Read Roman Urdu Geo yashūa 11 Bible Online

yashūa 11 - Roman Urdu Geo bible

yashūa 11

¹jab hasūr ke bādshāh yābīn ko in wāqiāt kī ḳhabar milī to us ne madūn ke bādshāh yūbāb aur simron aur akshāf ke bādshāhoṅ ko paiġhām bheje.

²is ke ilāwā us ne un bādshāhoṅ ko paiġhām bheje jo shimāl meṅ the yānī shimālī pahāṛī ilāqe meṅ, wādī-e-yardan ke us hisse meṅ jo kinnarat yānī galīl ke junūb meṅ hai, maġhrib ke nashebī pahāṛī ilāqe meṅ, maġhrib meṅ wāqe nāfat-dor meṅ

³aur kan'ān ke mashriq aur maġhrib meṅ. yābīn ne amoriyoṅ, hittiyoṅ, farizziyoṅ, pahāṛī ilāqe ke yabūsiyoṅ aur harmūn pahāṛ ke dāman meṅ wāqe mulk-e-misfāh ke hiwwiyoṅ ko bhī paiġhām bheje.

⁴chunāṅche yih apnī tamām faujoṅ ko le kar jang ke lie nikle. un ke ādmī samundar ke sāhil kī ret kī mānind beshumār the. un ke pās muta'addid ghoṛe aur rath bhī the.

⁵in tamām bādshāhoṅ ne isrāīl se laṛne ke lie muttahid ho kar apne ḳhaime marūm ke chashme par lagā die.

⁶rab ne yashūa se kahā, “un se mat ḍarnā, kyūṅki kal isī waqt tak maiṅ ne un sab ko halāk karke isrāīl ke hawāle kar diyā hogā. tujhe un ke ghoṛoṅ kī koṅchoṅ ko kāṭnā aur un ke rathoṅ ko jalā denā hai.”

⁷chunāṅche yashūa apne tamām faujiyoṅ ko le kar marūm ke chashme par āyā aur achānak dushman par hamlā kiyā.

⁸aur rab ne dushmanoṅ ko isrāīliyoṅ ke hawāle kar diyā. isrāīliyoṅ ne unheṅ shikast dī aur un kā tāqqub karte karte shimāl meṅ baṛe shahr saidā aur misrafāt-māim tak jā pahuṅche. isī tarah unhoṅ ne mashriq meṅ wādī-e-misfāh tak bhī un kā tāqqub kiyā. āḳhir meṅ ek bhī na bachā.

⁹rab kī hidāyat ke mutābiq yashūa ne dushman ke ghoṛoṅ kī koṅchoṅ ko kaṭwā kar us ke rathoṅ ko jalā diyā.

¹⁰phir yashūa wāpas āyā aur hasūr ko apne qabze meṅ le liyā. hasūr un tamām bādshāhatoṅ kā sadr maqām thā jinheṅ unhoṅ ne shikast dī thī. isrāīliyoṅ ne shahr ke bādshāh ko mār diyā

¹¹aur shahr ke har jāndār ko allāh ke hawāle karke halāk kar diyā. ek bhī na bachā. phir yashūa ne shahr ko jalā diyā.

¹²isī tarah yashūa ne un bāqī bādshāhoṅ ke shahroṅ par bhī qabzā kar liyā jo isrāīl ke ḳhilāf muttahid ho gae the. har shahr ko us ne rab ke ḳhādim mūsā ke hukm ke mutābiq tabāh kar diyā. bādshāhoṅ samet sab kuchh nest kar diyā gayā.

¹³lekin yashūa ne sirf hasūr ko jalāyā. pahāṛiyoṅ par ke bāqī shahroṅ ko us ne rahne diyā.

¹⁴lūṭ kā jo bhī māl jānwaroṅ samet un meṅ pāyā gayā use isrāīliyoṅ ne apne pās rakh liyā. lekin tamām bāshindoṅ ko unhoṅ ne mār ḍālā aur ek bhī na bachne diyā.

¹⁵kyūṅki rab ne apne ḳhādim mūsā ko yihī hukm diyā thā, aur yashūa ne sab kuchh waise hī kiyā jaise rab ne mūsā ko hukm diyā thā.

¹⁶yūṅ yashūa ne pūre kan'ān par qabzā kar liyā. is meṅ pahāṛī ilāqā, pūrā dasht-e-najab, jushan kā pūrā ilāqā, maġhrib kā nashebī pahāṛī ilāqā, wādī-e-yardan aur isrāīl ke pahāṛ un ke dāman kī pahāṛiyoṅ samet shāmil the.

¹⁷ab yashūa kī pahuṅch junūb meṅ saīr kī taraf baṛhne wāle pahāṛ ḳhalaq se le kar lubnān ke maidānī ilāqe ke shahr bāl-jad tak thī jo harmūn pahāṛ ke dāman meṅ thā. yashūa ne in ilāqoṅ ke tamām bādshāhoṅ ko pakaṛ kar mār ḍālā.

¹⁸lekin in bādshāhoṅ se jang karne meṅ bahut waqt lagā,

¹⁹kyūṅki jibaūn meṅ rahne wāle hiwwiyoṅ ke ilāwā kisī bhī shahr ne isrāīliyoṅ se sulah na kī. is lie isrāīl ko un sab par jang karke hī qabzā karnā paṛā.

²⁰rab hī ne unheṅ akaṛne diyā thā tāki wuh isrāīl se jang kareṅ aur un par rahm na kiyā jāe balki unheṅ pūre taur par rab ke hawāle karke halāk kiyā jāe. lāzim thā ki unheṅ yūṅ nest-o-nābūd kiyā jāe jis tarah rab ne mūsā ko hukm diyā thā.

²¹us waqt yashūa ne un tamām anāqiyoṅ ko halāk kar diyā jo habrūn, dabīr, anāb aur un tamām jaghoṅ meṅ rahte the jo yahūdāh aur isrāīl ke pahāṛī ilāqe meṅ thīṅ. us ne un sab ko un ke shahroṅ samet allāh ke hawāle karke tabāh kar diyā.

²²isrāīl ke pūre ilāqe meṅ anāqiyoṅ meṅ se ek bhī na bachā. sirf ġhazzā, jāt aur ashdūd meṅ kuchh zindā rahe.

²³ġharz yashūa ne pūre mulk par yūṅ qabzā kiyā jis tarah rab ne mūsā ko batāyā thā. phir us ne use qabīloṅ meṅ taqsīm karke isrāīl ko mīrās meṅ de diyā. jang ḳhatm huī, aur mulk meṅ amn-o-amān qāim ho gayā.