Read Roman Urdu Geo kulussiyoṅ 1 Bible Online

kulussiyoṅ 1 - Roman Urdu Geo bible

kulussiyoṅ 1

¹yih ḳhat paulus kī taraf se hai jo allāh kī marzī se masīh īsā kā rasūl hai. sāth hī yih bhāī tīmuthiyus kī taraf se bhī hai.

²maiṅ kulusse shahr ke muqaddas bhāiyoṅ ko likh rahā hūṅ jo masīh par īmān lāe haiṅ: ḳhudā hamārā bāp āp ko fazl aur salāmatī baḳhshe.

³jab ham āp ke lie duā karte haiṅ to har waqt ḳhudā apne ḳhudāwand īsā masīh ke bāp kā shukr karte haiṅ,

⁴kyūṅki ham ne āp ke masīh īsā par īmān aur āp kī tamām muqaddasīn se muhabbat ke bāre meṅ sun liyā hai.

⁵āp kā yih īmān aur muhabbat wuh kuchh zāhir karte haiṅ jis kī āp ummīd rakhte haiṅ aur jo āsmān par āp ke lie mahfūz rakhā gayā hai. aur āp ne yih ummīd us waqt se rakhī hai jab se āp ne pahlī martabā sachchāī kā kalām yānī allāh kī ḳhushḳhabrī sunī.

⁶yih paiġhām jo āp ke pās pahuṅch gayā pūrī duniyā meṅ phal lā rahā aur baṛh rahā hai, bilkul usī tarah jis tarah yih āp meṅ bhī us din se kām kar rahā hai jab āp ne pahlī bār ise sun kar allāh ke fazl kī pūrī haqīqat samajh lī.

⁷āp ne hamāre azīz hamḳhidmat ipafrās se is ḳhushḳhabrī kī tālīm pā lī thī. masīh kā yih wafādār ḳhādim hamārī jagah āp kī ḳhidmat kar rahā hai.

⁸usī ne hameṅ āp kī us muhabbat ke bāre meṅ batāyā jo rūh-ul-quds ne āp ke diloṅ meṅ ḍāl dī hai.

⁹is wajah se ham āp ke lie duā karne se bāz nahīṅ āe balki yih māṅgte rahte haiṅ ki allāh āp ko har ruhānī hikmat aur samajh se nawāz kar apnī marzī ke ilm se bhar de.

¹⁰kyūṅki phir hī āp apnī zindagī ḳhudāwand ke lāiq guzār sakeṅge aur har tarah se use pasand āeṅge. hāṅ, āp har qism kā achchhā kām karke phal lāeṅge aur allāh ke ilm-o-irfān meṅ taraqqī kareṅge.

¹¹aur āp us kī jalālī qudrat se milne wālī har qism kī quwwat se taqwiyat pā kar har waqt sābitqadmī aur sabar se chal sakeṅge. āp ḳhushī se

¹²bāp kā shukr kareṅge jis ne āp ko us mīrās meṅ hissā lene ke lāiq banā diyā jo us ke raushnī meṅ rahne wāle muqaddasīn ko hāsil hai.

¹³kyūṅki wuhī hameṅ tārīkī ke iḳhtiyār se rihāī de kar apne pyāre farzand kī bādshāhī meṅ lāyā,

¹⁴us wāhid shaḳhs ke iḳhtiyār meṅ jis ne hamārā fidyā de kar hamāre gunāhoṅ ko muāf kar diyā.

¹⁵allāh ko dekhā nahīṅ jā saktā, lekin ham masīh ko dekh sakte haiṅ jo allāh kī sūrat aur kāināt kā pahlauṭhā hai.

¹⁶kyūṅki allāh ne usī meṅ sab kuchh ḳhalaq kiyā, ḳhwāh āsmān par ho yā zamīn par, āṅkhoṅ ko nazar āe yā na, ḳhwāh shāhī taḳht, quwwateṅ, hukmrān yā iḳhtiyār wāle hūṅ. sab kuchh masīh ke zarī'e aur usī ke lie ḳhalaq huā.

¹⁷wuhī sab chīzoṅ se pahle hai aur usī meṅ sab kuchh qāim rahtā hai.

¹⁸aur wuh badan yānī apnī jamā'at kā sar bhī hai. wuhī ibtidā hai, aur chūṅki pahle wuhī murdoṅ meṅ se jī uṭhā is lie wuhī un meṅ se pahlauṭhā bhī hai tāki wuh sab bātoṅ meṅ awwal ho.

¹⁹kyūṅki allāh ko pasand āyā ki masīh meṅ us kī pūrī māmūrī sukūnat kare

²⁰aur wuh masīh ke zarī'e sab bātoṅ kī apne sāth sulah karā le, ḳhwāh wuh zamīn kī hūṅ ḳhwāh āsmān kī. kyūṅki us ne masīh ke salīb par bahāe gae ḳhūn ke wasīle se sulah-salāmatī qāim kī.

²¹āp bhī pahle allāh ke sāmne ajnabī the aur dushman kī sī soch rakh kar bure kām karte the.

²²lekin ab us ne masīh ke insānī badan kī maut se āp ke sāth sulah kar lī hai tāki wuh āp ko muqaddas, bedāġh aur be'ilzām hālat meṅ apne huzūr khaṛā kare.

²³beshak ab zarūrī hai ki āp īmān meṅ qāim raheṅ, ki āp ṭhos bunyād par mazbūtī se khaṛe raheṅ aur us ḳhushḳhabrī kī ummīd se haṭ na jāeṅ jo āp ne sun lī hai. yih wuhī paiġhām hai jis kī munādī duniyā meṅ har maḳhlūq ke sāmne kar dī gaī hai aur jis kā ḳhādim maiṅ paulus ban gayā hūṅ.

²⁴ab maiṅ un dukhoṅ ke bāis ḳhushī manātā hūṅ jo maiṅ āp kī ḳhātir uṭhā rahā hūṅ. kyūṅki maiṅ apne jism meṅ masīh ke badan yānī us kī jamā'at kī ḳhātir masīh kī musībatoṅ kī wuh kamiyāṅ pūrī kar rahā hūṅ jo ab tak rah gaī haiṅ.

²⁵hāṅ, allāh ne mujhe apnī jamā'at kā ḳhādim banā kar yih zimmādārī dī ki maiṅ āp ko allāh kā pūrā kalām sunā dūṅ,

²⁶wuh rāz jo azal se tamām guzarī nasloṅ se poshīdā rahā thā lekin ab muqaddasīn par zāhir kiyā gayā hai.

²⁷kyūṅki allāh chāhtā thā ki wuh jān leṅ ki ġhairyahūdiyoṅ meṅ yih rāz kitnā beshqīmat aur jalālī hai. aur yih rāz hai kyā? yih ki masīh āp meṅ hai. wuhī āp meṅ hai jis ke bāis ham allāh ke jalāl meṅ sharīk hone kī ummīd rakhte haiṅ.

²⁸yūṅ ham sab ko masīh kā paiġhām sunāte haiṅ. har mumkinā hikmat se ham unheṅ samjhāte aur tālīm dete haiṅ tāki har ek ko masīh meṅ kāmil hālat meṅ allāh ke huzūr pesh kareṅ.

²⁹yihī maqsad pūrā karne ke lie maiṅ saḳht mehnat kartā hūṅ. hāṅ, maiṅ pūrī jidd-o-jahd karke masīh kī us quwwat kā sahārā letā hūṅ jo baṛe zor se mere andar kām kar rahī hai.