Read Roman Urdu Geo 1-thissalunīkiyoṅ 4 Bible Online

1-thissalunīkiyoṅ 4 - Roman Urdu Geo bible

1-thissalunīkiyoṅ 4

¹bhāiyo, ek āḳhirī bāt, āp ne ham se sīkh liyā thā ki hamārī zindagī kis tarah honī chāhie tāki wuh allāh ko pasand āe. aur āp is ke mutābiq zindagī guzārte bhī haiṅ. ab ham ḳhudāwand īsā meṅ āp se darḳhwāst aur āp kī hauslā-afzāī karte haiṅ ki āp is meṅ mazīd taraqqī karte jāeṅ.

²āp to un hidāyāt se wāqif haiṅ jo ham ne āp ko ḳhudāwand īsā ke wasīle se dī thīṅ.

³kyūṅki allāh kī marzī hai ki āp us ke lie maḳhsūs-o-muqaddas hoṅ, ki āp zinākārī se bāz raheṅ.

⁴har ek apne badan par yūṅ qābū pānā sīkh le ki wuh muqaddas aur sharīf zindagī guzār sake.

⁵wuh ġhairīmāndāroṅ kī tarah jo allāh se nāwāqif haiṅ shahwatparastī kā shikār na ho.

⁶is muāmale meṅ koī apne bhāī kā gunāh na kare, na us se ġhalat fāidā uṭhāe. ḳhudāwand aise gunāhoṅ kī sazā detā hai. ham yih sab kuchh batā chuke aur āp ko āgāh kar chuke haiṅ.

⁷kyūṅki allāh ne hameṅ nāpāk zindagī guzārne ke lie nahīṅ bulāyā balki maḳhsūs-o-muqaddas zindagī guzārne ke lie.

⁸is lie jo yih hidāyāt radd kartā hai wuh insān ko nahīṅ balki allāh ko radd kartā hai jo āp ko apnā muqaddas rūh de detā hai.

⁹yih likhne kī zarūrat nahīṅ ki āp dūsre īmāndāroṅ se muhabbat rakheṅ. allāh ne ḳhud āp ko ek dūsre se muhabbat rakhnā sikhāyā hai.

¹⁰aur haqīqatan āp makiduniyā ke tamām bhāiyoṅ se aisī hī muhabbat rakhte haiṅ. to bhī bhāiyo, ham āp kī hauslā-afzāī karnā chāhte haiṅ ki āp is meṅ mazīd taraqqī karte jāeṅ.

¹¹apnī izzat is meṅ barqarār rakheṅ ki āp sukūn se zindagī guzāreṅ, apne farāiz adā kareṅ aur apne hāthoṅ se kām kareṅ, jis tarah ham ne āp ko kah diyā thā.

¹²jab āp aisā kareṅge to ġhairīmāndār āp kī qadar kareṅge aur āp kisī bhī chīz ke muhtāj nahīṅ raheṅge.

¹³bhāiyo, ham chāhte haiṅ ki āp un ke bāre meṅ haqīqat jān leṅ jo so gae haiṅ tāki āp dūsroṅ kī tarah jin kī koī ummīd nahīṅ mātam na kareṅ.

¹⁴hamārā īmān hai ki īsā mar gayā aur dubārā jī uṭhā, is lie hamārā yih bhī īmān hai ki jab īsā wāpas āegā to allāh us ke sāth un īmāndāroṅ ko bhī wāpas lāegā jo maut kī nīnd so gae haiṅ.

¹⁵jo kuchh ham ab āp ko batā rahe haiṅ wuh ḳhudāwand kī tālīm hai. ḳhudāwand kī āmad par ham jo zindā hoṅge soe hue logoṅ se pahle ḳhudāwand se nahīṅ mileṅge.

¹⁶us waqt ūṅchī āwāz se hukm diyā jāegā, farishtā-e-āzam kī āwāz sunāī degī, allāh kā turam bajegā aur ḳhudāwand ḳhud āsmān par se utar āegā. tab pahle wuh jī uṭheṅge jo masīh meṅ mar gae the.

¹⁷in ke bād hī hameṅ jo zindā hoṅge bādaloṅ par uṭhā liyā jāegā tāki hawā meṅ ḳhudāwand se mileṅ. phir ham hameshā ḳhudāwand ke sāth raheṅge.

¹⁸chunāṅche in alfāz se ek dūsre ko tasallī diyā kareṅ.