Read Roman Urdu Geo 1-thissalunīkiyoṅ 3 Bible Online

1-thissalunīkiyoṅ 3 - Roman Urdu Geo bible

1-thissalunīkiyoṅ 3

¹āḳhirkār ham yih hālat mazīd bardāsht na kar sake. ham ne faislā kiyā ki akele hī athene meṅ rah kar

²tīmuthiyus ko bhej deṅge jo hamārā bhāī aur masīh kī ḳhushḳhabrī phailāne meṅ hamāre sāth allāh kī ḳhidmat kartā hai. ham ne use bhej diyā tāki wuh āp ko mazbūt kare aur īmān meṅ āp kī hauslā-afzāī kare

³tāki koī in musībatoṅ se bechain na ho jāe. kyūṅki āp ḳhud jānte haiṅ ki in kā sāmnā karnā hamāre lie allāh kī marzī hai.

⁴balki jab ham āp ke pās the to ham ne is kī peshgoī kī ki hameṅ musībat bardāsht karnī paṛegī. aur aisā hī huā jaisā ki āp ḳhūb jānte haiṅ.

⁵yihī wajah thī ki maiṅ ne tīmuthiyus ko bhej diyā. maiṅ yih hālāt bardāsht na kar sakā, is lie maiṅ ne use āp ke īmān ko mālūm karne ke lie bhej diyā. aisā na ho ki āzmāne wāle ne āp ko yūṅ āzmāish meṅ ḍāl diyā ho ki hamārī āp par mehnat zāe jāe.

⁶lekin ab tīmuthiyus lauṭ āyā hai, aur wuh āp ke īmān aur muhabbat ke bāre meṅ achchhī ḳhabar le kar āyā hai. us ne hameṅ batāyā ki āp hameṅ bahut yād karte haiṅ aur ham se utnā hī milne ke ārzūmand haiṅ jitnā ki ham āp se.

⁷bhāiyo, āp aur āp ke īmān ke bāre meṅ yih sun kar hamārī hauslā-afzāī huī, hālāṅki ham ḳhud tarah tarah ke dabāo aur musībatoṅ meṅ phaṅse hue haiṅ.

⁸ab hamārī jān meṅ jān ā gaī hai, kyūṅki āp mazbūtī se ḳhudāwand meṅ qāim haiṅ.

⁹ham āp kī wajah se allāh ke kitne shukrguzār haiṅ! yih ḳhushī nāqābil-e-bayān hai jo ham āp kī wajah se allāh ke huzūr mahsūs karte haiṅ.

¹⁰din rāt ham baṛī sanjīdagī se duā karte rahte haiṅ ki āp se dubārā mil kar wuh kamiyāṅ pūrī kareṅ jo āp ke īmān meṅ ab tak rah gaī haiṅ.

¹¹ab hamārā ḳhudā aur bāp ḳhud aur hamārā ḳhudāwand īsā rāstā khole tāki ham āp tak pahuṅch sakeṅ.

¹²ḳhudāwand kare ki āp kī ek dūsre aur dīgar tamām logoṅ se muhabbat itnī baṛh jāe ki wuh yūṅ dil se chhalak uṭhe jis tarah āp ke lie hamārī muhabbat bhī chhalak rahī hai.

¹³kyūṅki is tarah allāh āp ke diloṅ ko mazbūt karegā aur āp us waqt hamāre ḳhudā aur bāp ke huzūr be'ilzām aur muqaddas sābit hoṅge jab hamārā ḳhudāwand īsā apne tamām muqaddasīn ke sāth āegā. āmīn.