Read Roman Urdu Geo galatiyoṅ 5 Bible Online

galatiyoṅ 5 - Roman Urdu Geo bible

galatiyoṅ 5

¹masīh ne hameṅ āzād rahne ke lie hī āzād kiyā hai. to ab qāim raheṅ aur dubārā apne gale meṅ ġhulāmī kā jūā ḍālne na deṅ.

²suneṅ! maiṅ paulus āp ko batātā hūṅ ki agar āp apnā ḳhatnā karwāeṅ to āp ko masīh kā koī fāidā nahīṅ hogā.

³maiṅ ek bār phir is bāt kī tasdīq kartā hūṅ ki jis ne bhī apnā ḳhatnā karwāyā us kā farz hai ki wuh pūrī sharīat kī pairawī kare.

⁴āp jo sharīat kī pairawī karne se rāstbāz bananā chāhte haiṅ āp kā masīh ke sāth koī wāstā na rahā. hāṅ, āp allāh ke fazl se dūr ho gae haiṅ.

⁵lekin hameṅ ek farq ummīd dilāī gaī hai. ummīd yih hai ki ḳhudā hī hameṅ rāstbāz qarār detā hai. chunāṅche ham rūh-ul-quds ke bāis īmān rakh kar isī rāstbāzī ke lie taṛapte rahte haiṅ.

⁶kyūṅki jab ham masīh īsā meṅ hote haiṅ to ḳhatnā karwāne yā na karwāne se koī farq nahīṅ paṛtā. farq sirf us īmān se paṛtā hai jo muhabbat karne se zāhir hotā hai.

⁷āp īmān kī dauṛ meṅ achchhī taraqqī kar rahe the! to phir kis ne āp ko sachchāī kī pairawī karne se rok liyā?

⁸kis ne āp ko ubhārā? allāh to nahīṅ thā jo āp ko bulātā hai.

⁹dekheṅ, thoṛā sā ḳhamīr tamām gundhe hue āṭe ko ḳhamīr kar detā hai.

¹⁰mujhe ḳhudāwand meṅ āp par itnā etimād hai ki āp yihī soch rakhte haiṅ. jo bhī āp meṅ afrā-tafrī paidā kar rahā hai use sazā milegī.

¹¹bhāiyo, jahāṅ tak merā tālluq hai, agar maiṅ yih paiġhām detā ki ab tak ḳhatnā karwāne kī zarūrat hai to merī īzārasānī kyūṅ ho rahī hotī? agar aisā hotā to log masīh ke maslūb hone ke bāre meṅ sun kar ṭhokar na khāte.

¹²behtar hai ki āp ko pareshān karne wāle na sirf apnā ḳhatnā karwāeṅ balki ḳhoje ban jāeṅ.

¹³bhāiyo, āp ko āzād hone ke lie bulāyā gayā hai. lekin ḳhabardār raheṅ ki is āzādī se āp kī gunāhālūdā fitrat ko amal meṅ āne kā mauqā na mile. is ke bajāe muhabbat kī rūh meṅ ek dūsre kī ḳhidmat kareṅ.

¹⁴kyūṅki pūrī sharīat ek hī hukm meṅ samāī huī hai, “apne paṛosī se waisī muhabbat rakhnā jaisī tū apne āp se rakhtā hai.”

¹⁵agar āp ek dūsre ko kāṭte aur phāṛte haiṅ to ḳhabardār! aisā na ho ki āp ek dūsre ko ḳhatm karke sab ke sab tabāh ho jāeṅ.

¹⁶maiṅ to yih kahtā hūṅ ki rūh-ul-quds meṅ zindagī guzāreṅ. phir āp apnī purānī fitrat kī ḳhwāhishāt pūrī nahīṅ kareṅge.

¹⁷kyūṅki jo kuchh hamārī purānī fitrat chāhtī hai wuh us ke ḳhilāf hai jo rūh chāhtā hai, aur jo kuchh rūh chāhtā hai wuh us ke ḳhilāf hai jo hamārī purānī fitrat chāhtī hai. yih donoṅ ek dūsre ke dushman haiṅ, is lie āp wuh kuchh nahīṅ kar pāte jo āp karnā chāhte haiṅ.

¹⁸lekin jab rūh-ul-quds āp kī rāhnumāī kartā hai to āp sharīat ke tābe nahīṅ hote.

¹⁹jo kām purānī fitrat kartī hai wuh sāf zāhir hotā hai. masalan zinākārī, nāpākī, ayyāshī,

²⁰butparastī, jādūgarī, dushmanī, jhagaṛā, hasad, ġhussā, ḳhudġharzī, anban, pārṭībāzī,

²¹jalan, nashābāzī, rangraliyāṅ waġhairā. maiṅ pahle bhī āp ko āgāh kar chukā hūṅ, lekin ab ek bār phir kahtā hūṅ ki jo is tarah kī zindagī guzārte haiṅ wuh allāh kī bādshāhī mīrās meṅ nahīṅ pāeṅge.

²²rūh-ul-quds kā phal farq hai. wuh muhabbat, ḳhushī, sulah-salāmatī, sabr, mehrbānī, nekī, wafādārī,

²³narmī aur zabt-e-nafs paidā kartā hai. sharīat aisī chīzoṅ ke ḳhilāf nahīṅ hotī.

²⁴aur jo masīh īsā ke haiṅ unhoṅ ne apnī purānī fitrat ko us kī raġhbatoṅ aur burī ḳhwāhishoṅ samet maslūb kar diyā hai.

²⁵chūṅki ham rūh meṅ zindagī guzārte haiṅ is lie āeṅ, ham qadam-ba-qadam us ke mutābiq chalte bhī raheṅ.

²⁶na ham maġhrūr hoṅ, na ek dūsre ko mushta'il kareṅ yā ek dūsre se hasad kareṅ.