Read Roman Urdu Geo 1-kurinthiyoṅ 8 Bible Online

1-kurinthiyoṅ 8 - Roman Urdu Geo bible

1-kurinthiyoṅ 8

¹ab maiṅ butoṅ kī qurbānī ke bāre meṅ bāt kartā hūṅ. ham jānte haiṅ ki ham sab sāhib-e-ilm haiṅ. ilm insān ke phūlne kā bāis bantā hai jabki muhabbat us kī tāmīr kartī hai.

²jo samajhtā hai ki us ne kuchh jān liyā hai us ne ab tak us tarah nahīṅ jānā jis tarah us ko jānanā chāhie.

³lekin jo allāh se muhabbat rakhtā hai use allāh ne jān liyā hai.

⁴butoṅ kī qurbānī khāne ke zimn meṅ ham jānte haiṅ ki duniyā meṅ but koī chīz nahīṅ aur ki rab ke siwā koī aur ḳhudā nahīṅ hai.

⁵beshak āsmān-o-zamīn par kaī nām-nihād dewatā hote haiṅ, hāṅ darasl bahutere dewatāoṅ aur ḳhudāwandoṅ kī pūjā kī jātī hai.

⁶to bhī ham jānte haiṅ ki faqt ek hī ḳhudā hai, hamārā bāp jis ne sab kuchh paidā kiyā hai aur jis ke lie ham zindagī guzārte haiṅ. aur ek hī ḳhudāwand hai yānī īsā masīh jis ke wasīle se sab kuchh wujūd meṅ āyā hai aur jis se hameṅ zindagī hāsil hai.

⁷lekin har kisī ko is kā ilm nahīṅ. bāz īmāndār to ab tak yih sochne ke ādī haiṅ ki but kā wujūd hai. is lie jab wuh kisī but kī qurbānī kā gosht khāte haiṅ to wuh samajhte haiṅ ki ham aisā karne se us but kī pūjā kar rahe haiṅ. yūṅ un kā zamīr kamzor hone kī wajah se ālūdā ho jātā hai.

⁸haqīqat to yih hai ki hamārā allāh ko pasand ānā is bāt par mabnī nahīṅ ki ham kyā khāte haiṅ aur kyā nahīṅ khāte. na parhez karne se hameṅ koī nuqsān pahuṅchtā hai aur na khā lene se koī fāidā.

⁹lekin ḳhabardār raheṅ ki āp kī yih āzādī kamzoroṅ ke lie ṭhokar kā bāis na bane.

¹⁰kyūṅki agar koī kamzorzamīr shaḳhs āp ko butḳhāne meṅ khānā khāte hue dekhe to kyā use us ke zamīr ke ḳhilāf butoṅ kī qurbāniyāṅ khāne par ubhārā nahīṅ jāegā?

¹¹is tarah āp kā kamzor bhāī jis kī ḳhātir masīh qurbān huā āp ke ilm-o-irfān kī wajah se halāk ho jāegā.

¹²jab āp is tarah apne bhāiyoṅ kā gunāh karte aur un ke kamzor zamīr ko majrūh karte haiṅ to āp masīh kā hī gunāh karte haiṅ.

¹³is lie agar aisā khānā mere bhāī ko sahīh rāh se bhaṭkāne kā bāis bane to maiṅ kabhī gosht nahīṅ khāūṅgā tāki apne bhāī kī gumrāhī kā bāis na banūṅ.