Read Roman Urdu Geo 2-kurinthiyoṅ 2 Bible Online

2-kurinthiyoṅ 2 - Roman Urdu Geo bible

2-kurinthiyoṅ 2

¹chunāṅche maiṅ ne faislā kiyā ki maiṅ dubārā āp ke pās nahīṅ āūṅgā, warnā āp ko bahut ġham khānā paṛegā.

²kyūṅki agar maiṅ āp ko dukh pahuṅchāūṅ to kaun mujhe ḳhush karegā? yih wuh shaḳhs nahīṅ karegā jise maiṅ ne dukh pahuṅchāyā hai.

³yihī wajah hai ki maiṅ ne āp ko yih likh diyā. maiṅ nahīṅ chāhtā thā ki āp ke pās ā kar un hī logoṅ se ġham khāūṅ jinheṅ mujhe ḳhush karnā chāhie. kyūṅki mujhe āp sab ke bāre meṅ yaqīn hai ki merī ḳhushī āp sab kī ḳhushī hai.

⁴maiṅ ne āp ko nihāyat ranjīdā aur pareshān hālat meṅ āṅsū bahā bahā kar likh diyā. maqsad yih nahīṅ thā ki āp ġhamgīn ho jāeṅ balki maiṅ chāhtā thā ki āp jān leṅ ki maiṅ āp se kitnī gahrī muhabbat rakhtā hūṅ.

⁵agar kisī ne dukh pahuṅchāyā hai to mujhe nahīṅ balki kisī had tak āp sab ko (maiṅ zyādā saḳhtī se bāt nahīṅ karnā chāhtā).

⁶lekin mazkūrā shaḳhs ke lie yih kāfī hai ki use jamā'at ke aksar logoṅ ne sazā dī hai.

⁷ab zarūrī hai ki āp use muāf karke tasallī deṅ, warnā wuh ġham khā khā kar tabāh ho jāegā.

⁸chunāṅche maiṅ is par zor denā chāhtā hūṅ ki āp use apnī muhabbat kā ehsās dilāeṅ.

⁹maiṅ ne yih mālūm karne ke lie āp ko likhā ki kyā āp imtihān meṅ pūre utreṅge aur har bāt meṅ tābe raheṅge.

¹⁰jise āp kuchh muāf karte haiṅ use maiṅ bhī muāf kartā hūṅ. aur jo kuchh maiṅ ne muāf kiyā, agar mujhe kuchh muāf karne kī zarūrat thī, wuh maiṅ ne āp kī ḳhātir masīh ke huzūr muāf kiyā hai

¹¹tāki iblīs ham se fāidā na uṭhāe. kyūṅki ham us kī chāloṅ se ḳhūb wāqif haiṅ.

¹²jab maiṅ masīh kī ḳhushḳhabrī sunāne ke lie troās gayā to ḳhudāwand ne mere lie āge ḳhidmat karne kā ek darwāzā khol diyā.

¹³lekin jab mujhe apnā bhāī titus wahāṅ na milā to maiṅ bechain ho gayā aur unheṅ ḳhairbād kah kar sūbā makiduniyā chalā gayā.

¹⁴lekin ḳhudā kā shukr hai! wuhī hamāre āge āge chaltā hai aur ham masīh ke qaidī ban kar us kī fath manāte hue us ke pīchhe pīchhe chalte haiṅ. yūṅ allāh hamāre wasīle se har jagah masīh ke bāre meṅ ilm ḳhushbū kī tarah phailātā hai.

¹⁵kyūṅki ham masīh kī ḳhushbū haiṅ jo allāh tak pahuṅchtī hai aur sāth sāth logoṅ meṅ bhī phailtī hai, najāt pāne wāloṅ meṅ bhī aur halāk hone wāloṅ meṅ bhī.

¹⁶bāz logoṅ ke lie ham maut kī mohlak bū haiṅ jabki bāz ke lie ham zindagībaḳhsh ḳhushbū haiṅ. to kaun yih zimmādārī nibhāne ke lāiq hai?

¹⁷kyūṅki ham aksar logoṅ kī tarah allāh ke kalām kī tijārat nahīṅ karte, balki yih jān kar ki ham allāh ke huzūr meṅ haiṅ aur us ke bheje hue haiṅ ham ḳhulūsdilī se logoṅ se bāt karte haiṅ.