Read Roman Urdu Geo galatiyoṅ 1 Bible Online

galatiyoṅ 1 - Roman Urdu Geo bible

galatiyoṅ 1

¹yih ḳhat paulus rasūl kī taraf se hai. mujhe na kisī guroh ne muqarrar kiyā na kisī shaḳhs ne balki īsā masīh aur ḳhudā bāp ne jis ne use murdoṅ meṅ se zindā kar diyā.

²tamām bhāī bhī jo mere sāth haiṅ galatiyā kī jamā'atoṅ ko salām kahte haiṅ.

³ḳhudā hamārā bāp aur ḳhudāwand īsā masīh āp ko fazl aur salāmatī atā kareṅ.

⁴masīh wuhī hai jis ne apne āp ko hamāre gunāhoṅ kī ḳhātir qurbān kar diyā aur yūṅ hameṅ is maujūdā sharīr jahān se bachā liyā hai, kyūṅki yih allāh hamāre bāp kī marzī thī.

⁵usī kā jalāl abad tak hotā rahe! āmīn.

⁶maiṅ hairān hūṅ! āp itnī jaldī se use tark kar rahe haiṅ jis ne masīh ke fazl se āp ko bulāyā. aur ab āp ek farq qism kī “ḳhushḳhabrī” ke pīchhe lag gae haiṅ.

⁷asal meṅ yih allāh kī ḳhushḳhabrī hai nahīṅ. bas kuchh log āp ko uljhan meṅ ḍāl kar masīh kī ḳhushḳhabrī meṅ tabdīlī lānā chāhte haiṅ.

⁸ham ne to aslī ḳhushḳhabrī sunāī aur jo is se farq paiġhām sunātā hai us par lānat, ḳhwāh ham ḳhud aisā kareṅ ḳhwāh āsmān se koī farishtā utar kar yih ġhalat paiġhām sunāe.

⁹ham yih pahle bayān kar chuke haiṅ aur ab maiṅ dubārā kahtā hūṅ ki agar koī āp ko aisī “ḳhushḳhabrī” sunāe jo us se farq hai jise āp ne qabūl kiyā hai to us par lānat!

¹⁰kyā maiṅ is meṅ yih koshish kar rahā hūṅ ki log mujhe qabūl kareṅ? hargiz nahīṅ! maiṅ chāhtā hūṅ ki allāh mujhe qabūl kare. kyā merī koshish yih hai ki maiṅ logoṅ ko pasand āūṅ? agar maiṅ ab tak aisā kartā to masīh kā ḳhādim na hotā.

¹¹bhāiyo, maiṅ chāhtā hūṅ ki āp jān leṅ ki jo ḳhushḳhabrī maiṅ ne sunāī wuh insān kī taraf se nahīṅ hai.

¹²na mujhe yih paiġhām kisī insān se milā, na yih mujhe kisī ne sikhāyā hai balki īsā masīh ne ḳhud mujh par yih paiġhām zāhir kiyā.

¹³āp ne to ḳhud sun liyā hai ki maiṅ us waqt kis tarah zindagī guzārtā thā jab yahūdī mazhab kā pairokār thā. us waqt maiṅ ne kitne josh aur shiddat se allāh kī jamā'at ko īzā pahuṅchāī. merī pūrī koshish yih thī ki yih jamā'at ḳhatm ho jāe.

¹⁴yahūdī mazhab ke lihāz se maiṅ aksar dīgar hamumr yahūdiyoṅ par sabqat le gayā thā. hāṅ, maiṅ apne bāpdādā kī riwāyatoṅ kī pairawī meṅ had se zyādā sargarm thā.

¹⁵lekin allāh ne apne fazl se mujhe paidā hone se peshtar hī chun kar apnī ḳhidmat karne ke lie bulāyā. aur jab us ne apnī marzī se

¹⁶apne farzand ko mujh par zāhir kiyā tāki maiṅ us ke bāre meṅ ġhairyahūdiyoṅ ko ḳhushḳhabrī sunāūṅ to maiṅ ne kisī bhī shaḳhs se mashwarā na liyā.

¹⁷us waqt maiṅ yarūshalam bhī na gayā tāki un se milūṅ jo mujh se pahle rasūl the balki maiṅ sīdhā arab chalā gayā aur bād meṅ damishq wāpas āyā.

¹⁸is ke tīn sāl bād hī maiṅ patras se shanāsā hone ke lie yarūshalam gayā. wahāṅ maiṅ pandrah din us ke sāth rahā.

¹⁹is ke ilāwā maiṅ ne sirf ḳhudāwand ke bhāī yāqūb ko dekhā, kisī aur rasūl ko nahīṅ.

²⁰jo kuchh maiṅ likh rahā hūṅ allāh gawāh hai ki wuh sahīh hai. maiṅ jhūṭ nahīṅ bol rahā.

²¹bād meṅ maiṅ mulk-e-shām aur kilikiyā chalā gayā.

²²us waqt sūbā yahūdiyā meṅ masīh kī jamā'ateṅ mujhe nahīṅ jāntī thīṅ.

²³un tak sirf yih ḳhabar pahuṅchī thī ki jo ādmī pahle hameṅ īzā pahuṅchā rahā thā wuh ab ḳhud us īmān kī ḳhushḳhabrī sunātā hai jise wuh pahle ḳhatm karnā chāhtā thā.

²⁴yih sun kar unhoṅ ne merī wajah se allāh kī tamjīd kī.