Read Roman Urdu Geo filippiyoṅ 3 Bible Online

filippiyoṅ 3 - Roman Urdu Geo bible

filippiyoṅ 3

¹mere bhāiyo, jo kuchh bhī ho, ḳhudāwand meṅ ḳhush raheṅ. maiṅ āp ko yih bāt batāte rahne se kabhī thaktā nahīṅ, kyūṅki aisā karne se āp mahfūz rahte haiṅ.

²kuttoṅ se ḳhabardār! un sharīr mazdūroṅ se hoshyār rahnā jo jism kī kāṅṭ-chhāṅṭ yānī ḳhatnā karwāte haiṅ.

³kyūṅki ham hī haqīqī ḳhatnā ke pairokār haiṅ, ham hī haiṅ jo allāh ke rūh meṅ parastish karte, masīh īsā par faḳhr karte aur insānī ḳhūbiyoṅ par bharosā nahīṅ karte.

⁴bāt yih nahīṅ ki merā apnī insānī ḳhūbiyoṅ par bharosā karne kā koī jawāz na hotā. jab dūsre apnī insānī ḳhūbiyoṅ par faḳhr karte haiṅ to maiṅ un kī nisbat zyādā kar saktā hūṅ.

⁵merā ḳhatnā huā jab maiṅ abhī āṭh din kā bachchā thā. maiṅ isrāīl qaum ke qabīle binyamīn kā hūṅ, aisā ibrānī jis ke wālidain bhī ibrānī the. maiṅ farīsiyoṅ kā maimbar thā jo yahūdī sharīat ke kaṭar pairokār haiṅ.

⁶maiṅ itnā sargarm thā ki masīh kī jamā'atoṅ ko īzā pahuṅchāī. hāṅ, maiṅ sharīat par amal karne meṅ rāstbāz aur be'ilzām thā.

⁷us waqt yih sab kuchh mere nazdīk nafā kā bāis thā, lekin ab maiṅ ise masīh meṅ hone ke bāis nuqsān hī samajhtā hūṅ.

⁸hāṅ, balki maiṅ sab kuchh is azīmtarīn bāt ke sabab se nuqsān samajhtā hūṅ ki maiṅ apne ḳhudāwand masīh īsā ko jāntā hūṅ. usī kī ḳhātir mujhe tamām chīzoṅ kā nuqsān pahuṅchā hai. maiṅ unheṅ kūṛā hī samajhtā hūṅ tāki masīh ko hāsil karūṅ

⁹aur us meṅ pāyā jāūṅ. lekin maiṅ is naubat tak apnī us rāstbāzī ke zarī'e nahīṅ pahuṅch saktā jo sharīat ke tābe rahne se hāsil hotī hai. is ke lie wuh rāstbāzī zarūrī hai jo masīh par īmān lāne se miltī hai, jo allāh kī taraf se hai aur jo īmān par mabnī hotī hai.

¹⁰hāṅ, maiṅ sab kuchh kūṛā hī samajhtā hūṅ tāki masīh ko, us ke jī uṭhne kī qudrat aur us ke dukhoṅ meṅ sharīk hone kā fazl jān lūṅ. yūṅ maiṅ us kī maut kā hamshakl bantā jā rahā hūṅ,

¹¹is ummīd meṅ ki maiṅ kisī na kisī tarah murdoṅ meṅ se jī uṭhne kī naubat tak pahuṅchūṅgā.

¹²matlab yih nahīṅ ki maiṅ yih sab kuchh hāsil kar chukā yā kāmil ho chukā hūṅ. lekin maiṅ manzil-e-maqsūd kī taraf dauṛā huā jātā hūṅ tāki wuh kuchh pakaṛ lūṅ jis ke lie masīh īsā ne mujhe pakaṛ liyā hai.

¹³bhāiyo, meṅ apne bāre meṅ yih ḳhayāl nahīṅ kartā ki maiṅ ise hāsil kar chukā hūṅ. lekin maiṅ is ek hī bāt par dhyān detā hūṅ, jo kuchh mere pīchhe hai wuh maiṅ bhūl kar saḳht tag-o-dau ke sāth us taraf baṛhtā hūṅ jo āge paṛā hai.

¹⁴maiṅ sīdhā manzil-e-maqsūd kī taraf dauṛā huā jātā hūṅ tāki wuh in'ām hāsil karūṅ jis ke lie allāh ne mujhe masīh īsā meṅ āsmān par bulāyā hai.

¹⁵chunāṅche ham meṅ se jitne kāmil haiṅ āeṅ, ham aisī soch rakheṅ. aur agar āp kisī bāt meṅ farq sochte haiṅ to allāh āp par yih bhī zāhir karegā.

¹⁶jo bhī ho, jis marhale tak ham pahuṅch gae haiṅ āeṅ, ham us ke mutābiq zindagī guzāreṅ.

¹⁷bhāiyo, mil kar mere naqsh-e-qadam par chaleṅ. aur un par ḳhūb dhyān deṅ jo hamāre namūne par chalte haiṅ.

¹⁸kyūṅki jis tarah maiṅ ne āp ko kaī bār batāyā hai aur ab ro ro kar batā rahā hūṅ, bahut se log apne chāl-chalan se zāhir karte haiṅ ki wuh masīh kī salīb ke dushman haiṅ.

¹⁹aise logoṅ kā anjām halākat hai. khāne-pīne kī pābandiyāṅ aur ḳhatne par faḳhr un kā ḳhudā ban gayā hai. [2] hāṅ, wuh sirf dunyāwī soch rakhte haiṅ.

²⁰lekin ham āsmān ke shahrī haiṅ, aur ham shiddat se is intizār meṅ haiṅ ki hamārā najātdahindā aur ḳhudāwand īsā masīh wahīṅ se āe.

²¹us waqt wuh hamāre pasthāl badanoṅ ko badal kar apne jalālī badan ke hamshakl banā degā. aur yih wuh us quwwat ke zarī'e karegā jis se wuh tamām chīzeṅ apne tābe kar saktā hai.