak pahuṅchā hai?

³⁷agar koī ḳhayāl kare ki maiṅ nabī hūṅ yā ḳhās ruhānī haisiyat rakhtā hūṅ to wuh jān le ki jo kuchh maiṅ āp ko likh rahā hūṅ wuh ḳhudāwand kā hukm hai.

³⁸jo yih nazarandāz kartā hai use ḳhud bhī nazarandāz kiyā jāegā.

³⁹ġharz bhāiyo, nabuwwat karne ke lie taṛapte raheṅ, albattā kisī ko ġhairzabāneṅ bolne se na rokeṅ.

⁴⁰lekin sab kuchh shāistagī aur tartīb se amal meṅ āe.