Read Roman Urdu Geo filippiyoṅ 1 Bible Online

filippiyoṅ 1 - Roman Urdu Geo bible

filippiyoṅ 1

¹yih ḳhat masīh īsā ke ġhulāmoṅ paulus aur tīmuthiyus kī taraf se hai. maiṅ filippī meṅ maujūd un tamām logoṅ ko likh rahā hūṅ jinheṅ allāh ne masīh īsā ke zarī'e maḳhsūs-o-muqaddas kiyā hai. maiṅ un ke buzurgoṅ aur ḳhādimoṅ ko bhī likh rahā hūṅ.

²ḳhudā hamārā bāp aur ḳhudāwand īsā masīh āp ko fazl aur salāmatī atā kareṅ.

³jab bhī maiṅ āp ko yād kartā hūṅ to apne ḳhudā kā shukr kartā hūṅ.

⁴āp ke lie tamām duāoṅ meṅ maiṅ hameshā ḳhushī se duā kartā hūṅ,

⁵is lie ki āp pahle din se le kar āj tak allāh kī ḳhushḳhabrī phailāne meṅ mere sharīk rahe haiṅ.

⁶aur mujhe yaqīn hai ki allāh jis ne āp meṅ yih achchhā kām shurū kiyā hai ise us din takmīl tak pahuṅchāegā jab masīh īsā wāpas āegā.

⁷aur munāsib hai ki āp sab ke bāre meṅ merā yihī ḳhayāl ho, kyūṅki āp mujhe azīz rakhte haiṅ. hāṅ, jab mujhe jel meṅ ḍālā gayā yā maiṅ allāh kī ḳhushḳhabrī kā difā yā us kī tasdīq kar rahā thā to āp bhī mere is ḳhās fazl meṅ sharīk hue.

⁸allāh merā gawāh hai ki maiṅ kitnī shiddat se āp sab kā ārzūmand hūṅ. hāṅ, maiṅ masīh kī sī dilī shafqat ke sāth āp kā ḳhwāhishmand hūṅ.

⁹aur merī duā hai ki āp kī muhabbat meṅ ilm-o-irfān aur har tarah kī ruhānī basīrat kā yahāṅ tak izāfā ho jāe ki wuh baṛhtī baṛhtī dil se chhalak uṭhe.

¹⁰kyūṅki yih zarūrī hai tāki āp wuh bāteṅ qabūl kareṅ jo bunyādī ahmiyat kī hāmil haiṅ aur āp masīh kī āmad tak belaus aur be'ilzām zindagī guzāreṅ.

¹¹aur yūṅ āp us rāstbāzī ke phal se bhare raheṅge jo āp ko īsā masīh ke wasīle se hāsil hotī hai. phir āp apnī zindagī se allāh ko jalāl deṅge aur us kī tamjīd kareṅge.

¹²bhāiyo, maiṅ chāhtā hūṅ ki yih bāt āp ke ilm meṅ ho ki jo kuchh bhī mujh par guzarā hai wuh haqīqat meṅ allāh kī ḳhushḳhabrī ke phailāo kā bāis ban gayā hai.

¹³kyūṅki praiṭoriyum [1] ke tamām afrād aur bāqī sab ko mālūm ho gayā hai ki maiṅ masīh kī ḳhātir qaidī hūṅ.

¹⁴aur mere qaid meṅ hone kī wajah se ḳhudāwand meṅ zyādātar bhāiyoṅ kā etimād itnā baṛh gayā hai ki wuh mazīd dilerī ke sāth bilāḳhauf allāh kā kalām sunāte haiṅ.

¹⁵beshak bāz to hasad aur muḳhālafat ke bāis masīh kī munādī kar rahe haiṅ, lekin bāqiyoṅ kī nīyat achchhī hai,

¹⁶kyūṅki wuh jānte haiṅ ki maiṅ allāh kī ḳhushḳhabrī ke difā kī wajah se yahāṅ paṛā hūṅ. is lie wuh muhabbat kī rūh meṅ tablīġh karte haiṅ.

¹⁷is ke muqābale meṅ dūsre ḳhulūsdilī se masīh ke bāre meṅ paiġhām nahīṅ sunāte balki ḳhudġharzī se. yih samajhte haiṅ ki ham is tarah paulus kī giriftārī ko mazīd taqlīfdih banā sakte haiṅ.

¹⁸lekin is se kyā farq paṛtā hai! aham bāt to yih hai ki masīh kī munādī har tarah se kī jā rahī hai, ḳhwāh munād kī nīyat purḳhulūs ho yā na. aur is wajah se maiṅ ḳhush hūṅ. aur ḳhush rahūṅgā bhī,

¹⁹kyūṅki maiṅ jāntā hūṅ ki yih mere lie rihāī kā bāis banegā, is lie ki āp mere lie duā kar rahe haiṅ aur īsā masīh kā rūh merī himāyat kar rahā hai.

²⁰hāṅ, yih merī pūrī tawaqqo aur ummīd hai. maiṅ yih bhī jāntā hūṅ ki mujhe kisī bhī bāt meṅ sharmindā nahīṅ kiyā jāegā balki jaisā māzī meṅ hameshā huā ab bhī mujhe baṛī dilerī se masīh ko jalāl dene kā fazl milegā, ḳhwāh maiṅ zindā rahūṅ yā mar jāūṅ.

²¹kyūṅki mere lie masīh zindagī hai aur maut nafā kā bāis.

²²agar maiṅ zindā rahūṅ to is kā fāidā yih hogā ki maiṅ mehnat karke mazīd phal lā sakūṅgā. chunāṅche maiṅ nahīṅ kah saktā ki kyā behtar hai.

²³maiṅ baṛī kash-ma-kash meṅ rahtā hūṅ. ek taraf maiṅ kūch karke masīh ke pās hone kī ārzū rakhtā hūṅ, kyūṅki yih mere lie sab se behtar hotā.

²⁴lekin dūsrī taraf zyādā zarūrī yih hai ki maiṅ āp kī ḳhātir zindā rahūṅ.

²⁵aur chūṅki mujhe is zarūrat kā yaqīn hai, is lie maiṅ jāntā hūṅ ki maiṅ zindā rah kar dubārā āp sab ke sāth rahūṅgā tāki āp taraqqī kareṅ aur īmān meṅ ḳhush raheṅ.

²⁶hāṅ, mere āp ke pās wāpas āne se āp mere sabab se masīh īsā par had se zyādā faḳhr kareṅge.

²⁷lekin āp har sūrat meṅ masīh kī ḳhushḳhabrī aur āsmān ke shahriyoṅ ke lāiq zindagī guzāreṅ. phir ḳhwāh maiṅ ā kar āp ko dekhūṅ, ḳhwāh ġhairmaujūdagī meṅ āp ke bāre meṅ sunūṅ, mujhe mālūm hogā ki āp ek rūh meṅ qāim haiṅ, āp mil kar yakdilī se us īmān ke lie jāṅfishānī kar rahe haiṅ jo allāh kī ḳhushḳhabrī se paidā huā hai,

²⁸aur āp kisī sūrat meṅ apne muḳhālifoṅ se dahshat nahīṅ khāte. yih un ke lie ek nishān hogā ki wuh halāk ho jāeṅge jabki āp ko najāt hāsil hogī, aur wuh bhī allāh se.

²⁹kyūṅki āp ko na sirf masīh par īmān lāne kā fazl hāsil huā hai balki us kī ḳhātir dukh uṭhāne kā bhī.

³⁰āp bhī us muqābale meṅ jāṅfishānī kar rahe haiṅ jis meṅ āp ne mujhe dekhā hai aur jis ke bāre meṅ āp ne ab sun liyā hai ki maiṅ ab tak us meṅ masrūf hūṅ.