Read Roman Urdu Geo 1-kurinthiyoṅ 2 Bible Online

1-kurinthiyoṅ 2 - Roman Urdu Geo bible

1-kurinthiyoṅ 2

¹bhāiyo, mujh par bhī ġhaur kareṅ. jab maiṅ āp ke pās āyā to maiṅ ne āp ko allāh kā bhed moṭe moṭe alfāz meṅ yā falsafiyānā hikmat kā izhār karte hue na sunāyā.

²wajah kyā thī? yih ki maiṅ ne irādā kar rakhā thā ki āp ke darmiyān hote hue maiṅ īsā masīh ke siwā aur kuchh na jānūṅ, ḳhāskar yih ki use maslūb kiyā gayā.

³hāṅ maiṅ kamzorhāl, ḳhauf khāte aur bahut thartharāte hue āp ke pās āyā.

⁴aur guftgū aur munādī karte hue maiṅ ne dunyāwī hikmat ke baṛe zordār alfāz kī mārifat āp ko qāil karne kī koshish na kī, balki rūh-ul-quds aur allāh kī qudrat ne merī bātoṅ kī tasdīq kī,

⁵tāki āp kā īmān insānī hikmat par mabnī na ho balki allāh kī qudrat par.

⁶dānāī kī bāteṅ ham us waqt karte haiṅ jab kāmil īmān rakhne wāloṅ ke darmiyān hote haiṅ. lekin yih dānāī maujūdā jahān kī nahīṅ aur na is jahān ke hākimoṅ hī kī hai jo miṭne wāle haiṅ.

⁷balki ham ḳhudā hī kī dānāī kī bāteṅ karte haiṅ jo bhed kī sūrat meṅ chhupī rahī hai. allāh ne tamām zamānoṅ se peshtar muqarrar kiyā hai ki yih dānāī hamāre jalāl kā bāis bane.

⁸is jahān ke kisī bhī hākim ne is dānāī ko na pahchānā, kyūṅki agar wuh pahchān lete to phir wuh hamāre jalālī ḳhudāwand ko maslūb na karte.

⁹dānāī ke bāre meṅ pāk nawishte bhī yihī kahte haiṅ, “jo na kisī āṅkh ne dekhā, na kisī kān ne sunā, aur na insān ke zahan meṅ āyā, use allāh ne un ke lie tayyār kar diyā jo us se muhabbat rakhte haiṅ.”

¹⁰lekin allāh ne yihī kuchh apne rūh kī mārifat ham par zāhir kiyā kyūṅki us kā rūh har chīz kā khoj lagātā hai, yahāṅ tak ki allāh kī gahrāiyoṅ kā bhī.

¹¹insān ke bātin se kaun wāqif hai siwāe insān kī rūh ke jo us ke andar hai? isī tarah allāh se tālluq rakhne wālī bātoṅ ko koī nahīṅ jāntā siwāe allāh ke rūh ke.

¹²aur hameṅ duniyā kī rūh nahīṅ milī balki wuh rūh jo allāh kī taraf se hai tāki ham us kī atākardā bātoṅ ko jān sakeṅ.

¹³yihī kuchh ham bayān karte haiṅ, lekin aise alfāz meṅ nahīṅ jo insānī hikmat se hameṅ sikhāyā gayā balki rūh-ul-quds se. yūṅ ham ruhānī haqīqatoṅ kī tashrīh ruhānī logoṅ ke lie karte haiṅ.

¹⁴jo shaḳhs ruhānī nahīṅ hai wuh allāh ke rūh kī bātoṅ ko qabūl nahīṅ kartā kyūṅki wuh us ke nazdīk bewuqūfī haiṅ. wuh unheṅ pahchān nahīṅ saktā kyūṅki un kī parakh sirf ruhānī shaḳhs hī kar saktā hai.

¹⁵wuhī har chīz parakh letā hai jabki us kī apnī parakh koī nahīṅ kar saktā.

¹⁶chunāṅche pāk kalām meṅ likhā hai, “kis ne rab kī soch ko jānā? kaun us ko tālīm degā?” lekin ham masīh kī soch rakhte haiṅ.