Read Roman Urdu Geo yashūa 14 Bible Online

yashūa 14 - Roman Urdu Geo bible

yashūa 14

¹isrāīl ke bāqī sāṛhe nau qabīloṅ ko daryā-e-yardan ke maġhrib meṅ yānī mulk-e-kan'ān meṅ zamīn mil gaī. is ke lie ilīazar imām, yashūa bin nūn aur qabīloṅ ke ābāī gharānoṅ ke sarbarāhoṅ ne

²qur'ā ḍāl kar muqarrar kiyā ki har qabīle ko kaun kaun sā ilāqā mil jāe. yūṅ waisā hī huā jis tarah rab ne mūsā ko hukm diyā thā.

³mūsā aṛhāī qabīloṅ ko un kī maurūsī zamīn daryā-e-yardan ke mashriq meṅ de chukā thā, kyūṅki yūsuf kī aulād ke do qabīle manassī aur ifrāīm wujūd meṅ āe the. lekin lāwiyoṅ ko un ke darmiyān zamīn na milī. isrāīliyoṅ ne lāwiyoṅ ko zamīn na dī balki unheṅ sirf rihāish ke lie shahr aur rewaṛoṅ ke lie charāgāheṅ dīṅ.

⁵yūṅ unhoṅ ne zamīn ko un hī hidāyāt ke mutābiq taqsīm kiyā jo rab ne mūsā ko dī thīṅ.

⁶jiljāl meṅ yahūdāh ke qabīle ke mard yashūa ke pās āe. yafunnā qanizzī kā beṭā kālib bhī un ke sāth thā. us ne yashūa se kahā, “āp ko yād hai ki rab ne mard-e-ḳhudā mūsā se āp ke aur mere bāre meṅ kyā kuchh kahā jab ham qādis-barnīa meṅ the.

⁷maiṅ 40 sāl kā thā jab rab ke ḳhādim mūsā ne mujhe mulk-e-kan'ān kā jāizā lene ke lie qādis-barnīa se bhej diyā. jab wāpas āyā to maiṅ ne mūsā ko diyānatdārī se sab kuchh batāyā jo dekhā thā.

⁸afsos ki jo bhāī mere sāth gae the unhoṅ ne logoṅ ko ḍarāyā. lekin maiṅ rab apne ḳhudā kā wafādār rahā.

⁹us din mūsā ne qasam khā kar mujh se wādā kiyā, ‘jis zamīn par tere pāoṅ chale haiṅ wuh hameshā tak terī aur terī aulād kī wirāsat meṅ rahegī. kyūṅki tū rab mere ḳhudā kā wafādār rahā hai.’

¹⁰aur ab aisā hī huā hai jis tarah rab ne wādā kiyā thā. us ne mujhe ab tak zindā rahne diyā hai. rab ko mūsā se yih bāt kie 45 sāl guzar gae haiṅ. us sāre arse meṅ ham registān meṅ ghūmte phirte rahe haiṅ. āj maiṅ 85 sāl kā hūṅ,

¹¹aur ab tak utnā hī tāqatwar hūṅ jitnā ki us waqt thā jab maiṅ jāsūs thā. ab tak merī bāhar nikalne aur jang karne kī wuhī quwwat qāim hai.

¹²ab mujhe wuh pahāṛī ilāqā de deṅ jis kā wādā rab ne us din mujh se kiyā thā. āp ne ḳhud sunā hai ki anāqī wahāṅ baṛe qilāband shahroṅ meṅ baste haiṅ. lekin shāyad rab mere sāth ho aur maiṅ unheṅ nikāl dūṅ jis tarah us ne farmāyā hai.”

¹³tab yashūa ne kālib bin yafunnā ko barkat de kar use wirāsat meṅ habrūn de diyā.

¹⁴pahle habrūn qiryat-arbā yānī arbā kā shahr kahlātā thā. arbā anāqiyoṅ kā sab se baṛā ādmī thā. āj tak yih shahr kālib kī aulād kī milkiyat rahī hai. wajah yih hai ki kālib rab isrāīl ke ḳhudā kā wafādār rahā. phir jang ḳhatm huī, aur mulk meṅ amn-o-amān qāim ho gayā.