Read Roman Urdu Geo yashūa 13 Bible Online

yashūa 13 - Roman Urdu Geo bible

yashūa 13

¹jab yashūa būṛhā thā to rab ne us se kahā, “tū bahut būṛhā ho chukā hai, lekin abhī kāfī kuchh bāqī rah gayā hai jis par qabzā karne kī zarūrat hai.

²is meṅ filistiyoṅ ke tamām ilāqe un ke shāhī shahroṅ ġhazzā, ashdūd, askqalūn, jāt aur aqrūn samet shāmil haiṅ aur isī tarah jasūr kā ilāqā jis kī junūbī sarhad wādī-e-saihūr hai jo misr ke mashriq meṅ hai aur jis kī shimālī sarhad aqrūn hai. use bhī mulk-e-kan'ān kā hissā qarār diyā jātā hai. awwiyoṅ kā ilāqā bhī

⁴jo junūb meṅ hai ab tak isrāīl ke qabze meṅ nahīṅ āyā. yihī bāt shimāl par bhī sādiq ātī hai. saidāniyoṅ ke shahr ma'ārā se le kar afīq shahr aur amoriyoṅ kī sarhad tak sab kuchh ab tak isrāīl kī hukūmat se bāhar hai.

⁵is ke ilāwā jabliyoṅ kā mulk aur mashriq meṅ pūrā lubnān harmūn pahāṛ ke dāman meṅ bāl-jad se le kar labo-hamāt tak bāqī rah gayā hai.

⁶is meṅ un saidāniyoṅ kā tamām ilāqā bhī shāmil hai jo lubnān ke pahāṛoṅ aur misrafāt-māim ke darmiyān ke pahāṛī ilāqe meṅ ābād haiṅ. isrāīliyoṅ ke baṛhte baṛhte maiṅ ḳhud hī in logoṅ ko un ke sāmne se nikāl dūṅgā. lekin lāzim hai ki tū qur'ā ḍāl kar yih pūrā mulk mere hukm ke mutābiq isrāīliyoṅ meṅ taqsīm kare.

⁷use nau bāqī qabīloṅ aur manassī ke ādhe qabīle ko wirāsat meṅ de de.”

⁸rab kā ḳhādim mūsā rūbin, jad aur manassī ke bāqī ādhe qabīle ko daryā-e-yardan kā mashriqī ilāqā de chukā thā.

⁹yūṅ hasbon ke amorī bādshāh sīhon ke tamām shahr un ke qabze meṅ ā gae the yānī junūbī wādī-e-arnon ke kināre par shahr aroīr aur usī wādī ke bīch ke shahr se le kar shimāl meṅ ammoniyoṅ kī sarhad tak. dībon aur mīdabā ke darmiyān kā maidān-e-murtafā bhī is meṅ shāmil thā

¹¹aur isī tarah jiliād, jasūriyoṅ aur mākātiyoṅ kā ilāqā, harmūn kā pahāṛī ilāqā aur salkā shahr tak basan kā sārā ilāqā bhī.

¹²pahle yih sārā ilāqā basan ke bādshāh oj ke qabze meṅ thā jis kī hukūmat ke markaz astārāt aur idraī the. rafāiyoṅ ke deoqāmat qabīle se sirf oj bāqī rah gayā thā. mūsā kī rāhnumāī ke taht isrāīliyoṅ ne us ilāqe par fath pā kar tamām bāshindoṅ ko nikāl diyā thā.

¹³sirf jasūrī aur mākātī bāqī rah gae the, aur yih āj tak isrāīliyoṅ ke darmiyān rahte haiṅ.

¹⁴sirf lāwī ke qabīle ko koī zamīn na milī, kyūṅki un kā maurūsī hissā jalne wālī wuh qurbāniyāṅ haiṅ jo rab isrāīl ke ḳhudā ke lie chaṛhāī jātī haiṅ. rab ne yihī kuchh mūsā ko batāyā thā.

¹⁵mūsā ne rūbin ke qabīle ko us ke kunboṅ ke mutābiq zail kā ilāqā diyā.

¹⁶wādī-e-arnon ke kināre par shahr aroīr aur usī wādī ke bīch ke shahr se le kar mīdabā

¹⁷aur hasbon tak. wahāṅ ke maidān-e-murtafā par wāqe tamām shahr bhī rūbin ke sapurd kie gae yānī dībon, bāmāt-bāl, bait-bāl-maūn,

¹⁸yahaz, qadīmāt, mifāt,

¹⁹qiryatāim, sibmāh, zirat-us-sahar jo bahīrā-e-murdār ke mashriq meṅ wāqe pahāṛī ilāqe meṅ hai,

²⁰bait-faġhūr, pisgā ke pahāṛī silsile par maujūd ābādiyāṅ aur bait-yasīmot.

²¹maidān-e-murtafā ke tamām shahr rūbin ke qabīle ko die gae yānī amoriyoṅ ke bādshāh sīhon kī pūrī bādshāhī jis kā dār-ul-hukūmat hasbon shahr thā. mūsā ne sīhon ko mār ḍālā thā aur us ke sāth pāṅch midiyānī raīsoṅ ko bhī jinheṅ sīhon ne apne mulk meṅ muqarrar kiyā thā. in raīsoṅ ke nām iwī, raqam, sūr, hūr aur rabā the.

²²jin logoṅ ko us waqt mārā gayā un meṅ se bal'ām bin baor bhī thā jo ġhaibdān thā.

²³rūbin ke qabīle kī maġhribī sarhad daryā-e-yardan thī. yihī shahr aur ābādiyāṅ rūbin ke qabīle ko us ke kunboṅ ke mutābiq dī gaīṅ, aur wuh us kī mīrās ṭhahrīṅ.

²⁴mūsā ne jad ke qabīle ko us ke kunboṅ ke mutābiq zail kā ilāqā diyā.

²⁵yāzer kā ilāqā, jiliād ke tamām shahr, ammoniyoṅ kā ādhā hissā rabbā ke qarīb shahr aroīr tak

²⁶aur hasbon ke bādshāh sīhon kī bādshāhī kā bāqī shimālī hissā yānī hasbon, rāmat-ul-misfāh aur batūnīm ke darmiyān kā ilāqā aur mahanāim aur dabīr ke darmiyān kā ilāqā. is ke ilāwā jad ko wādī-e-yardan kā wuh mashriqī hissā bhī mil gayā jo bait-hāram, bait-nimrā, sukkāt aur safon par mushtamil thā. yūṅ us kī shimālī sarhad kinnarat yānī galīl kī jhīl kā junūbī kinārā thā.

²⁸yihī shahr aur ābādiyāṅ jad ke qabīle ko us ke kunboṅ ke mutābiq dī gaīṅ, aur wuh us kī mīrās ṭhahrīṅ.

²⁹jo ilāqā mūsā ne manassī ke ādhe hisse ko us ke kunboṅ ke mutābiq diyā thā

³⁰wuh mahanāim se le kar shimāl meṅ oj bādshāh kī tamām bādshāhī par mushtamil thā. us meṅ mulk-e-basan aur wuh 60 ābādiyāṅ shāmil thīṅ jin par yāīr ne fath pāī thī.

³¹jiliād kā ādhā hissā oj kī hukūmat ke do marākiz astārāt aur idraī samet makīr bin manassī kī aulād ko us ke kunboṅ ke mutābiq diyā gayā.

³²mūsā ne in maurūsī zamīnoṅ kī taqsīm us waqt kī thī jab wuh daryā-e-yardan ke mashriq meṅ moāb ke maidānī ilāqe meṅ yarīhū shahr ke muqābil thā.

³³lekin lāwī ko mūsā se koī maurūsī zamīn nahīṅ milī thī, kyūṅki rab isrāīl kā ḳhudā un kā maurūsī hissā hai jis tarah us ne un se wādā kiyā thā.