Read Roman Urdu Geo 1-kurinthiyoṅ 16 Bible Online

1-kurinthiyoṅ 16 - Roman Urdu Geo bible

1-kurinthiyoṅ 16

¹rahī chande kī bāt jo yarūshalam ke muqaddasīn ke lie jamā kiyā jā rahā hai to usī hidāyat par amal kareṅ jo maiṅ galatiyā kī jamā'atoṅ ko de chukā hūṅ.

²har itwār ko āp meṅ se har koī apne kamāe hue paisoṅ meṅ se kuchh is chande ke lie maḳhsūs karke apne pās rakh chhoṛe. phir mere āne par hadiyājāt jamā karne kī zarūrat nahīṅ paṛegī.

³jab maiṅ āūṅgā to aise afrād ko jo āp ke nazdīk qābil-e-etimād haiṅ ḳhutūt de kar yarūshalam bhejūṅgā tāki wuh āp kā hadiyā wahāṅ tak pahuṅchā deṅ.

⁴agar munāsib ho ki maiṅ bhī jāūṅ to wuh mere sāth jāeṅge.

⁵maiṅ makiduniyā se ho kar āp ke pās āūṅgā kyūṅki makiduniyā meṅ se safar karne kā irādā rakhtā hūṅ.

⁶shāyad āp ke pās thoṛe arse ke lie ṭhahrūṅ, lekin yih bhī mumkin hai ki sardiyoṅ kā mausam āp hī ke sāth kāṭūṅ tāki mere bād ke safar ke lie āp merī madad kar sakeṅ.

⁷maiṅ nahīṅ chāhtā ki is dafā muḳhtasar mulāqāt ke bād chaltā banūṅ, balki merī ḳhwāhish hai ki kuchh waqt āp ke sāth guzārūṅ. shart yih hai ki ḳhudāwand mujhe ijāzat de.

⁸lekin īd-e-pantikust tak maiṅ ifisus meṅ hī ṭhahrūṅga,

⁹kyūṅki yahāṅ mere sāmne muassir kām ke lie ek baṛā darwāzā khul gayā hai aur sāth hī bahut se muḳhālif bhī paidā ho gae haiṅ.

¹⁰agar tīmuthiyus āe to is kā ḳhayāl rakheṅ ki wuh bilāḳhauf āp ke pās rah sake. merī tarah wuh bhī ḳhudāwand ke khet meṅ fasal kāṭ rahā hai.

¹¹is lie koī use haqīr na jāne. use salāmatī se safar par rawānā kareṅ tāki wuh mujh tak pahuṅche, kyūṅki maiṅ aur dīgar bhāī us ke muntazir haiṅ.

¹²bhāī apullos kī maiṅ ne baṛī hauslā-afzāī kī hai ki wuh dīgar bhāiyoṅ ke sāth āp ke pās āe, lekin allāh ko qat'an manzūr na thā. tāham mauqā milne par wuh zarūr āegā.

¹³jāgte raheṅ, īmān meṅ sābitqadam raheṅ, mardānagī dikhāeṅ, mazbūt bane raheṅ.

¹⁴sab kuchh muhabbat se kareṅ.

¹⁵bhāiyo, maiṅ ek bāt meṅ āp ko nasīhat karnā chāhtā hūṅ. āp jānte haiṅ ki stifanās kā gharānā aḳhayā kā pahlā phal hai aur ki unhoṅ ne apne āp ko muqaddasīn kī ḳhidmat ke lie waqf kar rakhā hai.

¹⁶āp aise logoṅ ke tābe raheṅ aur sāth hī har us shaḳhs ke jo un ke sāth ḳhidmat ke kām meṅ jāṅfishānī kartā hai.

¹⁷stifanās, furtūnātus aur aḳhīkus ke pahuṅchne par maiṅ bahut ḳhush huā, kyūṅki unhoṅ ne wuh kamī pūrī kar dī jo āp kī ġhairhāzirī se paidā huī thī.

¹⁸unhoṅ ne merī rūh ko aur sāth hī āp kī rūh ko bhī tāzā kiyā hai. aise logoṅ kī qadar kareṅ.

¹⁹āsiyā kī jamā'ateṅ āp ko salām kahtī haiṅ. akwilā aur priskillā āp ko ḳhudāwand meṅ purjosh salām kahte haiṅ aur un ke sāth wuh jamā'at bhī jo un ke ghar meṅ jamā hotī hai.

²⁰tamām bhāī āp ko salām kahte haiṅ. ek dūsre ko muqaddas bosā dete hue salām kaheṅ.

²¹yih salām maiṅ yānī paulus apne hāth se likhtā hūṅ.

²²lānat us shaḳhs par jo ḳhudāwand se muhabbat nahīṅ rakhtā. ai hamāre ḳhudāwand, ā!

²³ḳhudāwand īsā kā fazl āp ke sāth rahe.

²⁴masīh īsā meṅ āp sab ko merā pyār.