Read Roman Urdu Geo 2-kurinthiyoṅ 10 Bible Online

2-kurinthiyoṅ 10 - Roman Urdu Geo bible

2-kurinthiyoṅ 10

¹maiṅ āp se apīl kartā hūṅ, maiṅ paulus jis ke bāre meṅ kahā jātā hai ki maiṅ āp ke rū-ba-rū ājiz hotā hūṅ aur sirf āp se dūr ho kar diler hotā hūṅ. masīh kī halīmī aur narmī ke nām meṅ

²maiṅ āp se minnat kartā hūṅ ki mujhe āp ke pās ā kar itnī dilerī se un logoṅ se nipaṭnā na paṛe jo samajhte haiṅ ki hamārā chāl-chalan dunyāwī hai. kyūṅki filhāl aisā lagtā hai ki is kī zarūrat hogī.

³beshak ham insān hī haiṅ, lekin ham duniyā kī tarah jang nahīṅ laṛte.

⁴aur jo hathiyār ham is jang meṅ istemāl karte haiṅ wuh is duniyā ke nahīṅ haiṅ, balki unheṅ allāh kī taraf se qile ḍhā dene kī quwwat hāsil hai. in se ham ġhalat ḳhayālāt ke ḍhāṅche

⁵aur har ūṅchī chīz ḍhā dete haiṅ jo allāh ke ilm-o-irfān ke ḳhilāf khaṛī ho jātī hai. aur ham har ḳhayāl ko qaid karke masīh ke tābe kar dete haiṅ.

⁶hāṅ, āp ke pūre taur par tābe ho jāne par ham har nāfarmānī kī sazā dene ke lie tayyār hoṅge.

⁷āp sirf zāhirī bātoṅ par ġhaur kar rahe haiṅ. agar kisī ko is bāt kā etimād ho ki wuh masīh kā hai to wuh is kā bhī ḳhayāl kare ki ham bhī usī kī tarah masīh ke haiṅ.

⁸kyūṅki agar maiṅ us iḳhtiyār par mazīd faḳhr bhī karūṅ jo ḳhudāwand ne hameṅ diyā hai to bhī maiṅ sharmindā nahīṅ hūṅgā. ġhaur kareṅ ki us ne hameṅ āp ko ḍhā dene kā nahīṅ balki āp kī ruhānī tāmīr karne kā iḳhtiyār diyā hai.

⁹maiṅ nahīṅ chāhtā ki aisā lage jaise maiṅ āp ko apne ḳhatoṅ se ḍarāne kī koshish kar rahā hūṅ.

¹⁰kyūṅki bāz kahte haiṅ, “paulus ke ḳhat zordār aur zabardast haiṅ, lekin jab wuh ḳhud hāzir hotā hai to wuh kamzor aur us ke bolne kā tarz hiqāratāmez hai.”

¹¹aise log is bāt kā ḳhayāl kareṅ ki jo bāteṅ ham āp se dūr hote hue apne ḳhatoṅ meṅ pesh karte haiṅ un hī bātoṅ par ham amal kareṅge jab āp ke pās āeṅge.

¹²ham to apne āp ko un meṅ shumār nahīṅ karte jo apnī tārīf karke apnī sifārish karte rahte haiṅ, na apnā un ke sāth muwāzanā karte haiṅ. wuh kitne besamajh haiṅ jab wuh apne āp ko meyār banā kar usī par apne āp ko jāṅchte haiṅ aur apnā muwāzanā apne āp se karte haiṅ.

¹³lekin ham munāsib had se zyādā faḳhr nahīṅ kareṅge balki sirf us had tak jo allāh ne hamāre lie muqarrar kiyā hai. aur āp bhī is had ke andar ā jāte haiṅ.

¹⁴is meṅ ham munāsib had se zyādā faḳhr nahīṅ kar rahe, kyūṅki ham to masīh kī ḳhushḳhabrī le kar āp tak pahuṅch gae haiṅ. agar aisā na hotā to phir aur bāt hotī.

¹⁵ham aise kām par faḳhr nahīṅ karte jo dūsroṅ kī mehnat se saranjām diyā gayā hai. is meṅ bhī ham munāsib haddoṅ ke andar rahte haiṅ, balki ham yih ummīd rakhte haiṅ ki āp kā īmān baṛh jāe aur yūṅ hamārī qadar-o-qīmat bhī allāh kī muqarrarā had tak baṛh jāe. ḳhudā kare ki āp meṅ hamārā yih kām itnā baṛh jāe

¹⁶ki ham allāh kī ḳhushḳhabrī āp se āge jā kar bhī sunā sakeṅ. kyūṅki ham us kām par faḳhr nahīṅ karnā chāhte jise dūsre kar chuke haiṅ.

¹⁷kalām-e-muqaddas meṅ likhā hai, “faḳhr karne wālā ḳhudāwand hī par faḳhr kare.”

¹⁸jab log apnī tārīf karke apnī sifārish karte haiṅ to is meṅ kyā hai! is se wuh sahīh sābit nahīṅ hote, balki aham bāt yih hai ki ḳhudāwand hī is kī tasdīq kare.