Read Roman Urdu Geo 2-kurinthiyoṅ 8 Bible Online

2-kurinthiyoṅ 8 - Roman Urdu Geo bible

2-kurinthiyoṅ 8

¹bhāiyo, ham āp kī tawajjuh us fazl kī taraf dilānā chāhte haiṅ jo allāh ne sūbā makiduniyā kī jamā'atoṅ par kiyā.

²jis musībat meṅ wuh phaṅse hue haiṅ us se un kī saḳht āzmāish huī. to bhī un kī be'intihā ḳhushī aur shadīd ġhurbat kā natījā yih niklā ki unhoṅ ne baṛī fayyāzdilī se hadiyā diyā.

³maiṅ gawāh hūṅ ki jitnā wuh de sake utnā unhoṅ ne de diyā balki is se bhī zyādā. apnī hī taraf se

⁴unhoṅ ne baṛe zor se ham se minnat kī ki hameṅ bhī yahūdiyā ke muqaddasīn kī ḳhidmat karne kā mauqā deṅ, ham bhī dene ke fazl meṅ sharīk honā chāhte haiṅ.

⁵aur unhoṅ ne hamārī ummīd se kahīṅ zyādā kiyā! allāh kī marzī se un kā pahlā qadam yih thā ki unhoṅ ne apne āp ko ḳhudāwand ke lie maḳhsūs kiyā. un kā dūsrā qadam yih thā ki unhoṅ ne apne āp ko hamāre lie maḳhsūs kiyā.

⁶is par ham ne titus kī hauslā-afzāī kī ki wuh āp ke pās bhī hadiyā jamā karne kā wuh silsilā anjām tak pahuṅchāe jo us ne shurū kiyā thā.

⁷āp ke pās sab kuchh kasrat se pāyā jātā hai, ḳhwāh īmān ho, ḳhwāh kalām, ilm, mukammal sargarmī yā ham se muhabbat ho. ab is bāt kā ḳhayāl rakheṅ ki āp yih hadiyā dene meṅ bhī apnī kasīr daulat kā izhār kareṅ.

⁸merī taraf se yih koī hukm nahīṅ hai. lekin dūsroṅ kī sargarmī ke pesh-e-nazar maiṅ āp kī bhī muhabbat parakh rahā hūṅ ki wuh kitnī haqīqī hai.

⁹āp to jānte haiṅ ki hamāre ḳhudāwand īsā masīh ne āp par kaisā fazl kiyā hai, ki agarche wuh daulatmand thā to bhī wuh āp kī ḳhātir ġharīb ban gayā tāki āp us kī ġhurbat se daulatmand ban jāeṅ.

¹⁰is muāmale meṅ merā mashwarā suneṅ, kyūṅki wuh āp ke lie mufīd sābit hogā. pichhle sāl āp pahlī jamā'at the jo na sirf hadiyā dene lagī balki ise denā bhī chāhtī thī.

¹¹ab use takmīl tak pahuṅchāeṅ jo āp ne shurū kar rakhā hai. dene kā jo shauq āp rakhte haiṅ wuh amal meṅ lāyā jāe. utnā deṅ jitnā āp de sakeṅ.

¹²kyūṅki agar āp dene kā shauq rakhte haiṅ to phir allāh āp kā hadiyā us binā par qabūl karegā jo āp de sakte haiṅ, us binā par nahīṅ jo āp nahīṅ de sakte.

¹³kahne kā matlab yih nahīṅ ki dūsroṅ ko ārām dilāne ke bāis āp ḳhud musībat meṅ paṛ jāeṅ. bāt sirf yih hai ki logoṅ ke hālāt kuchh barābar hone chāhieṅ.

¹⁴is waqt to āp ke pās bahut hai aur āp un kī zarūrat pūrī kar sakte haiṅ. bād meṅ kisī waqt jab un ke pās bahut hogā to wuh āp kī zarūrat bhī pūrī kar sakeṅge. yūṅ āp ke hālāt kuchh barābar raheṅge,

¹⁵jis tarah kalām-e-muqaddas meṅ bhī likhā hai, “jis ne zyādā jamā kiyā thā us ke pās kuchh na bachā. lekin jis ne kam jamā kiyā thā us ke pās bhī kāfī thā.”

¹⁶ḳhudā kā shukr hai jis ne titus ke dil meṅ wuhī josh paidā kiyā hai jo maiṅ āp ke lie rakhtā hūṅ.

¹⁷jab ham ne us kī hauslā-afzāī kī ki wuh āp ke pās jāe to wuh na sirf is ke lie tayyār huā balki baṛā sargarm ho kar ḳhud-ba-ḳhud āp ke pās jāne ke lie rawānā huā.

¹⁸ham ne us ke sāth us bhāī ko bhej diyā jis kī ḳhidmat kī tārīf tamām jamā'ateṅ kartī haiṅ, kyūṅki use allāh kī ḳhushḳhabrī sunāne kī nemat milī hai.

¹⁹use na sirf āp ke pās jānā hai balki jamā'atoṅ ne use muqarrar kiyā hai ki jab ham hadie ko yarūshalam le jāeṅge to wuh hamāre sāth jāe. yūṅ ham yih ḳhidmat adā karte waqt ḳhudāwand ko jalāl deṅge aur apnī sargarmī kā izhār kareṅge.

²⁰kyūṅki us baṛe hadie ke pesh-e-nazar jo ham le jāeṅge ham is se bachnā chāhte haiṅ ki kisī ko ham par shak karne kā mauqā mile.

²¹hamārī pūrī koshish yih hai ki wuhī kuchh kareṅ jo na sirf ḳhudāwand kī nazar meṅ durust hai balki insān kī nazar meṅ bhī.

²²un ke sāth ham ne ek aur bhāī ko bhī bhej diyā jis kī sargarmī ham ne kaī mauqoṅ par parkhī hai. ab wuh mazīd sargarm ho gayā hai, kyūṅki wuh āp par baṛā etimād kartā hai.

²³jahāṅ tak titus kā tālluq hai, wuh merā sāthī aur hamḳhidmat hai. aur jo bhāī us ke sāth haiṅ unheṅ jamā'atoṅ ne bhejā hai. wuh masīh ke lie izzat kā bāis haiṅ.

²⁴un par apnī muhabbat kā izhār karke yih zāhir kareṅ ki ham āp par kyūṅ faḳhr karte haiṅ. phir yih bāt ḳhudā kī dīgar jamā'atoṅ ko bhī nazar āegī.