Read Roman Urdu Geo 1-thissalunīkiyoṅ 2 Bible Online

1-thissalunīkiyoṅ 2 - Roman Urdu Geo bible

1-thissalunīkiyoṅ 2

¹bhāiyo, āp jānte haiṅ ki hamārā āp ke pās ānā befāidā na huā.

²āp us dukh se bhī wāqif haiṅ jo hameṅ āp ke pās āne se pahle sahnā paṛā, ki filippī shahr meṅ hamāre sāth kitnī badsulūkī huī thī. to bhī ham ne apne ḳhudā kī madad se āp ko us kī ḳhushḳhabrī sunāne kī jur'at kī hālāṅki bahut muḳhālafat kā sāmnā karnā paṛā.

³kyūṅki jab ham āp ko ubhārte haiṅ to is ke pīchhe na to koī ġhalat nīyat hotī hai, na koī nāpāk maqsad yā chālākī.

⁴nahīṅ, allāh ne ḳhud hameṅ jāṅch kar is lāiq samjhā ki ham us kī ḳhushḳhabrī sunāne kī zimmādārī saṅbhāleṅ. isī binā par ham bolte haiṅ, insānoṅ ko ḳhush rakhne ke lie nahīṅ balki allāh ko jo hamāre diloṅ ko parakhtā hai.

⁵āp ko bhī mālūm hai ki ham ne na ḳhushāmad se kām liyā, na ham pas-e-pardā lālchī the - allāh hamārā gawāh hai!

⁶ham is maqsad se kām nahīṅ kar rahe the ki log hamārī izzat kareṅ, ḳhwāh āp hoṅ yā dīgar log.

⁷masīh ke rasūloṅ kī haisiyat se ham āp ke lie mālī bojh ban sakte the, lekin ham āp ke darmiyān hote hue narmdil rahe, aisī māṅ kī tarah jo apne chhoṭe bachchoṅ kī parwarish kartī hai.

⁸hamārī āp ke lie chāhat itnī shadīd thī ki ham āp ko na sirf allāh kī ḳhushḳhabrī kī barkat meṅ sharīk karne ko tayyār the balki apnī zindagiyioṅ meṅ bhī. hāṅ, āp hameṅ itne azīz the!

⁹bhāiyo, beshak āp ko yād hai ki ham ne kitnī saḳht mehnat-mashaqqat kī. din rāt ham kām karte rahe tāki allāh kī ḳhushḳhabrī sunāte waqt kisī par bojh na baneṅ.

¹⁰āp aur allāh hamāre gawāh haiṅ ki āp īmān lāne wāloṅ ke sāth hamārā sulūk kitnā muqaddas, rāst aur be'ilzām thā.

¹¹kyūṅki āp jānte haiṅ ki ham ne āp meṅ se har ek se aisā sulūk kiyā jaisā bāp apne bachchoṅ ke sāth kartā hai.

¹²ham āp kī hauslā-afzāī karte, āp ko tasallī dete aur āp ko samjhāte rahe ki āp allāh ke lāiq zindagī guzāreṅ, kyūṅki wuh āp ko apnī bādshāhī aur jalāl meṅ hissā lene ke lie bulātā hai.

¹³ek aur wajah hai ki ham har waqt ḳhudā kā shukr karte haiṅ. jab ham ne āp tak allāh kā paiġhām pahuṅchāyā to āp ne use sun kar yūṅ qabūl kiyā jaisā yih haqīqat meṅ hai yānī allāh kā kalām jo insānoṅ kī taraf se nahīṅ hai aur jo āp īmāndāroṅ meṅ kām kar rahā hai.

¹⁴bhāiyo, na sirf yih balki āp yahūdiyā meṅ allāh kī un jamā'atoṅ ke namūne par chal paṛe jo masīh īsā meṅ haiṅ. kyūṅki āp ko apne hamwatanoṅ ke hāthoṅ wuh kuchh sahnā paṛā jo unheṅ pahle hī apne hamwatan yahūdiyoṅ se sahnā paṛā thā.

¹⁵hāṅ, yahūdiyoṅ ne na sirf ḳhudāwand īsā aur nabiyoṅ ko qatl kiyā balki hameṅ bhī apne bīch meṅ se nikāl diyā. yih log allāh ko pasand nahīṅ āte aur tamām logoṅ ke ḳhilāf ho kar

¹⁶hameṅ is se rokne kī koshish karte haiṅ ki ġhairyahūdiyoṅ ko allāh kī ḳhushḳhabrī sunāeṅ, aisā na ho ki wuh najāt pāeṅ. yūṅ wuh har waqt apne gunāhoṅ kā pyālā kināre tak bharte jā rahe haiṅ. lekin allāh kā pūrā ġhazab un par nāzil ho chukā hai.

¹⁷bhāiyo, jab hameṅ kuchh der ke lie āp se alag kar diyā gayā (go ham dil se āp ke sāth rahe) to ham ne baṛī ārzū se āp se milne kī pūrī koshish kī.

¹⁸kyūṅki ham āp ke pās ānā chāhte the. hāṅ, maiṅ paulus ne bār bār āne kī koshish kī, lekin iblīs ne hameṅ rok liyā.

¹⁹āḳhir āp hī hamārī ummīd aur ḳhushī kā bāis haiṅ. āp hī hamārā in'ām aur hamārā tāj haiṅ jis par ham apne ḳhudāwand īsā ke huzūr faḳhr kareṅge jab wuh āegā.

²⁰hāṅ, āp hamārā jalāl aur ḳhushī haiṅ.