Read Roman Urdu Geo 2-kurinthiyoṅ 9 Bible Online

2-kurinthiyoṅ 9 - Roman Urdu Geo bible

2-kurinthiyoṅ 9

¹asal meṅ is kī zarūrat nahīṅ ki maiṅ āp ko us kām ke bāre meṅ likhūṅ jo hameṅ yahūdiyā ke muqaddasīn kī ḳhidmat meṅ karnā hai.

²kyūṅki maiṅ āp kī garmjoshī jāntā hūṅ, aur maiṅ makiduniyā ke īmāndāroṅ ke sāmne āp par faḳhr kartā rahā hūṅ ki “aḳhayā ke log pichhle sāl se dene ke lie tayyār the.” yūṅ āp kī sargarmī ne zyādātar logoṅ ko ḳhud dene ke lie ubhārā.

³ab maiṅ ne in bhāiyoṅ ko bhej diyā hai tāki hamārā āp par faḳhr bebunyād na nikle balki jis tarah maiṅ ne kahā thā āp tayyār raheṅ.

⁴aisā na ho ki jab maiṅ makiduniyā ke kuchh bhāiyoṅ ko sāth le kar āp ke pās pahuṅchūṅgā to āp tayyār na hūṅ. us waqt maiṅ, balki āp bhī sharmindā hoṅge ki maiṅ ne āp par itnā etimād kiyā hai.

⁵is lie maiṅ ne is bāt par zor denā zarūrī samjhā ki bhāī pahle hī āp ke pās ā kar us hadie kā intizām kareṅ jis kā wādā āp ne kiyā hai. kyūṅki maiṅ chāhtā hūṅ ki mere āne tak yih hadiyā jamā kiyā gayā ho aur aisā na lage jaisā ise mushkil se āp se nikālnā paṛā. is ke bajāe āp kī saḳhāwat zāhir ho jāe.

⁶yād rahe ki jo shaḳhs bīj ko bachā bachā kar botā hai us kī fasal bhī utnī kam hogī. lekin jo bahut bīj botā hai us kī fasal bhī bahut zyādā hogī.

⁷har ek utnā de jitnā dene ke lie us ne pahle apne dil meṅ ṭhahrā liyā hai. wuh is meṅ taqlīf yā majbūrī mahsūs na kare, kyūṅki allāh us se muhabbat rakhtā hai jo ḳhushī se detā hai.

⁸aur allāh is qābil hai ki āp ko āp kī zarūriyāt se kahīṅ zyādā de. phir āp ke pās har waqt aur har lihāz se kāfī hogā balki itnā zyādā ki āp har qism kā nek kām kar sakeṅge.

⁹chunāṅche kalām-e-muqaddas meṅ yih bhī likhā hai, “us ne fayyāzī se zarūratmandoṅ meṅ ḳhairāt bikher dī, us kī rāstbāzī hameshā tak qāim rahegī.”

¹⁰ḳhudā hī bīj bone wāle ko bīj muhayyā kartā aur use khāne ke lie roṭī detā hai. aur wuh āp ko bhī bīj de kar us meṅ izāfā karegā aur āp kī rāstbāzī kī fasal ugne degā.

¹¹hāṅ, wuh āp ko har lihāz se daulatmand banā degā aur āp har mauqe par fayyāzī se de sakeṅge. chunāṅche jab ham āp kā hadiyā un ke pās le jāeṅge jo zarūratmand haiṅ to wuh ḳhudā kā shukr kareṅge.

¹²yūṅ āp na sirf muqaddasīn kī zarūriyāt pūrī kareṅge balki wuh āp kī is ḳhidmat se itne muta'assir ho jāeṅge ki wuh baṛe josh se ḳhudā kā bhī shukriyā adā kareṅge.

¹³āp kī ḳhidmat ke natīje meṅ wuh allāh ko jalāl deṅge. kyūṅki āp kī un par aur tamām īmāndāroṅ par saḳhāwat kā izhār sābit karegā ki āp masīh kī ḳhushḳhabrī na sirf taslīm karte haiṅ balki us ke tābe bhī rahte haiṅ.

¹⁴aur jab wuh āp ke lie duā kareṅge to āp ke ārzūmand raheṅge, is lie ki allāh ne āp ko kitnā baṛā fazl de diyā hai.

¹⁵allāh kā us kī nāqābil-e-bayān baḳhshish ke lie shukr ho!