Read Roman Urdu Geo 2-kurinthiyoṅ 7 Bible Online

2-kurinthiyoṅ 7 - Roman Urdu Geo bible

2-kurinthiyoṅ 7

¹mere azīzo, yih tamām wāde ham se kie gae haiṅ. is lie āeṅ, ham apne āp ko har us chīz se pāk-sāf kareṅ jo jism aur rūh ko ālūdā kar detī hai. aur ham ḳhudā ke ḳhauf meṅ mukammal taur par muqaddas banane ke lie koshāṅ raheṅ.

²hameṅ apne dil meṅ jagah deṅ. na ham ne kisī se nāinsāfī kī, na kisī ko bigāṛā yā us se ġhalat fāidā uṭhāyā.

³maiṅ yih bāt āp ko mujrim ṭhahrāne ke lie nahīṅ kah rahā. maiṅ āp ko pahle batā chukā hūṅ ki āp hameṅ itne azīz haiṅ ki ham āp ke sāth marne aur jīne ke lie tayyār haiṅ.

⁴is lie maiṅ āp se khul kar bāt kartā hūṅ aur maiṅ āp par baṛā faḳhr bhī kartā hūṅ. is nāte se mujhe pūrī tasallī hai, aur hamārī tamām musībatoṅ ke bāwujūd merī ḳhushī kī intihā nahīṅ.

⁵kyūṅki jab ham makiduniyā pahuṅche to ham jism ke lihāz se ārām na kar sake. musībatoṅ ne hameṅ har taraf se gher liyā. dūsroṅ kī taraf se jhagaṛoṅ se aur dil meṅ tarah tarah ke ḍar se nipaṭnā paṛā.

⁶lekin allāh ne jo dabe huoṅ ko tasallī baḳhshtā hai titus ke āne se hamārī hauslā-afzāī kī.

⁷hamārā hauslā na sirf us ke āne se baṛh gayā balki un hauslā-afzā bātoṅ se bhī jin se āp ne use tasallī dī. us ne hameṅ āp kī ārzū, āp kī āh-o-zārī aur mere lie āp kī sargarmī ke bāre meṅ riporṭ dī. yih sun kar merī ḳhushī mazīd baṛh gaī.

⁸kyūṅki agarche maiṅ ne āp ko apne ḳhat se dukh pahuṅchāyā to bhī maiṅ pachhtātā nahīṅ. pahle to maiṅ ḳhat likhne se pachhtāyā, lekin ab maiṅ deḳhtā hūṅ ki jo dukh us ne āp ko pahuṅchāyā wuh sirf ārizī thā

⁹aur us ne āp ko taubā tak pahuṅchāyā. yih sun kar maiṅ ab ḳhushī manātā hūṅ, is lie nahīṅ ki āp ko dukh uṭhānā paṛā hai balki is lie ki is dukh ne āp ko taubā tak pahuṅchāyā. allāh ne yih dukh apnī marzī pūrī karāne ke lie istemāl kiyā, is lie āp ko hamārī taraf se koī nuqsān na pahuṅchā.

¹⁰kyūṅki jo dukh allāh apnī marzī pūrī karāne ke lie istemāl kartā hai us se taubā paidā hotī hai aur us kā anjām najāt hai. is meṅ pachhtāne kī gunjāish hī nahīṅ. is ke baraks dunyāwī dukh kā anjām maut hai.

¹¹āp ḳhud dekheṅ ki allāh ke is dukh ne āp meṅ kyā paidā kiyā hai: kitnī sanjīdagī, apnā difā karne kā kitnā josh, ġhalat harkatoṅ par kitnā ġhussā, kitnā ḳhauf, kitnī chāhat, kitnī sargarmī. āp sazā dene ke lie kitne tayyār the! āp ne har lihāz se sābit kiyā hai ki āp is muāmale meṅ bequsūr haiṅ.

¹²ġharz, agarche maiṅ ne āp ko likhā, lekin maqsad yih nahīṅ thā ki ġhalat harkateṅ karne wāle ke bāre meṅ likhūṅ yā us ke bāre meṅ jis ke sāth ġhalat kām kiyā gayā. nahīṅ, maqsad yih thā ki allāh ke huzūr āp par zāhir ho jāe ki āp hamāre lie kitne sargarm haiṅ.

¹³yihī wajah hai ki hamārā hauslā baṛh gayā hai. lekin na sirf hamārī hauslā-afzāī huī hai balki ham yih dekh kar be'intihā ḳhush hue ki titus kitnā ḳhush thā. wuh kyūṅ ḳhush thā? is lie ki us kī rūh āp sab se tar-o-tāzā huī.

¹⁴us ke sāmne maiṅ ne āp par faḳhr kiyā thā, aur maiṅ sharmindā nahīṅ huā kyūṅki yih bāt durust sābit huī hai. jis tarah ham ne āp ko hameshā sachchī bāteṅ batāī haiṅ usī tarah titus ke sāmne āp par hamārā faḳhr bhī durust niklā.

¹⁵āp use nihāyat azīz haiṅ kyūṅki wuh āp sab kī farmāṅbardārī yād kartā hai, ki āp ne ḍarte aur kāṅpte hue use ḳhushāmdīd kahā.

¹⁶maiṅ ḳhush hūṅ ki maiṅ har lihāz se āp par etimād kar saktā hūṅ.