Read Roman Urdu Geo ifisiyoṅ 6 Bible Online

ifisiyoṅ 6 - Roman Urdu Geo bible

ifisiyoṅ 6

¹bachcho, ḳhudāwand meṅ apne māṅ-bāp ke tābe raheṅ, kyūṅki yihī rāstbāzī kā taqāzā hai.

²kalām-e-muqaddas meṅ likhā hai, “apne bāp aur apnī māṅ kī izzat karnā.” yih pahlā hukm hai jis ke sāth ek wādā bhī kiyā gayā hai,

³“phir tū ḳhushhāl aur zamīn par der tak jītā rahegā.”

⁴ai wālido, apne bachchoṅ se aisā sulūk mat kareṅ ki wuh ġhusse ho jāeṅ balki unheṅ ḳhudāwand kī taraf se tarbiyat aur hidāyat de kar pāleṅ.

⁵ġhulāmo, ḍarte aur kāṅpte hue apne insānī mālikoṅ ke tābe raheṅ. ḳhulūsdilī se un kī ḳhidmat yūṅ kareṅ jaise masīh kī.

⁶na sirf un ke sāmne hī aur unheṅ ḳhush rakhne ke lie ḳhidmat kareṅ balki masīh ke ġhulāmoṅ kī haisiyat se jo pūrī lagan se allāh kī marzī pūrī karnā chāhte haiṅ.

⁷ḳhushī se ḳhidmat kareṅ, is tarah jaisā ki āp na sirf insānoṅ kī balki ḳhudāwand kī ḳhidmat kar rahe hoṅ.

⁸āp to jānte haiṅ ki jo bhī achchhā kām ham ne kiyā us kā ajr ḳhudāwand degā, ḳhwāh ham ġhulām hoṅ yā āzād.

⁹aur māliko, āp bhī apne ġhulāmoṅ se aisā hī sulūk kareṅ. unheṅ dhamkiyāṅ na deṅ. āp ko to mālūm hai ki āsmān par āp kā bhī mālik hai aur ki wuh jānibdār nahīṅ hotā.

¹⁰ek āḳhirī bāt, ḳhudāwand aur us kī zabardast quwwat meṅ tāqatwar ban jāeṅ.

¹¹allāh kā pūrā zirābaktar pahan leṅ tāki iblīs kī chāloṅ kā sāmnā kar sakeṅ.

¹²kyūṅki hamārī jang insān ke sāth nahīṅ hai balki hukmrānoṅ aur iḳhtiyār wāloṅ ke sāth, is tārīk duniyā ke hākimoṅ ke sāth aur āsmānī duniyā kī shaitānī kuwwatoṅ ke sāth hai.

¹³chunāṅche allāh kā pūrā zirābaktar pahan leṅ tāki āp musībat ke din iblīs ke hamloṅ kā sāmnā kar sakeṅ balki sab kuchh saranjām dene ke bād qāim rah sakeṅ.

¹⁴ab yūṅ khaṛe ho jāeṅ ki āp kī kamr meṅ sachchāī kā paṭkā bandhā huā ho, āp ke sīne par rāstbāzī kā sīnāband lagā ho

¹⁵aur āp ke pāoṅ meṅ aise jūte hoṅ jo sulah-salāmatī kī ḳhushḳhabrī sunāne ke lie tayyār raheṅ.

¹⁶is ke ilāwā īmān kī ḍhāl bhī uṭhāe rakheṅ, kyūṅki is se āp iblīs ke jalte hue tīr bujhā sakte haiṅ.

¹⁷apne sar par najāt kā ḳhod pahan kar hāth meṅ rūh kī talwār jo allāh kā kalām hai thāme rakheṅ.

¹⁸aur har mauqe par rūh meṅ har tarah kī duā aur minnat karte raheṅ. jāgte aur sābitqadmī se tamām muqaddasīn ke lie duā karte raheṅ.

¹⁹mere lie bhī duā kareṅ ki jab bhī maiṅ apnā muṅh kholūṅ allāh mujhe aise alfāz atā kare ki pūrī dilerī se us kī ḳhushḳhabrī kā rāz sunā sakūṅ.

²⁰kyūṅki maiṅ isī paiġhām kī ḳhātir qaidī, hāṅ zanjīroṅ meṅ jakaṛā huā masīh kā elchī hūṅ. duā kareṅ ki maiṅ masīh meṅ utnī dilerī se yih paiġhām sunāūṅ jitnā mujhe karnā chāhie.

²¹āp mere hāl aur kām ke bāre meṅ bhī jānanā chāheṅge. ḳhudāwand meṅ hamārā azīz bhāī aur wafādār ḳhādim tuḳhikus āp ko yih sab kuchh batā degā.

²²maiṅ ne use isī lie āp ke pās bhej diyā ki āp ko hamāre hāl kā patā chale aur āp ko tasallī mile.

²³ḳhudā bāp aur ḳhudāwand īsā masīh āp bhāiyoṅ ko salāmatī aur īmān ke sāth muhabbat atā kareṅ.

²⁴allāh kā fazl un sab ke sāth ho jo anmiṭ muhabbat ke sāth hamāre ḳhudāwand īsā masīh ko pyār karte haiṅ.