Read Roman Urdu Geo 2-kurinthiyoṅ 11 Bible Online

2-kurinthiyoṅ 11 - Roman Urdu Geo bible

2-kurinthiyoṅ 11

¹ḳhudā kare ki jab maiṅ apnī hamāqat kā kuchh izhār kartā hūṅ to āp mujhe bardāsht kareṅ. hāṅ, zarūr mujhe bardāsht kareṅ,

²kyūṅki maiṅ āp ke lie allāh kī sī ġhairat rakhtā hūṅ. maiṅ ne āp kā rishtā ek hī mard ke sāth bāndhā, aur maiṅ āp ko pākdāman kuṅwārī kī haisiyat se us mard masīh ke huzūr pesh karnā chāhtā thā.

³lekin afsos, mujhe ḍar hai ki āp hawwā kī tarah gunāh meṅ gir jāeṅge, ki jis tarah sāṅp ne apnī chālākī se hawwā ko dhokā diyā usī tarah āp kī soch bhī bigaṛ jāegī aur wuh ḳhulūsdilī aur pāk lagan ḳhatm ho jāegī jo āp masīh ke lie mahsūs karte haiṅ.

⁴kyūṅki āp ḳhushī se har ek ko bardāsht karte haiṅ jo āp ke pās ā kar ek farq qism kā īsā pesh kartā hai, ek aisā īsā jo ham ne āp ko pesh nahīṅ kiyā thā. aur āp ek aisī rūh aur aisī “ḳhushḳhabrī” qabūl karte haiṅ jo us rūh aur ḳhushḳhabrī se bilkul farq hai jo āp ko ham se milī thī.

⁵merā nahīṅ ḳhayāl ki maiṅ in nām-nihād ‘ḳhās’ rasūloṅ kī nisbat kam hūṅ.

⁶ho saktā hai ki maiṅ bolne meṅ māhir nahīṅ hūṅ, lekin yih mere ilm ke bāre meṅ nahīṅ kahā jā saktā. yih ham ne āp ko sāf sāf aur har lihāz se dikhāyā hai.

⁷maiṅ ne allāh kī ḳhushḳhabrī sunāne ke lie āp se koī bhī muāwazā na liyā. yūṅ maiṅ ne apne āp ko nīchā kar diyā tāki āp ko sarfarāz kar diyā jāe. kyā is meṅ mujh se ġhaltī huī?

⁸jab maiṅ āp kī ḳhidmat kar rahā thā to mujhe ḳhudā kī dīgar jamā'atoṅ se paise mil rahe the, yānī āp kī madad karne ke lie maiṅ unheṅ lūṭ rahā thā.

⁹aur jab maiṅ āp ke pās thā aur zarūratmand thā to maiṅ kisī par bojh na banā, kyūṅki jo bhāī makiduniyā se āe unhoṅ ne merī zarūriyāt pūrī kīṅ. māzī meṅ maiṅ āp par bojh na banā aur āindā bhī nahīṅ banūṅgā.

¹⁰masīh kī us sachchāī kī qasam jo mere andar hai, aḳhayā ke pūre sūbe meṅ koī mujhe is par faḳhr karne se nahīṅ rokegā.

¹¹maiṅ yih kyūṅ kah rahā hūṅ? is lie ki maiṅ āp se muhabbat nahīṅ rakhtā? ḳhudā hī jāntā hai ki maiṅ āp se muhabbat rakhtā hūṅ.

¹²aur jo kuchh maiṅ ab kar rahā hūṅ wuhī kartā rahūṅgā, tāki maiṅ nām-nihād rasūloṅ ko wuh mauqā na dūṅ jo wuh ḍhūnḍ rahe haiṅ. kyūṅki yihī un kā maqsad hai ki wuh faḳhr karke yih kah sakeṅ ki wuh ham jaise haiṅ.

¹³aise log to jhūṭe rasūl haiṅ, dhokebāz mazdūr jinhoṅ ne masīh ke rasūloṅ kā rūp dhār liyā hai.

¹⁴aur kyā ajab, kyūṅki iblīs bhī nūr ke farishte kā rūp dhār kar ghūmtā phirtā hai.

¹⁵to phir yih baṛī bāt nahīṅ ki us ke chele rāstbāzī ke ḳhādim kā rūp dhār kar ghūmte phirte haiṅ. un kā anjām un ke āmāl ke mutābiq hī hogā.

¹⁶maiṅ dubārā kahtā hūṅ ki koī mujhe ahmaq na samjhe. lekin agar āp yih socheṅ bhī to kam az kam mujhe ahmaq kī haisiyat se qabūl kareṅ tāki maiṅ bhī thoṛā bahut apne āp par faḳhr karūṅ.

¹⁷asal meṅ jo kuchh maiṅ ab bayān kar rahā hūṅ wuh ḳhudāwand ko pasand nahīṅ hai, balki maiṅ ahmaq kī tarah bāt kar rahā hūṅ.

¹⁸lekin chūṅki itne log jismānī taur par faḳhr kar rahe haiṅ is lie maiṅ bhī faḳhr karūṅga.

¹⁹beshak āp ḳhud itne dānishmand haiṅ ki āp ahmaqoṅ ko ḳhushī se bardāsht karte haiṅ.

²⁰hāṅ, balki āp yih bhī bardāsht karte haiṅ jab log āp ko ġhulām banāte, āp ko lūṭte, āp se ġhalat fāidā uṭhāte, naḳhre karte aur āp ko thappaṛ mārte haiṅ.

²¹yih kah kar mujhe sharm ātī hai ki ham itne kamzor the ki ham aisā na kar sake. lekin agar koī kisī bāt par faḳhr karne kī jur'at kare (maiṅ ahmaq kī sī bāt kar rahā hūṅ) to maiṅ bhī utnī hī jur'at karūṅga.

²²kyā wuh ibrānī haiṅ? maiṅ bhī hūṅ. kyā wuh isrāīlī haiṅ? maiṅ bhī hūṅ. kyā wuh ibrāhīm kī aulād haiṅ? maiṅ bhī hūṅ.

²³kyā wuh masīh ke ḳhādim haiṅ? (ab to maiṅ goyā beḳhud ho gayā hūṅ ki is tarah kī bāteṅ kar rahā hūṅ!) maiṅ un se zyādā masīh kī ḳhidmat kartā hūṅ. maiṅ ne un se kahīṅ zyādā mehnat-mashaqqat kī, zyādā dafā jel meṅ rahā, mere zyādā saḳhtī se koṛe lagāe gae aur maiṅ bār bār marne ke ḳhatroṅ meṅ rahā hūṅ.

²⁴mujhe yahūdiyoṅ se pāṅch dafā 39 koṛoṅ kī sazā milī hai.

²⁵tīn dafā romiyoṅ ne mujhe lāṭhī se mārā. ek bār mujhe sangsār kiyā gayā. jab maiṅ samundar meṅ safar kar rahā thā to tīn martabā merā jahāz tabāh huā. hāṅ, ek dafā mujhe jahāz ke tabāh hone par ek pūrī rāt aur din samundar meṅ guzārnā paṛā.

²⁶mere beshumār safaroṅ ke daurān mujhe kaī tarah ke ḳhatroṅ kā sāmnā karnā paṛā, daryāoṅ aur ḍākuoṅ kā ḳhatrā, apne hamwatanoṅ aur ġhairyahūdiyoṅ ke hamloṅ kā ḳhatrā. jahāṅ bhī maiṅ gayā hūṅ wahāṅ yih ḳhatre maujūd rahe, ḳhwāh maiṅ shahr meṅ thā, ḳhwāh ġhairābād ilāqe meṅ yā samundar meṅ. jhūṭe bhāiyoṅ kī taraf se bhī ḳhatre rahe haiṅ.

²⁷maiṅ ne jāṅfishānī se saḳht mehnat-mashaqqat kī hai aur kaī rāt jāgtā rahā hūṅ, maiṅ bhūkā aur pyāsā rahā hūṅ, maiṅ ne bahut roze rakhe haiṅ. mujhe sardī aur nangepan kā tajribā huā hai.

²⁸aur yih un fikroṅ ke ilāwā hai jo maiṅ ḳhudā kī tamām jamā'atoṅ ke lie mahsūs kartā hūṅ aur jo mujhe dabātī rahtī haiṅ.

²⁹jab koī kamzor hai to maiṅ apne āp ko bhī kamzor mahsūs kartā hūṅ. jab kisī ko ġhalat rāh par lāyā jātā hai to maiṅ us ke lie shadīd ranjish mahsūs kartā hūṅ.

³⁰agar mujhe faḳhr karnā paṛe to maiṅ un chīzoṅ par faḳhr karūṅga jo merī kamzor hālat zāhir kartī haiṅ.

³¹hamārā ḳhudā aur ḳhudāwand īsā kā bāp (us kī hamd-o-sanā abad tak ho) jāntā hai ki maiṅ jhūṭ nahīṅ bol rahā.

³²jab maiṅ damishq shahr meṅ thā to bādshāh aritās ke gawarnar ne shahr ke tamām darwāzoṅ par apne pahredār muqarrar kie tāki wuh mujhe giriftār kareṅ.

³³lekin shahr kī fasīl meṅ ek darīchā thā, aur mujhe ek ṭokre meṅ rakh kar wahāṅ se utārā gayā. yūṅ maiṅ us ke hāthoṅ se bach niklā.