Read Roman Urdu Geo 2-kurinthiyoṅ 4 Bible Online

2-kurinthiyoṅ 4 - Roman Urdu Geo bible

2-kurinthiyoṅ 4

¹pas chūṅki hameṅ allāh ke rahm se yih ḳhidmat sauṅpī gaī hai is lie ham bedil nahīṅ ho jāte.

²ham ne chhupī huī sharmnāk bāteṅ mustarad kar dī haiṅ. na ham chālākī se kām karte, na allāh ke kalām meṅ tahrīf karte haiṅ. balki hameṅ apnī sifārish kī zarūrat bhī nahīṅ, kyūṅki jab ham allāh ke huzūr logoṅ par haqīqat ko zāhir karte haiṅ to hamārī neknāmī ḳhud-ba-ḳhud har ek ke zamīr par zāhir ho jātī hai.

³aur agar hamārī ḳhushḳhabrī niqāb tale chhupī huī bhī ho to wuh sirf un ke lie chhupī huī hai jo halāk ho rahe haiṅ.

⁴is jahān ke sharīr ḳhudā ne un ke zahnoṅ ko andhā kar diyā hai jo īmān nahīṅ rakhte. is lie wuh allāh kī ḳhushḳhabrī kī jalālī raushnī nahīṅ dekh sakte. wuh yih paiġhām nahīṅ samajh sakte jo masīh ke jalāl ke bāre meṅ hai, us ke bāre meṅ jo allāh kī sūrat hai.

⁵kyūṅki ham apnā parchār nahīṅ karte balki īsā masīh kā paiġhām sunāte haiṅ ki wuh ḳhudāwand hai. apne āp ko ham īsā kī ḳhātir āp ke ḳhādim qarār dete haiṅ.

⁶kyūṅki jis ḳhudā ne farmāyā, “andhere meṅ se raushnī chamke,” us ne hamāre diloṅ meṅ apnī raushnī chamakne dī tāki ham allāh kā wuh jalāl jān leṅ jo īsā masīh ke chehre se chamaktā hai.

⁷lekin ham jin ke andar yih ḳhazānā hai ām miṭṭī ke bartanoṅ kī mānind haiṅ tāki zāhir ho ki yih zabardast quwwat hamārī taraf se nahīṅ balki allāh kī taraf se hai.

⁸log hameṅ chāroṅ taraf se dabāte haiṅ, lekin koī hameṅ kuchal kar ḳhatm nahīṅ kar saktā. ham uljhan meṅ paṛ jāte haiṅ, lekin ummīd kā dāman hāth se jāne nahīṅ dete.

⁹log hameṅ īzā dete haiṅ, lekin hameṅ akelā nahīṅ chhoṛā jātā. logoṅ ke dhakkoṅ se ham zamīn par gir jāte haiṅ, lekin ham tabāh nahīṅ hote.

¹⁰har waqt ham apne badan meṅ īsā kī maut lie phirte haiṅ tāki īsā kī zindagī bhī hamāre badan meṅ zāhir ho jāe.

¹¹kyūṅki har waqt hameṅ zindā hālat meṅ īsā kī ḳhātir maut ke hawāle kar diyā jātā hai tāki us kī zindagī hamāre fānī badan meṅ zāhir ho jāe.

¹²yūṅ ham meṅ maut kā asar kām kartā hai jabki āp meṅ zindagī kā asar.

¹³kalām-e-muqaddas meṅ likhā hai, “maiṅ īmān lāyā aur is lie bolā.” hameṅ īmān kā yihī rūh hāsil hai is lie ham bhī īmān lāne kī wajah se bolte haiṅ.

¹⁴kyūṅki ham jānte haiṅ ki jis ne ḳhudāwand īsā ko murdoṅ meṅ se zindā kar diyā hai wuh īsā ke sāth hameṅ bhī zindā karke āp logoṅ samet apne huzūr khaṛā karegā.

¹⁵yih sab kuchh āp ke fāide ke lie hai. yūṅ allāh kā fazl āge baṛhte baṛhte mazīd bahut se logoṅ tak pahuṅch rahā hai aur natīje meṅ wuh allāh ko jalāl de kar shukrguzārī kī duāoṅ meṅ bahut izāfā kar rahe haiṅ.

¹⁶isī wajah se ham bedil nahīṅ ho jāte. beshak zāhirī taur par ham ḳhatm ho rahe haiṅ, lekin andar hī andar roz-ba-roz hamārī tajdīd hotī jā rahī hai.

¹⁷kyūṅki hamārī maujūdā musībat halkī aur pal bhar kī hai, aur wuh hamāre lie ek aisā abadī jalāl paidā kar rahī hai jis kī nisbat maujūdā musībat kuchh bhī nahīṅ.

¹⁸is lie ham dekhī huī chīzoṅ par ġhaur nahīṅ karte balki andekhī chīzoṅ par. kyūṅki dekhī huī chīzeṅ ārizī haiṅ, jabki andekhī chīzeṅ abadī haiṅ.