Read Roman Urdu Geo filippiyoṅ 2 Bible Online

filippiyoṅ 2 - Roman Urdu Geo bible

filippiyoṅ 2

¹kyā āp ke darmiyān masīh meṅ hauslā-afzāī, muhabbat kī tasallī, rūh-ul-quds kī rifāqat, narmdilī aur rahmat pāī jātī hai?

²agar aisā hai to merī ḳhushī is meṅ pūrī kareṅ ki āp ek jaisī soch rakheṅ aur ek jaisī muhabbat rakheṅ, ek jān aur ek zahan ho jāeṅ.

³ḳhudġharz na hoṅ, na bātil izzat ke pīchhe paṛeṅ balki farotanī se dūsroṅ ko apne se behtar samjheṅ.

⁴har ek na sirf apnā fāidā soche balki dūsroṅ kā bhī.

⁵wuhī soch rakheṅ jo masīh īsā kī bhī thī.

⁶wuh jo allāh kī sūrat par thā nahīṅ samajhtā thā ki merā allāh ke barābar honā koī aisī chīz hai jis ke sāth zabardastī chimṭe rahne kī zarūrat hai.

⁷nahīṅ, us ne apne āp ko is se mahrūm karke ġhulām kī sūrat apnāī aur insānoṅ kī mānind ban gayā. shakl-o-sūrat meṅ wuh insān pāyā gayā.

⁸us ne apne āp ko past kar diyā aur maut tak tābe rahā, balki salībī maut tak.

⁹is lie allāh ne use sab se ālā maqām par sarfarāz kar diyā aur use wuh nām baḳhshā jo har nām se ālā hai,

¹⁰tāki īsā ke is nām ke sāmne har ghuṭnā jhuke, ḳhwāh wuh ghuṭnā āsmān par, zamīn par yā is ke nīche ho,

¹¹aur har zabān taslīm kare ki īsā masīh ḳhudāwand hai. yūṅ ḳhudā bāp ko jalāl diyā jāegā.

¹²mere azīzo, jab maiṅ āp ke pās thā to āp hameshā farmāṅbardār rahe. ab jab maiṅ ġhairhāzir hūṅ to is kī kahīṅ zyādā zarūrat hai. chunāṅche ḍarte aur kāṅpte hue jāṅfishānī karte raheṅ tāki āp kī najāt takmīl tak pahuṅche.

¹³kyūṅki ḳhudā hī āp meṅ wuh kuchh karne kī ḳhwāhish paidā kartā hai jo use pasand hai, aur wuhī āp ko yih pūrā karne kī tāqat detā hai.

¹⁴sab kuchh buṛbuṛāe aur bahs-mubāhasā kie baġhair kareṅ

¹⁵tāki āp be'ilzām aur pāk ho kar allāh ke bedāġh farzand sābit ho jāeṅ, aise log jo ek ṭeṛhī aur ulṭī nasl ke darmiyān hī āsmān ke sitāroṅ kī tarah chamakte damakte

¹⁶aur zindagī kā kalām thāme rakhte haiṅ. phir maiṅ masīh kī āmad ke din faḳhr kar sakūṅgā ki na maiṅ rāygāṅ dauṛā, na befāidā jidd-o-jahd kī.

¹⁷dekheṅ, jo ḳhidmat āp īmān se saranjām de rahe haiṅ wuh ek aisī qurbānī hai jo allāh ko pasand hai. ḳhudā kare ki jo dukh maiṅ uṭhā rahā hūṅ wuh mai kī us nazar kī mānind ho jo bait-ul-muqaddas meṅ qurbānī par unḍelī jātī hai. agar merī nazar wāqaī āp kī qurbānī yūṅ mukammal kare to maiṅ ḳhush hūṅ aur āp ke sāth ḳhushī manātā hūṅ.

¹⁸āp bhī isī wajah se ḳhush hoṅ aur mere sāth ḳhushī manāeṅ.

¹⁹mujhe ummīd hai ki agar ḳhudāwand īsā ne chāhā to maiṅ jald hī tīmuthiyus ko āp ke pās bhej dūṅgā tāki āp ke bāre meṅ ḳhabar pā kar merā hauslā bhī baṛh jāe.

²⁰kyūṅki mere pās koī aur nahīṅ jis kī soch bilkul merī jaisī hai aur jo itnī ḳhulūsdilī se āp kī fikr kare.

²¹dūsre sab apne mafād kī talāsh meṅ rahte haiṅ aur wuh kuchh nazarandāz karte haiṅ jo īsā masīh kā kām baṛhātā hai.

²²lekin āp ko to mālūm hai ki tīmuthiyus qābil-e-etimād sābit huā, ki us ne merā beṭā ban kar mere sāth allāh kī ḳhushḳhabrī phailāne kī ḳhidmat saranjām dī.

²³chunāṅche ummīd hai ki jūṅ hī mujhe patā chale ki merā kyā banegā maiṅ use āp ke pās bhej dūṅgā.

²⁴aur merā ḳhudāwand meṅ īmān hai ki maiṅ bhī jald hī āp ke pās āūṅgā.

²⁵lekin maiṅ ne zarūrī samjhā ki itne meṅ ipafruditus ko āp ke pās wāpas bhej dūṅ jise āp ne qāsid ke taur par merī zarūriyāt pūrī karne ke lie mere pās bhej diyā thā. wuh merā sachchā bhāī, hamḳhidmat aur sāthī sipāhī sābit huā.

²⁶maiṅ use is lie bhej rahā hūṅ kyūṅki wuh āp sab kā nihāyat ārzūmand hai aur is lie bechain hai ki āp ko us ke bīmār hone kī ḳhabar mil gaī thī.

²⁷aur wuh thā bhī bīmār balki marne ko thā. lekin allāh ne us par rahm kiyā, aur na sirf us par balki mujh par bhī tāki mere dukh meṅ izāfā na ho jāe.

²⁸is lie maiṅ use aur jaldī se āp ke pās bhejūṅgā tāki āp use dekh kar ḳhush ho jāeṅ aur merī pareshānī bhī dūr ho jāe.

²⁹chunāṅche ḳhudāwand meṅ baṛī ḳhushī se us kā istiqbāl kareṅ. us jaise logoṅ kī izzat kareṅ,

³⁰kyūṅki wuh masīh ke kām ke bāis marne kī naubat tak pahuṅch gayā thā. us ne apnī jān ḳhatre meṅ ḍāl dī tāki āp kī jagah merī wuh ḳhidmat kare jo āp na kar sake.