Read Roman Urdu Geo ifisiyoṅ 3 Bible Online

ifisiyoṅ 3 - Roman Urdu Geo bible

ifisiyoṅ 3

¹is wajah se maiṅ paulus jo āp ġhairyahūdiyoṅ kī ḳhātir masīh īsā kā qaidī hūṅ allāh se duā kartā hūṅ.

²āp ne to sun liyā hai ki mujhe āp meṅ allāh ke fazl kā intizām chalāne [1] kī ḳhās zimmādārī dī gaī hai.

³jis tarah maiṅ ne pahle hī muḳhtasar taur par likhā hai, allāh ne ḳhud mujh par yih rāz zāhir kar diyā.

⁴jab āp wuh paṛheṅge jo maiṅ ne likhā to āp jān leṅge ki mujhe masīh ke rāz ke bāre meṅ kyā kyā samajh āī hai.

⁵guzare zamānoṅ meṅ allāh ne yih bāt zāhir nahīṅ kī, lekin ab us ne ise rūh-ul-quds ke zarī'e apne muqaddas rasūloṅ aur nabiyoṅ par zāhir kar diyā.

⁶aur allāh kā rāz yih hai ki us kī ḳhushḳhabrī ke zarī'e ġhairyahūdī isrāīl ke sāth āsmānī bādshāhī ke wāris, ek hī badan ke āzā aur usī wāde meṅ sharīk haiṅ jo allāh ne masīh īsā meṅ kiyā hai.

⁷maiṅ allāh ke muft fazl aur us kī qudrat ke izhār se ḳhushḳhabrī kā ḳhādim ban gayā.

⁸agarche maiṅ allāh ke tamām muqaddasīn se kamtar hūṅ to bhī us ne mujhe yih fazl baḳhshā ki maiṅ ġhairyahūdiyoṅ ko us lā-mahdūd daulat kī ḳhushḳhabrī sunāūṅ jo masīh meṅ dastyāb hai.

⁹yihī merī zimmādārī ban gaī ki maiṅ sab par us rāz kā intizām zāhir karūṅ jo guzare zamānoṅ meṅ sab chīzoṅ ke ḳhāliq ḳhudā meṅ poshīdā rahā.

¹⁰kyūṅki allāh chāhtā thā ki ab masīh kī jamā'at hī āsmānī hukmrānoṅ aur kuwwatoṅ ko allāh kī wasī hikmat ke bāre meṅ ilm pahuṅchāe.

¹¹yihī us kā azlī mansūbā thā jo us ne hamāre ḳhudāwand masīh īsā ke wasīle se takmīl tak pahuṅchāyā.

¹²us meṅ aur us par īmān rakh kar ham pūrī āzādī aur etimād ke sāth allāh ke huzūr ā sakte haiṅ.

¹³is lie merī āp se guzārish hai ki āp merī musībateṅ dekh kar bedil na ho jāeṅ. yih maiṅ āp kī ḳhātir bardāsht kar rahā hūṅ, aur yih āp kī izzat kā bāis haiṅ.

¹⁴is wajah se maiṅ bāp ke huzūr apne ghuṭne ṭektā hūṅ,

¹⁵us bāp ke sāmne jis se āsmān-o-zamīn kā har ḳhāndān nāmzad hai.

¹⁶merī duā hai ki wuh apne jalāl kī daulat ke muwāfiq yih baḳhshe ki āp us ke rūh ke wasīle se bātinī taur par zabardast taqwiyat pāeṅ,

¹⁷ki masīh īmān ke zarī'e āp ke diloṅ meṅ sukūnat kare. hāṅ, merī duā hai ki āp muhabbat meṅ jaṛ pakaṛeṅ aur is bunyād par zindagī yūṅ guzāreṅ

¹⁸ki āp bāqī tamām muqaddasīn ke sāth yih samajhne ke qābil ban jāeṅ ki masīh kī muhabbat kitnī chauṛī, kitnī lambī, kitnī ūṅchī aur kitnī gahrī hai.

¹⁹ḳhudā kare ki āp masīh kī yih muhabbat jān leṅ jo har ilm se kahīṅ afzal hai aur yūṅ allāh kī pūrī māmūrī se bhar jāeṅ.

²⁰allāh kī tamjīd ho jo apnī us qudrat ke muwāfiq jo ham meṅ kām kar rahī hai aisā zabardast kām kar saktā hai jo hamārī har soch aur duā se kahīṅ bāhar hai.

²¹hāṅ, masīh īsā aur us kī jamā'at meṅ allāh kī tamjīd pusht-dar-pusht aur azal se abad tak hotī rahe. āmīn.