Read Roman Urdu Geo galatiyoṅ 3 Bible Online

galatiyoṅ 3 - Roman Urdu Geo bible

galatiyoṅ 3

¹nāsamajh galatiyo! kis ne āp par jādū kar diyā? āp kī āṅkhoṅ ke sāmne hī īsā masīh aur us kī salībī maut ko sāf sāf pesh kiyā gayā.

²mujhe ek bāt batāeṅ, kyā āp ko sharīat kī pairawī karne se rūh-ul-quds milā? hargiz nahīṅ! wuh āp ko us waqt milā jab āp masīh ke bāre meṅ paiġhām sun kar us par īmān lāe.

³kyā āp itne besamajh haiṅ? āp kī ruhānī zindagī rūh-ul-quds ke wasīle se shurū huī. to ab āp yih kām apnī insānī koshishoṅ se kis tarah takmīl tak pahuṅchānā chāhte haiṅ?

⁴āp ko kaī tarah ke tajribe hāsil hue haiṅ. kyā yih sab befāidā the? yaqīnan yih befāidā nahīṅ the.

⁵kyā allāh is lie āp ko apnā rūh detā aur āp ke darmiyān mojize kartā hai ki āp sharīat kī pairawī karte haiṅ? hargiz nahīṅ, balki is lie ki āp masīh ke bāre meṅ paiġhām sun kar īmān lāe haiṅ.

⁶ibrāhīm kī misāl leṅ. us ne allāh par bharosā kiyā aur is binā par allāh ne use rāstbāz qarār diyā.

⁷to phir āp ko jān lenā chāhie ki ibrāhīm kī haqīqī aulād wuh log haiṅ jo īmān rakhte haiṅ.

⁸kalām-e-muqaddas ne is bāt kī peshgoī kī ki allāh ġhairyahūdiyoṅ ko īmān ke zarī'e rāstbāz qarār degā. yūṅ us ne ibrāhīm ko yih ḳhushḳhabrī sunāī, “tamām qaumeṅ tujh se barkat pāeṅgī.”

⁹ibrāhīm īmān lāyā, is lie use barkat milī. isī tarah sab ko īmān lāne par ibrāhīm kī sī barkat miltī hai.

¹⁰lekin jo bhī is par takiyā karte haiṅ ki hameṅ sharīat kī pairawī karne se rāstbāz qarār diyā jāegā un par allāh kī lānat hai. kyūṅki kalām-e-muqaddas farmātā hai, “har ek par lānat jo sharīat kī kitāb kī tamām bāteṅ qāim na rakhe, na in par amal kare.”

¹¹yih bāt to sāf hai ki allāh kisī ko bhī sharīat kī pairawī karne kī binā par rāstbāz nahīṅ ṭhahrātā, kyūṅki kalām-e-muqaddas ke mutābiq rāstbāz īmān hī se jītā rahegā.

¹²īmān kī yih rāh sharīat kī rāh se bilkul farq hai jo kahtī hai, “jo yūṅ karegā wuh jītā rahegā.”

¹³lekin masīh ne hamārā fidyā de kar hameṅ sharīat kī lānat se āzād kar diyā hai. yih us ne is tarah kiyā ki wuh hamārī ḳhātir ḳhud lānat banā. kyūṅki kalām-e-muqaddas meṅ likhā hai, “jise bhī daraḳht se laṭkāyā gayā hai us par allāh kī lānat hai.”

¹⁴is kā maqsad yih thā ki jo barkat ibrāhīm ko hāsil huī wuh masīh ke wasīle se ġhairyahūdiyoṅ ko bhī mile aur yūṅ ham īmān lā kar wādā kiyā huā rūh pāeṅ.

¹⁵bhāiyo, insānī zindagī kī ek misāl leṅ. jab do pārṭiyāṅ kisī muāmale meṅ muttafiq ho kar muāhadā kartī haiṅ to koī is muāhade ko mansūḳh yā is meṅ izāfā nahīṅ kar saktā.

¹⁶ab ġhaur kareṅ ki allāh ne apne wāde ibrāhīm aur us kī aulād se hī kie. lekin jo lafz ibrānī meṅ aulād ke lie istemāl huā hai is se murād bahut se afrād nahīṅ balki ek fard hai aur wuh hai masīh.

¹⁷kahne se murād yih hai ki allāh ne ibrāhīm se ahd bāndh kar use qāim rakhne kā wādā kiyā. sharīat jo 430 sāl ke bād dī gaī is ahd ko radd karke allāh kā wādā mansūḳh nahīṅ kar saktī.

¹⁸kyūṅki agar ibrāhīm kī mīrās sharīat kī pairawī karne se miltī to phir wuh allāh ke wāde par munhasir na hotī. lekin aisā nahīṅ thā. allāh ne ise apne wāde kī binā par ibrāhīm ko de diyā.

¹⁹to phir sharīat kā kyā maqsad thā? use is lie wāde ke ilāwā diyā gayā tāki logoṅ ke gunāhoṅ ko zāhir kare. aur use us waqt tak qāim rahnā thā jab tak ibrāhīm kī wuh aulād na ā jātī jis se wādā kiyā gayā thā. allāh ne apnī sharīat farishtoṅ ke wasīle se mūsā ko de dī jo allāh aur logoṅ ke bīch meṅ darmiyānī rahā.

²⁰ab darmiyānī us waqt zarūrī hotā hai jab ek se zyādā pārṭiyoṅ meṅ ittifāq karāne kī zarūrat hai. lekin allāh jo ek hī hai us ne darmiyānī istemāl na kiyā jab us ne ibrāhīm se wādā kiyā.

²¹to kyā is kā matlab yih hai ki sharīat allāh ke wādoṅ ke ḳhilāf hai? hargiz nahīṅ! agar insān ko aisī sharīat milī hotī jo zindagī dilā saktī to phir sab us kī pairawī karne se rāstbāz ṭhaharte.

²²lekin kalām-e-muqaddas farmātā hai ki pūrī duniyā gunāh ke qabze meṅ hai. chunāṅche hameṅ allāh kā wādā sirf īsā masīh par īmān lāne se hāsil hotā hai.

²³is se pahle ki īmān kī yih rāh dastyāb huī sharīat ne hameṅ qaid karke mahfūz rakhā thā. is qaid meṅ ham us waqt tak rahe jab tak īmān kī rāh zāhir nahīṅ huī thī.

²⁴yūṅ sharīat ko hamārī tarbiyat karne kī zimmādārī dī gaī. use hameṅ masīh tak pahuṅchānā thā tāki hameṅ īmān se rāstbāz qarār diyā jāe.

²⁵ab chūṅki īmān kī rāh ā gaī hai is lie ham sharīat kī tarbiyat ke taht nahīṅ rahe.

²⁶kyūṅki masīh īsā par īmān lāne se āp sab allāh ke farzand ban gae haiṅ.

²⁷āp meṅ se jitnoṅ ko masīh meṅ baptismā diyā gayā unhoṅ ne masīh ko pahan liyā.

²⁸ab na yahūdī rahā na ġhairyahūdī, na ġhulām rahā na āzād, na mard rahā na aurat. masīh īsā meṅ āp sab ke sab ek haiṅ.

²⁹shart yih hai ki āp masīh ke hoṅ. tab āp ibrāhīm kī aulād aur un chīzoṅ ke wāris haiṅ jin kā wādā allāh ne kiyā hai.