Read Roman Urdu Geo ifisiyoṅ 5 Bible Online

ifisiyoṅ 5 - Roman Urdu Geo bible

ifisiyoṅ 5

¹chūṅki āp allāh ke pyāre bachche haiṅ is lie us ke namūne par chaleṅ.

²muhabbat kī rūh meṅ zindagī yūṅ guzāreṅ jaise masīh ne guzārī. kyūṅki us ne ham se muhabbat rakh kar apne āp ko hamāre lie allāh ke huzūr qurbān kar diyā aur yūṅ aisī qurbānī ban gayā jis kī ḳhushbū allāh ko pasand āī.

³āp ke darmiyān zinākārī, har tarah kī nāpākī yā lālach kā zikr tak na ho, kyūṅki yih allāh ke muqaddasīn ke lie munāsib nahīṅ hai.

⁴isī tarah sharmnāk, ahmaqānā yā gandī bāteṅ bhī ṭhīk nahīṅ. in kī jagah shukrguzārī honī chāhie.

⁵kyūṅki yaqīn jāneṅ ki zinākār, nāpāk yā lālchī masīh aur allāh kī bādshāhī meṅ mīrās nahīṅ pāeṅge (lālach to ek qism kī butparastī hai).

⁶koī āp ko bemānī alfāz se dhokā na de. aisī hī bātoṅ kī wajah se allāh kā ġhazab un par jo nāfarmān haiṅ nāzil hotā hai.

⁷chunāṅche un meṅ sharīk na ho jāeṅ jo yih karte haiṅ.

⁸kyūṅki pahle āp tārīkī the, lekin ab āp ḳhudāwand meṅ raushnī haiṅ. raushnī ke farzand kī tarah zindagī guzāreṅ,

⁹kyūṅki raushnī kā phal har tarah kī bhalāī, rāstbāzī aur sachchāī hai.

¹⁰aur mālūm karte raheṅ ki ḳhudāwand ko kyā kuchh pasand hai.

¹¹tārīkī ke bephal kāmoṅ meṅ hissā na leṅ balki unheṅ raushnī meṅ lāeṅ.

¹²kyūṅki jo kuchh yih log poshīdagī meṅ karte haiṅ us kā zikr karnā bhī sharm kī bāt hai.

¹³lekin sab kuchh beniqāb ho jātā hai jab use raushnī meṅ lāyā jātā hai.

¹⁴kyūṅki jo raushnī meṅ lāyā jātā hai wuh raushan ho jātā hai. is lie kahā jātā hai, “ai sone wāle, jāg uṭh. murdoṅ meṅ se jī uṭh, to masīh tujh par chamkegā.”

¹⁵chunāṅche baṛī ehtiyāt se is par dhyān deṅ ki āp zindagī kis tarah guzārte haiṅ - besamajh yā samajhdār logoṅ kī tarah.

¹⁶har mauqe se pūrā fāidā uṭhāeṅ, kyūṅki din bure haiṅ.

¹⁷is lie ahmaq na baneṅ balki ḳhudāwand kī marzī ko samjheṅ.

¹⁸sharāb meṅ matwāle na ho jāeṅ, kyūṅki is kā anjām ayyāshī hai. is ke bajāe rūh-ul-quds se māmūr hote jāeṅ.

¹⁹zabūroṅ, hamd-o-sanā aur ruhānī gītoṅ se ek dūsre kī hauslā-afzāī kareṅ. apne diloṅ meṅ ḳhudāwand ke lie gīt gāeṅ aur naġhmāsarāī kareṅ.

²⁰hāṅ, har waqt hamāre ḳhudāwand īsā masīh ke nām meṅ har chīz ke lie shukr kareṅ.

²¹masīh ke ḳhauf meṅ ek dūsre ke tābe raheṅ.

²²bīwiyo, jis tarah āp ḳhudāwand ke tābe haiṅ usī tarah apne shauhar ke tābe bhī raheṅ.

²³kyūṅki shauhar waise hī apnī bīwī kā sar hai jaise masīh apnī jamā'at kā. hāṅ, jamā'at masīh kā badan hai jise us ne najāt dī hai.

²⁴ab jis tarah jamā'at masīh ke tābe hai usī tarah bīwiyāṅ bhī apne shauharoṅ ke tābe raheṅ.

²⁵shauharo, apnī bīwiyoṅ se muhabbat rakheṅ, bilkul usī tarah jis tarah masīh ne apnī jamā'at se muhabbat rakh kar apne āp ko us ke lie qurbān kiyā

²⁶tāki use allāh ke lie maḳhsūs-o-muqaddas kare. us ne use kalām-e-pāk se dho kar pāk-sāf kar diyā

²⁷tāki apne āp ko ek aisī jamā'at pesh kare jo jalālī, muqaddas aur be'ilzām ho, jis meṅ na koī dāġh ho, na koī jhurrī, na kisī aur qism kā nuqs.

²⁸shauharoṅ kā farz hai ki wuh apnī bīwiyoṅ se aisī hī muhabbat rakheṅ. hāṅ, wuh un se waisī muhabbat rakheṅ jaisī apne jism se rakhte haiṅ. kyūṅki jo apnī bīwī se muhabbat rakhtā hai wuh apne āp se hī muhabbat rakhtā hai.

²⁹āḳhir koī bhī apne jism se nafrat nahīṅ kartā balki use ḳhurāk muhayyā kartā aur pāltā hai. masīh bhī apnī jamā'at ke lie yihī kuchh kartā hai.

³⁰kyūṅki ham us ke badan ke āzā haiṅ.

³¹kalām-e-muqaddas meṅ bhī likhā hai, “is lie mard apne māṅ-bāp ko chhoṛ kar apnī bīwī ke sāth paiwast ho jātā hai. wuh donoṅ ek ho jāte haiṅ.”

³²yih rāz bahut gahrā hai. maiṅ to us kā itlāq masīh aur us kī jamā'at par kartā hūṅ.

³³lekin is kā itlāq āp par bhī hai. har shauhar apnī bīwī se is tarah muhabbat rakhe jis tarah wuh apne āp se rakhtā hai. aur har bīwī apne shauhar kī izzat kare.