Read Roman Urdu Geo kulussiyoṅ 4 Bible Online

kulussiyoṅ 4 - Roman Urdu Geo bible

kulussiyoṅ 4

¹māliko, apne ġhulāmoṅ ke sāth munsifānā aur jāiz sulūk kareṅ. āp to jānte haiṅ ki āsmān par āp kā bhī mālik hai.

²duā meṅ lage raheṅ. aur duā karte waqt shukrguzārī ke sāth jāgte raheṅ.

³sāth sāth hamāre lie bhī duā kareṅ tāki allāh hamāre lie kalām sunāne kā darwāzā khole aur ham masīh kā rāz pesh kar sakeṅ. āḳhir maiṅ isī rāz kī wajah se qaid meṅ hūṅ.

⁴duā kareṅ ki maiṅ ise yūṅ pesh karūṅ jis tarah karnā chāhie, ki ise sāf samjhā jā sake.

⁵jo ab tak īmān na lāe hoṅ un ke sāth dānishmandānā sulūk kareṅ. is silsile meṅ har mauqe se fāidā uṭhāeṅ.

⁶āp kī guftgū har waqt mehrbān ho, aisī ki mazā āe aur āp har ek ko munāsib jawāb de sakeṅ.

⁷jahāṅ tak merā tālluq hai hamārā azīz bhāī tuḳhikus āp ko sab kuchh batā degā. wuh ek wafādār ḳhādim aur ḳhudāwand meṅ hamḳhidmat rahā hai.

⁸maiṅ ne use ḳhāskar is lie āp ke pās bhej diyā tāki āp ko hamārā hāl mālūm ho jāe aur wuh āp kī hauslā-afzāī kare.

⁹wuh hamāre wafādār aur azīz bhāī unesimus ke sāth āp ke pās ā rahā hai, wuhī jo āp kī jamā'at se hai. donoṅ āp ko wuh sab kuchh sunā deṅge jo yahāṅ ho rahā hai.

¹⁰aristarḳhus jo mere sāth qaid meṅ hai āp ko salām kahtā hai aur isī tarah barnabās kā kazan [2] marqus bhī. (āp ko us ke bāre meṅ hidāyāt dī gaī haiṅ. jab wuh āp ke pās āe to use ḳhushāmdīd kahnā.)

¹¹īsā jo yūstus kahlātā hai bhī āp ko salām kahtā hai. un meṅ se jo mere sāth allāh kī bādshāhī meṅ ḳhidmat kar rahe haiṅ sirf yih tīn mard yahūdī haiṅ. aur yih mere lie tasallī kā bāis rahe haiṅ.

¹²masīh īsā kā ḳhādim ipafrās bhī jo āp kī jamā'at se hai salām kahtā hai. wuh har waqt baṛī jidd-o-jahd ke sāth āp ke lie duā kartā hai. us kī ḳhās duā yih hai ki āp mazbūtī ke sāth khaṛe raheṅ, ki āp bāliġh masīhī ban kar har bāt meṅ allāh kī marzī ke mutābiq chaleṅ.

¹³maiṅ ḳhud is kī tasdīq kar saktā hūṅ ki us ne āp ke lie saḳht mehnat kī hai balki laudīkiyā aur hiyarāpulis kī jamā'atoṅ ke lie bhī.

¹⁴hamāre azīz ḍākṭar lūqā aur demās āp ko salām kahte haiṅ.

¹⁵merā salām laudīkiyā kī jamā'at ko denā aur isī tarah numfās ko us jamā'at samet jo us ke ghar meṅ jamā hotī hai.

¹⁶yih paṛhne ke bād dhyān deṅ ki laudīkiyā kī jamā'at meṅ bhī yih ḳhat paṛhā jāe aur āp laudīkiyā kā ḳhat bhī paṛheṅ.

¹⁷arḳhippus ko batā denā, ḳhabardār ki āp wuh ḳhidmat takmīl tak pahuṅchāeṅ jo āp ko ḳhudāwand meṅ sauṅpī gaī hai.

¹⁸maiṅ apne hāth se yih alfāz likh rahā hūṅ. merī yānī paulus kī taraf se salām. merī zanjīreṅ mat bhūlnā! allāh kā fazl āp ke sāth hotā rahe.