Read Roman Urdu Geo 1-kurinthiyoṅ 4 Bible Online

1-kurinthiyoṅ 4 - Roman Urdu Geo bible

1-kurinthiyoṅ 4

¹ġharz log hameṅ masīh ke ḳhādim samjheṅ, aise nigarān jinheṅ allāh ke bhedoṅ ko kholne kī zimmādārī dī gaī hai.

²ab nigarānoṅ kā farz yih hai ki un par pūrā etimād kiyā jā sake.

³mujhe is bāt kī zyādā fikr nahīṅ ki āp yā koī dunyāwī adālat merā ehtisāb kare, balki maiṅ ḳhud bhī apnā ehtisāb nahīṅ kartā.

⁴mujhe kisī ġhaltī kā ilm nahīṅ hai agarche yih bāt mujhe rāstbāz qarār dene ke lie kāfī nahīṅ hai. ḳhudāwand ḳhud merā ehtisāb kartā hai.

⁵is lie waqt se pahle kisī bāt kā faislā na kareṅ. us waqt tak intizār kareṅ jab tak ḳhudāwand na āe. kyūṅki wuhī tārīkī meṅ chhupī huī chīzoṅ ko raushnī meṅ lāegā aur diloṅ kī mansūbābandiyoṅ ko zāhir kar degā. us waqt allāh ḳhud har fard kī munāsib tārīf karegā.

⁶bhāiyo, maiṅ ne in bātoṅ kā itlāq apne aur apullos par kiyā tāki āp ham par ġhaur karte hue allāh ke kalām kī hudūd jān leṅ jin se tajāwuz karnā munāsib nahīṅ. phir āp phūl kar ek shaḳhs kī himāyat karke dūsre kī muḳhālafat nahīṅ kareṅge.

⁷kyūṅki kaun āp ko kisī dūsre se afzal qarār detā hai? jo kuchh āp ke pās hai kyā wuh āp ko muft nahīṅ milā? aur agar muft milā to is par sheḳhī kyūṅ mārte haiṅ goyā ki āp ne use apnī mehnat se hāsil kiyā ho?

⁸wāh jī wāh! āp ser ho chuke haiṅ. āp amīr ban chuke haiṅ. āp hamāre baġhair bādshāh ban chuke haiṅ. kāsh āp bādshāh ban chuke hote tāki ham bhī āp ke sāth hukūmat karte!

⁹is ke bajāe mujhe lagtā hai ki allāh ne hamāre lie jo us ke rasūl haiṅ romī tamāshāgāh meṅ sab se nichlā darjā muqarrar kiyā hai, jo un logoṅ ke lie maḳhsūs hotā hai jinheṅ sazā-e-maut kā faislā sunāyā gayā ho. hāṅ, ham duniyā, farishtoṅ aur insānoṅ ke sāmne tamāshā ban gae haiṅ.

¹⁰ham to masīh kī ḳhātir bewuqūf ban gae haiṅ jabki āp masīh meṅ samajhdār ḳhayāl kie jāte haiṅ. ham kamzor haiṅ jabki āp tāqatwar. āp kī izzat kī jātī hai jabki hamārī be'izzatī.

¹¹ab tak hameṅ bhūk aur pyās satātī hai. ham chīthaṛoṅ meṅ malbūs goyā nange phirte haiṅ. hameṅ mukke māre jāte haiṅ. hamārī koī mustaqil rihāishgāh nahīṅ.

¹²aur baṛī mashaqqat se ham apne hāthoṅ se rozī kamāte haiṅ. lān-tān karne wāloṅ ko ham barkat dete haiṅ, īzā dene wāloṅ ko bardāsht karte haiṅ.

¹³jo hameṅ burā-bhalā kahte haiṅ unheṅ ham duā dete haiṅ. ab tak ham duniyā kā kūṛā-karkaṭ aur ġhilāzat bane phirte haiṅ.

¹⁴maiṅ āp ko sharmindā karne ke lie yih nahīṅ likh rahā, balki apne pyāre bachche jān kar samjhāne kī ġharz se.

¹⁵beshak masīh īsā meṅ āp ke ustād to beshumār haiṅ, lekin bāp kam haiṅ. kyūṅki masīh īsā meṅ maiṅ hī āp ko allāh kī ḳhushḳhabrī sunā kar āp kā bāp banā.

¹⁶ab maiṅ tākīd kartā hūṅ ki āp mere namūne par chaleṅ.

¹⁷is lie maiṅ ne tīmuthiyus ko āp ke pās bhej diyā jo ḳhudāwand meṅ merā pyārā aur wafādār beṭā hai. wuh āp ko masīh īsā meṅ merī un hidāyāt kī yād dilāegā jo maiṅ har jagah aur īmāndāroṅ kī har jamā'at meṅ detā hūṅ.

¹⁸āp meṅ se bāz yūṅ phūl gae haiṅ jaise maiṅ ab āp ke pās kabhī nahīṅ āūṅgā.

¹⁹lekin agar ḳhudāwand kī marzī huī to jald ā kar mālūm karūṅga ki kyā yih phūle hue log sirf bāteṅ kar rahe haiṅ yā ki allāh kī qudrat un meṅ kām kar rahī hai.

²⁰kyūṅki allāh kī bādshāhī ḳhālī bātoṅ se zāhir nahīṅ hotī balki allāh kī qudrat se.

²¹kyā āp chāhte haiṅ ki maiṅ chhaṛī le kar āp ke pās āūṅ yā pyār aur halīmī kī rūh meṅ?