Read Roman Urdu Geo 1-thissalunīkiyoṅ 5 Bible Online

1-thissalunīkiyoṅ 5 - Roman Urdu Geo bible

1-thissalunīkiyoṅ 5

¹bhāiyo, is kī zarūrat nahīṅ ki ham āp ko likheṅ ki yih sab kuchh kab aur kis mauqe par hogā.

²kyūṅki āp ḳhud ḳhūb jānte haiṅ ki ḳhudāwand kā din yūṅ āegā jis tarah chor rāt ke waqt ghar meṅ ghus ātā hai.

³jab log kaheṅge, “ab amn-o-amān hai,” to halākat achānak hī un par ān paṛegī. wuh is tarah musībat meṅ paṛ jāeṅge jis tarah wuh aurat jis kā bachchā paidā ho rahā hai. wuh hargiz nahīṅ bach sakeṅge.

⁴lekin āp bhāiyo tārīkī kī girift meṅ nahīṅ haiṅ, is lie yih din chor kī tarah āp par ġhālib nahīṅ ānā chāhie.

⁵kyūṅki āp sab raushnī aur din ke farzand haiṅ. hamārā rāt yā tārīkī se koī wāstā nahīṅ.

⁶ġharz āeṅ, ham dūsroṅ kī mānind na hoṅ jo soe hue haiṅ balki jāgte raheṅ, hoshmand raheṅ.

⁷kyūṅki rāt ke waqt hī log so jāte haiṅ, rāt ke waqt hī log nashe meṅ dhut ho jāte haiṅ.

⁸lekin chūṅki ham din ke haiṅ is lie āeṅ ham hosh meṅ raheṅ. lāzim hai ki ham īmān aur muhabbat ko zirābaktar ke taur par aur najāt kī ummīd ko ḳhod ke taur par pahan leṅ.

⁹kyūṅki allāh ne hameṅ is lie nahīṅ chunā ki ham par apnā ġhazab nāzil kare balki is lie ki ham apne ḳhudāwand īsā masīh ke wasīle se najāt pāeṅ.

¹⁰us ne hamārī ḳhātir apnī jān de dī tāki ham us ke sāth jieṅ, ḳhwāh ham us kī āmad ke din murdā hoṅ yā zindā.

¹¹is lie ek dūsre kī hauslā-afzāī aur tāmīr karte raheṅ, jaisā ki āp kar bhī rahe haiṅ.

¹²bhāiyo, hamārī darḳhwāst hai ki āp un kī qadar kareṅ jo āp ke darmiyān saḳht mehnat karke ḳhudāwand meṅ āp kī rāhnumāī aur hidāyat karte haiṅ.

¹³un kī ḳhidmat ko sāmne rakh kar pyār se un kī baṛī izzat kareṅ. aur ek dūsre ke sāth mel-milāp se zindagī guzāreṅ.

¹⁴bhāiyo, ham is par zor denā chāhte haiṅ ki unheṅ samjhāeṅ jo beqāidā zindagī guzārte haiṅ, unheṅ tasallī deṅ jo jaldī se māyūs ho jāte haiṅ, kamzoroṅ kā ḳhayāl rakheṅ aur sab ko sabar se bardāsht kareṅ.

¹⁵is par dhyān deṅ ki koī kisī se burāī ke badle burāī na kare balki āp har waqt ek dūsre aur tamām logoṅ ke sāth nek kām karne meṅ lage raheṅ.

¹⁶har waqt ḳhush raheṅ,

¹⁷bilānāġhā duā kareṅ,

¹⁸aur har hālat meṅ ḳhudā kā shukr kareṅ. kyūṅki jab āp masīh meṅ haiṅ to allāh yihī kuchh āp se chāhtā hai.

¹⁹rūh-ul-quds ko mat bujhāeṅ.

²⁰nabuwwatoṅ kī tahqīr na kareṅ.

²¹sab kuchh parakh kar wuh thāme rakheṅ jo achchhā hai,

²²aur har qism kī burāī se bāz raheṅ.

²³allāh ḳhud jo salāmatī kā ḳhudā hai āp ko pūre taur par maḳhsūs-o-muqaddas kare. wuh kare ki āp pūre taur par rūh, jān aur badan samet us waqt tak mahfūz aur be'ilzām raheṅ jab tak hamārā ḳhudāwand īsā masīh wāpas nahīṅ ā jātā.

²⁴jo āp ko bulātā hai wuh wafādār hai aur wuh aisā karegā bhī.

²⁵bhāiyo, hamāre lie duā kareṅ.

²⁶tamām bhāiyoṅ ko hamārī taraf se bosā denā.

²⁷ḳhudāwand ke huzūr maiṅ āp ko tākīd kartā hūṅ ki yih ḳhat tamām bhāiyoṅ ke sāmne paṛhā jāe.

²⁸hamāre ḳhudāwand īsā masīh kā fazl āp ke sāth hotā rahe.