Read Roman Urdu Geo ifisiyoṅ 4 Bible Online

ifisiyoṅ 4 - Roman Urdu Geo bible

ifisiyoṅ 4

¹chunāṅche maiṅ jo ḳhudāwand meṅ qaidī hūṅ āp ko tākīd kartā hūṅ ki us zindagī ke mutābiq chaleṅ jis ke lie ḳhudā ne āp ko bulāyā hai.

²har waqt halīm aur narmdil raheṅ, sabar se kām leṅ aur ek dūsre se muhabbat rakh kar use bardāsht kareṅ.

³sulah-salāmatī ke bandhan meṅ rah kar rūh kī yagāngat qāim rakhne kī pūrī koshish kareṅ.

⁴ek hī badan aur ek hī rūh hai. yūṅ āp ko bhī ek hī ummīd ke lie bulāyā gayā.

⁵ek ḳhudāwand, ek īmān, ek baptismā hai.

⁶ek ḳhudā hai, jo sab kā wāhid bāp hai. wuh sab kā mālik hai, sab ke zarī'e kām kartā hai aur sab meṅ maujūd hai.

⁷ab ham sab ko allāh kā fazl baḳhshā gayā. lekin masīh har ek ko muḳhtalif paimāne se yih fazl atā kartā hai.

⁸is lie kalām-e-muqaddas farmātā hai, “us ne bulandī par chaṛh kar qaidiyoṅ kā hujūm giriftār kar liyā aur ādmiyoṅ ko tohfe die.”

⁹ab ġhaur kareṅ ki chaṛhnī kā zikr kiyā gayā hai. is kā matlab hai ki pahle wuh zamīn kī gahrāiyoṅ meṅ utrā.

¹⁰jo utrā wuh wuhī hai jo tamām āsmānoṅ se ūṅchā chaṛh gayā tāki tamām kāināt ko apne āp se māmūr kare.

¹¹usī ne apnī jamā'at ko tarah tarah ke ḳhādimoṅ se nawāzā. bāz rasūl, bāz nabī, bāz mubashshir, bāz charwāhe aur bāz ustād haiṅ.

¹²in kā maqsad yih hai ki muqaddasīn ko ḳhidmat karne ke lie tayyār kiyā jāe aur yūṅ masīh ke badan kī tāmīr-o-taraqqī ho jāe.

¹³is tarīqe se ham sab īmān aur allāh ke farzand kī pahchān meṅ ek ho kar bāliġh ho jāeṅge, aur ham mil kar masīh kī māmūrī aur balūġhat ko mun'akis kareṅge.

¹⁴phir ham bachche nahīṅ raheṅge, aur tālīm ke har ek jhoṅke se uchhalte phirte nahīṅ raheṅge jab log apnī chālākī aur dhokebāzī se hameṅ apne jāloṅ meṅ phaṅsāne kī koshish kareṅge.

¹⁵is ke bajāe ham muhabbat kī rūh meṅ sachchī bāt karke har lihāz se masīh kī taraf baṛhte jāeṅge jo hamārā sar hai.

¹⁶wuhī nasoṅ ke zarī'e pūre badan ke muḳhtalif hissoṅ ko ek dūsre ke sāth joṛ kar muttahid kar detā hai. har hissā apnī tāqat ke muwāfiq kām kartā hai, aur yūṅ pūrā badan muhabbat kī rūh meṅ baṛhtā aur apnī tāmīr kartā rahtā hai.

¹⁷pas maiṅ ḳhudāwand ke nām meṅ āp ko āgāh kartā hūṅ ki ab se ġhairīmāndāroṅ kī tarah zindagī na guzāreṅ jin kī soch bekār hai

¹⁸aur jin kī samajh andhere kī girift meṅ hai. un kā us zindagī meṅ koī hissā nahīṅ jo allāh detā hai, kyūṅki wuh jāhil haiṅ aur un ke dil saḳht ho gae haiṅ.

¹⁹behiss ho kar unhoṅ ne apne āp ko ayyāshī ke hawāle kar diyā. yūṅ wuh na bujhne wālī pyās ke sāth har qism kī nāpāk harkateṅ karte haiṅ.

²⁰lekin āp ne masīh ko yūṅ nahīṅ jānā.

²¹āp ne to us ke bāre meṅ sun liyā hai, aur us meṅ ho kar āp ko wuh sachchāī sikhāī gaī jo īsā meṅ hai.

²²chunāṅche apne purāne insān ko us ke purāne chāl-chalan samet utār denā, kyūṅki wuh apnī dhokebāz shahwatoṅ se bigaṛtā jā rahā hai.

²³allāh ko āp kī soch kī tajdīd karne deṅ

²⁴aur nae insān ko pahan leṅ jo yūṅ banāyā gayā hai ki wuh haqīqī rāstbāzī aur quddūsiyat meṅ allāh ke mushābeh hai.

²⁵is lie har shaḳhs jhūṭ se bāz rah kar dūsroṅ se sach bāt kare, kyūṅki ham sab ek hī badan ke āzā haiṅ.

²⁶ġhusse meṅ āte waqt gunāh mat karnā. āp kā ġhussā sūraj ke ġhurūb hone tak ṭhanḍā ho jāe,

²⁷warnā āp iblīs ko apnī zindagī meṅ kām karne kā mauqā deṅge.

²⁸chor ab se chorī na kare balki ḳhūb mehnat-mashaqqat karke apne hāthoṅ se achchhā kām kare. hāṅ, wuh itnā kamāe ki zarūratmandoṅ ko bhī kuchh de sake.

²⁹koī bhī burī bāt āp ke muṅh se na nikle balki sirf aisī bāteṅ jo dūsroṅ kī zarūriyāt ke mutābiq un kī tāmīr kareṅ. yūṅ sunane wāloṅ ko barkat milegī.

³⁰allāh ke muqaddas rūh ko dukh na pahuṅchānā, kyūṅki usī se allāh ne āp par muhr lagā kar yih zamānat de dī hai ki āp usī ke haiṅ aur najāt ke din bach jāeṅge.

³¹tamām tarah kī talḳhī, taish, ġhusse, shor-sharābā, gālī-galoch balki har qism ke bure rawayye se bāz āeṅ.

³²ek dūsre par mehrbān aur rahmdil hoṅ aur ek dūsre ko yūṅ muāf kareṅ jis tarah allāh ne āp ko bhī masīh meṅ muāf kar diyā hai.