Read Roman Urdu Geo yashūa 10 Bible Online

yashūa 10 - Roman Urdu Geo bible

yashūa 10

¹yarūshalam ke bādshāh adūnī-sidq ko ḳhabar milī ki yashūa ne aī par yūṅ qabzā karke use mukammal taur par tabāh kar diyā hai jis tarah us ne yarīhū aur us ke bādshāh ke sāth bhī kiyā thā. use yih ittilā bhī dī gaī ki jibaūn ke bāshinde isrāīliyoṅ ke sāth sulah kā muāhadā karke un ke darmiyān rah rahe haiṅ.

²yih sun kar wuh aur us kī qaum nihāyat ḍar gae. kyūṅki jibaūn baṛā shahr thā. wuh ahmiyat ke lihāz se un shahroṅ ke barābar thā jin ke bādshāh the, balki wuh aī shahr se bhī baṛā thā, aur us ke tamām mard behtarīn faujī the.

³chunāṅche yarūshalam ke bādshāh adūnī-sidq ne apne qāsid habrūn ke bādshāh hūhām, yarmūt ke bādshāh pīrām, lakīs ke bādshāh yafīa aur ijlūn ke bādshāh dabīr ke pās bhej die.

⁴paiġhām yih thā, “āeṅ aur jibaūn par hamlā karne meṅ merī madad kareṅ, kyūṅki us ne yashūa aur isrāīliyoṅ ke sāth sulah kā muāhadā kar liyā hai.”

⁵yarūshalam, habrūn, yarmūt, lakīs aur ijlūn ke yih pāṅch amorī bādshāh muttahid hue. wuh apne tamām faujiyoṅ ko le kar chal paṛe aur jibaūn kā muhāsarā karke us se jang karne lage.

⁶us waqt yashūa ne apne ḳhaime jiljāl meṅ lagāe the. jibaūn ke logoṅ ne use paiġhām bhej diyā, “apne ḳhādimoṅ ko tark na kareṅ. jaldī se hamāre pās ā kar hameṅ bachāeṅ! hamārī madad kījie, kyūṅki pahāṛī ilāqe ke tamām amorī bādshāh hamāre ḳhilāf muttahid ho gae haiṅ.”

⁷yih sun kar yashūa apnī pūrī fauj ke sāth jiljāl se niklā aur jibaūn ke lie rawānā huā. us ke behtarīn faujī bhī sab us ke sāth the.

⁸rab ne yashūa se kahā, “un se mat ḍarnā, kyūṅki maiṅ unheṅ tere hāth meṅ kar chukā hūṅ. un meṅ se ek bhī terā muqābalā nahīṅ karne pāegā.”

⁹aur yashūa ne jiljāl se sārī rāt safar karte karte achānak dushman par hamlā kiyā.

¹⁰us waqt rab ne isrāīliyoṅ ke deḳhte deḳhte dushman meṅ abtarī paidā kar dī, aur unhoṅ ne jibaūn ke qarīb dushman ko zabardast shikast dī. isrāīlī bait-haurūn tak pahuṅchāne wāle rāste par amoriyoṅ kā tāqqub karte karte unheṅ azīqā aur maqqedā tak maut ke ghāṭ utārte gae.

¹¹aur jab amorī is rāste par azīqā kī taraf bhāg rahe the to rab ne āsmān se un par baṛe baṛe ole barsāe jinhoṅ ne isrāīliyoṅ kī nisbat zyādā dushmanoṅ ko halāk kar diyā.

¹²us din jab rab ne amoriyoṅ ko isrāīl ke hāth meṅ kar diyā to yashūa ne isrāīliyoṅ kī maujūdagī meṅ rab se kahā, “ai sūraj, jibaūn ke ūpar ruk jā! ai chāṅd, wādī-e-ayyālon par ṭhahar jā!”

¹³tab sūraj ruk gayā, aur chāṅd ne āge harkat na kī. jab tak ki isrāīl ne apne dushmanoṅ se pūrā badlā na le liyā us waqt tak wuh ruke rahe. is bāt kā zikr yāshar kī kitāb meṅ kiyā gayā hai. sūraj āsmān ke bīch meṅ ruk gayā aur taqrīban ek pūre din ke daurān ġhurūb na huā.

¹⁴yih din munfarid thā. rab ne insān kī is tarah kī duā na kabhī is se pahle, na kabhī is ke bād sunī. kyūṅki rab ḳhud isrāīl ke lie laṛ rahā thā.

¹⁵is ke bād yashūa pūre isrāīl samet jiljāl kī ḳhaimāgāh meṅ lauṭ āyā.

¹⁶lekin pāṅchoṅ amorī bādshāh farār ho kar maqqedā ke ek ġhār meṅ chhup gae the.

¹⁷yashūa ko ittilā dī gaī

¹⁸to us ne kahā, “kuchh baṛe baṛe patthar luṛhkā kar ġhār kā muṅh band karnā, aur kuchh ādmī us kī pahrādārī kareṅ.

¹⁹lekin bāqī log na rukeṅ balki dushmanoṅ kā tāqqub karke pīchhe se unheṅ mārte jāeṅ. unheṅ dubārā apne shahroṅ meṅ dāḳhil hone kā mauqā mat denā, kyūṅki rab āp ke ḳhudā ne unheṅ āp ke hāth meṅ kar diyā hai.”

²⁰chunāṅche yashūa aur bāqī isrāīlī unheṅ halāk karte rahe, aur kam hī apne shahroṅ kī fasīl meṅ dāḳhil ho sake.

²¹is ke bād pūrī fauj sahīh-salāmat yashūa ke pās maqqedā kī lashkargāh meṅ wāpas pahuṅch gaī. ab se kisī meṅ bhī isrāīliyoṅ ko dhamkī dene kī jur'at na rahī.

²²phir yashūa ne kahā, “ġhār ke muṅh ko khol kar yih pāṅch bādshāh mere pās nikāl lāeṅ.”

²³log ġhār ko khol kar yarūshalam, habrūn, yarmūt, lakīs aur ijlūn ke bādshāhoṅ ko yashūa ke pās nikāl lāe.

²⁴yashūa ne isrāīl ke mardoṅ ko bulā kar apne sāth khaṛe faujī afsaroṅ se kahā, “idhar ā kar apne pairoṅ ko bādshāhoṅ kī gardanoṅ par rakh deṅ.” afsaroṅ ne aisā hī kiyā.

²⁵phir yashūa ne un se kahā, “na ḍareṅ aur na hauslā hāreṅ. mazbūt aur diler hoṅ. rab yihī kuchh un tamām dushmanoṅ ke sāth karegā jin se āp laṛeṅge.”

²⁶yih kah kar us ne bādshāhoṅ ko halāk karke un kī lāsheṅ pāṅch daraḳhtoṅ se laṭkā dīṅ. wahāṅ wuh shām tak laṭkī rahīṅ.

²⁷jab sūraj ḍūbne lagā to logoṅ ne yashūa ke hukm par lāsheṅ utār kar us ġhār meṅ phaiṅk dīṅ jis meṅ bādshāh chhup gae the. phir unhoṅ ne ġhār ke muṅh ko baṛe baṛe pattharoṅ se band kar diyā. yih patthar āj tak wahāṅ paṛe hue haiṅ.

²⁸us din maqqedā yashūa ke qabze meṅ ā gayā. us ne pūre shahr ko talwār se rab ke lie maḳhsūs karke tabāh kar diyā. bādshāh samet sab halāk hue aur ek bhī na bachā. shahr ke bādshāh ke sāth us ne wuh sulūk kiyā jo us ne yarīhū ke bādshāh ke sāth kiyā thā.

²⁹phir yashūa ne tamām isrāīliyoṅ ke sāth wahāṅ se āge nikal kar libnā par hamlā kiyā.

³⁰rab ne us shahr aur us ke bādshāh ko bhī isrāīl ke hāth meṅ kar diyā. yashūa ne talwār se shahr ke tamām bāshindoṅ ko halāk kiyā, aur ek bhī na bachā. bādshāh ke sāth us ne wuhī sulūk kiyā jo us ne yarīhū ke bādshāh ke sāth kiyā thā.

³¹is ke bād us ne tamām isrāīliyoṅ ke sāth libnā se āge baṛh kar lakīs kā muhāsarā kiyā. jab us ne us par hamlā kiyā

³²to rab ne yih shahr us ke bādshāh samet isrāīl ke hāth meṅ kar diyā. dūsre din wuh yashūa ke qabze meṅ ā gayā. shahr ke sāre bāshindoṅ ko us ne talwār se halāk kiyā, jis tarah ki us ne libnā ke sāth bhī kiyā thā.

³³sāth sāth yashūa ne jazr ke bādshāh hūram aur us ke logoṅ ko bhī shikast dī jo lakīs kī madad karne ke lie āe the. un meṅ se ek bhī na bachā.

³⁴phir yashūa ne tamām isrāīliyoṅ ke sāth lakīs se āge baṛh kar ijlūn kā muhāsarā kar liyā. usī din unhoṅ ne us par hamlā karke

³⁵us par qabzā kar liyā. jis tarah lakīs ke sāth huā usī tarah ijlūn ke sāth bhī kiyā gayā yānī shahr ke tamām bāshinde talwār se halāk hue.

³⁶is ke bād yashūa ne tamām isrāīliyoṅ ke sāth ijlūn se āge baṛh kar habrūn par hamlā kiyā.

³⁷shahr par qabzā karke unhoṅ ne bādshāh, irdgird kī ābādiyāṅ aur bāshinde sab ke sab tah-e-teġh kar die. koī na bachā. ijlūn kī tarah unhoṅ ne use pūre taur par tamām bāshindoṅ samet rab ke lie maḳhsūs karke tabāh kar diyā.

³⁸phir yashūa tamām isrāīliyoṅ ke sāth muṛ kar dabīr kī taraf baṛh gayā. us par hamlā karke

³⁹us ne shahr, us ke bādshāh aur irdgird kī ābādiyoṅ par qabzā kar liyā. sab ko nest kar diyā gayā, ek bhī na bachā. yūṅ dabīr ke sāth wuh kuchh huā jo pahle habrūn aur libnā us ke bādshāh samet huā thā.

⁴⁰is tarah yashūa ne junūbī kan'ān ke tamām bādshāhoṅ ko shikast de kar un ke pūre mulk par qabzā kar liyā yānī mulk ke pahāṛī ilāqe par, junūb ke dasht-e-najab par, maġhrib ke nashebī pahāṛī ilāqe par aur wādī-e-yardan ke maġhrib meṅ wāqe pahāṛī ḍhalānoṅ par. us ne kisī ko bhī bachne na diyā balki har jāndār ko rab ke lie maḳhsūs karke halāk kar diyā. yih sab kuchh waisā hī huā jaisā rab isrāīl ke ḳhudā ne hukm diyā thā.

⁴¹yashūa ne unheṅ qādis-barnīa se le kar ġhazzā tak aur jushan ke pūre ilāqe se le kar jibaūn tak shikast dī.

⁴²in tamām bādshāhoṅ aur un ke mamālik par yashūa ne ek hī waqt fath pāī, kyūṅki isrāīl kā ḳhudā isrāīl ke lie laṛā.

⁴³is ke bād yashūa tamām isrāīliyoṅ ke sāth jiljāl kī ḳhaimāgāh meṅ lauṭ āyā.