Read Roman Urdu Geo 2-kurinthiyoṅ 5 Bible Online

2-kurinthiyoṅ 5 - Roman Urdu Geo bible

2-kurinthiyoṅ 5

¹ham to jānte haiṅ ki jab hamārī dunyāwī jhoṅpṛī jis meṅ ham rahte haiṅ girāī jāegī to allāh hameṅ āsmān par ek makān degā, ek aisā abadī ghar jise insānī hāthoṅ ne nahīṅ banāyā hogā.

²is lie ham is jhoṅpṛī meṅ karāhte haiṅ aur āsmānī ghar pahan lene kī shadīd ārzū rakhte haiṅ,

³kyūṅki jab ham use pahan leṅge to ham nange nahīṅ pāe jāeṅge.

⁴is jhoṅpṛī meṅ rahte hue ham bojh tale karāhte haiṅ. kyūṅki ham apnā fānī libās utārnā nahīṅ chāhte balki us par āsmānī ghar kā libās pahan lenā chāhte haiṅ tāki zindagī wuh kuchh nigal jāe jo fānī hai.

⁵allāh ne ḳhud hameṅ is maqsad ke lie tayyār kiyā hai aur usī ne hameṅ rūh-ul-quds ko āne wāle jalāl ke baiāne ke taur par de diyā hai.

⁶chunāṅche ham hameshā hauslā rakhte haiṅ. ham jānte haiṅ ki jab tak apne badan meṅ rihāishpazīr haiṅ us waqt tak ḳhudāwand ke ghar se dūr haiṅ.

⁷ham zāhirī chīzoṅ par bharosā nahīṅ karte balki īmān par chalte haiṅ.

⁸hāṅ, hamārā hauslā buland hai balki ham zyādā yih chāhte haiṅ ki apne jismānī ghar se rawānā ho kar ḳhudāwand ke ghar meṅ raheṅ.

⁹lekin ḳhwāh ham apne badan meṅ hoṅ yā na, ham isī koshish meṅ rahte haiṅ ki ḳhudāwand ko pasand āeṅ.

¹⁰kyūṅki lāzim hai ki ham sab masīh ke taḳht-e-adālat ke sāmne hāzir ho jāeṅ. wahāṅ har ek ko us kām kā ajr milegā jo us ne apne badan meṅ rahte hue kiyā hai, ḳhwāh wuh achchhā thā yā burā.

¹¹ab ham ḳhudāwand ke ḳhauf ko jān kar logoṅ ko samjhāne kī koshish karte haiṅ. ham to allāh ke sāmne pūre taur par zāhir haiṅ. aur maiṅ ummīd rakhtā hūṅ ki ham āp ke zamīr ke sāmne bhī zāhir haiṅ.

¹²kyā ham yih bāt karke dubārā apnī sifārish kar rahe haiṅ? nahīṅ, āp ko ham par faḳhr karne kā mauqā de rahe haiṅ tāki āp un ke jawāb meṅ kuchh kah sakeṅ jo zāhirī bātoṅ par sheḳhī mārte aur dilī bāteṅ nazarandāz karte haiṅ.

¹³kyūṅki agar ham beḳhud hue to allāh kī ḳhātir, aur agar hosh meṅ haiṅ to āp kī ḳhātir.

¹⁴bāt yih hai ki masīh kī muhabbat hameṅ majbūr kar detī hai, kyūṅki ham is natīje par pahuṅch gae haiṅ ki ek sab ke lie muā. is kā matlab hai ki sab hī mar gae haiṅ.

¹⁵aur wuh sab ke lie is lie muā tāki jo zindā haiṅ wuh apne lie na jieṅ balki us ke lie jo un kī ḳhātir muā aur phir jī uṭhā.

¹⁶is wajah se ham ab se kisī ko bhī dunyāwī nigāh se nahīṅ deḳhte. pahle to ham masīh ko bhī is zāwiye se deḳhte the, lekin yih waqt guzar gayā hai.

¹⁷chunāṅche jo masīh meṅ hai wuh nayā maḳhlūq hai. purānī zindagī jātī rahī aur naī zindagī shurū ho gaī hai.

¹⁸yih sab kuchh allāh kī taraf se hai jis ne masīh ke wasīle se apne sāth hamārā mel-milāp kar liyā hai. aur usī ne hameṅ mel-milāp karāne kī ḳhidmat kī zimmādārī dī hai.

¹⁹is ḳhidmat ke taht ham yih paiġhām sunāte haiṅ ki allāh ne masīh ke wasīle se apne sāth duniyā kī sulah karāī aur logoṅ ke gunāhoṅ ko un ke zimme na lagāyā. sulah karāne kā yih paiġhām us ne hamāre sapurd kar diyā.

²⁰pas ham masīh ke elchī haiṅ aur allāh hamāre wasīle se logoṅ ko samjhātā hai. ham masīh ke wāste āp se minnat karte haiṅ ki allāh kī sulah kī peshkash ko qabūl kareṅ tāki us kī āp ke sāth sulah ho jāe.

²¹masīh begunāh thā, lekin allāh ne use hamārī ḳhātir gunāh ṭhahrāyā tāki hameṅ us meṅ rāstbāz qarār diyā jāe.