Read Roman Urdu Geo yashūa 15 Bible Online

yashūa 15 - Roman Urdu Geo bible

yashūa 15

¹jab isrāīliyoṅ ne qur'ā ḍāl kar mulk ko taqsīm kiyā to yahūdāh ke qabīle ko us ke kunboṅ ke mutābiq kan'ān kā junūbī hissā mil gayā. is ilāqe kī sarhad mulk-e-adom aur intihāī junūb meṅ sīn kā registān thā.

²yahūdāh kī junūbī sarhad bahīrā-e-murdār ke junūbī sire se shurū ho kar

³junūb kī taraf chaltī chaltī darrā-e-aqrabbīm pahuṅch gaī. wahāṅ se wuh sīn kī taraf jārī huī aur qādis-barnīa ke junūb meṅ se āge nikal kar hasron tak pahuṅch gaī. hasron se wuh addār kī taraf chaṛh gaī aur phir qarqā kī taraf muṛī.

⁴is ke bād wuh azmūn se ho kar misr kī sarhad par wāqe wādī-e-misr tak pahuṅch gaī jis ke sāth sāth chaltī huī wuh samundar par ḳhatm huī. yih yahūdāh kī junūbī sarhad thī.

⁵mashriq meṅ us kī sarhad bahīrā-e-murdār ke sāth sāth chal kar wahāṅ ḳhatm huī jahāṅ daryā-e-yardan bahīrā-e-murdār meṅ bahtā hai. yahūdāh kī shimālī sarhad yihīṅ se shurū ho kar

⁶bait-hujlāh kī taraf chaṛh gaī, phir bait-arābā ke shimāl meṅ se guzar kar rūbin ke beṭe bohan ke patthar tak pahuṅch gaī.

⁷wahāṅ se sarhad wādī-e-akūr meṅ utar gaī aur phir dubārā dabīr kī taraf chaṛh gaī. dabīr se wuh shimāl yānī jiljāl kī taraf jo darrā-e-adummīm ke muqābil hai muṛ gaī (yih darrā wādī ke junūb meṅ hai). yūṅ wuh chaltī chaltī shimālī sarhad ain-shams aur ain-rājil tak pahuṅch gaī.

⁸wahāṅ se wuh wādī-e-bin-hinnūm meṅ se guzartī huī yabūsiyoṅ ke shahr yarūshalam ke junūb meṅ se āge nikal gaī aur phir us pahāṛ par chaṛh gaī jo wādī-e-bin-hinnūm ke maġhrib aur maidān-e-rafāīm ke shimālī kināre par hai.

⁹wahāṅ sarhad muṛ kar chashmā banām niftūh kī taraf baṛh gaī aur phir pahāṛī ilāqe ifron ke shahroṅ ke pās se guzar kar bālā yānī qiryat-yārīm tak pahuṅch gaī.

¹⁰bālā se muṛ kar yahūdāh kī yih sarhad maġhrib meṅ saīr ke pahāṛī ilāqe kī taraf baṛh gaī aur yārīm pahāṛ yānī kaslūn ke shimālī dāman ke sāth sāth chal kar bait-shams kī taraf utar kar timnat pahuṅch gaī.

¹¹wahāṅ se wuh aqrūn ke shimāl meṅ se guzar gaī aur phir muṛ kar sikkarūn aur bālā pahāṛ kī taraf baṛh kar yabniel pahuṅch gaī. wahāṅ yih shimālī sarhad samundar par ḳhatm huī.

¹²samundar mulk-e-yahūdāh kī maġhribī sarhad thī. yihī wuh ilāqā thā jo yahūdāh ke qabīle ko us ke ḳhāndānoṅ ke mutābiq mil gayā.

¹³rab ke hukm ke mutābiq yashūa ne kālib bin yafunnā ko us kā hissā yahūdāh meṅ de diyā. wahāṅ use habrūn shahr mil gayā. us waqt us kā nām qiryat-arbā thā (arbā anāq kā bāp thā).

¹⁴habrūn meṅ tīn anāqī banām sīsī, aḳhīmān aur talmī apne gharānoṅ samet rahte the. kālib ne tīnoṅ ko habrūn se nikāl diyā.

¹⁵phir wuh āge dabīr ke bāshindoṅ se laṛne chalā gayā. dabīr kā purānā nām qiryat-sifar thā.

¹⁶kālib ne kahā, “jo qiryat-sifar par fath pā kar qabzā karegā us ke sāth maiṅ apnī beṭī aksā kā rishtā bāndhūṅgā.”

¹⁷kālib ke bhāī ġhutnī'el bin qanaz ne shahr par qabzā kar liyā. chunāṅche kālib ne us ke sāth apnī beṭī aksā kī shādī kar dī.

¹⁸jab aksā ġhutnī'el ke hāṅ jā rahī thī to us ne use ubhārā ki wuh kālib se koī khet pāne kī darḳhwāst kare. achānak wuh gadhe se utar gaī. kālib ne pūchhā, “kyā bāt hai?”

¹⁹aksā ne jawāb diyā, “jahez ke lie mujhe ek chīz se nawāzeṅ. āp ne mujhe dasht-e-najab meṅ zamīn de dī hai. ab mujhe chashme bhī de dījie.” chunāṅche kālib ne use apnī milkiyat meṅ se ūpar aur nīche wāle chashme bhī de die.

²⁰jo maurūsī zamīn yahūdāh ke qabīle ko us ke kunboṅ ke mutābiq milī

²¹us meṅ zail ke shahr shāmil the. junūb meṅ mulk-e-adom kī sarhad kī taraf yih shahr the: qabziel, idar, yajūr,

²²qīnā, dīmūnā, ad'adā,

²³qādis, hasūr, itnān,

²⁴zīf, talam, bālot,

²⁵hasūr-hadattā, qariyot-hasron yānī hasūr,

²⁶amām, samā, molādā,

²⁷hasār-jaddā, hishmon, bait-falat,

²⁸hasār-sūāl, bair-sabā, bizyotiyāh,

²⁹bālā, iyyīm, azam,

³⁰iltolad, kasīl, hurmā,

³¹siqlāj, madmannā, sansannā,

³²labāot, silhīm, ain aur rimmon. in shahroṅ kī tādād 29 thī. har shahr ke gird-o-nawāh kī ābādiyāṅ us ke sāth ginī jātī thīṅ.

³³maġhrib ke nashebī pahāṛī ilāqe meṅ yih shahr the: istāl, sur'ā, asnā,

³⁴zanūh, ain-jannīm, taffūah, ainām,

³⁵yarmūt, adullām, sokā, azīqā,

³⁶shāraim, aditaim aur jadīrā yānī jadīrāim. in shahroṅ kī tādād 14 thī. har shahr ke gird-o-nawāh kī ābādiyāṅ us ke sāth ginī jātī thīṅ.

³⁷in ke ilāwā yih shahr bhī the: zanān, hadāshā, mijdal-jad,

³⁸dil'ān, misfāh, yuqtiel,

³⁹lakīs, busqat, ijlūn,

⁴⁰kabbūn, lahmās, kitlīs,

⁴¹jadīrot, bait-dajūn, nāmā aur maqqedā. in shahroṅ kī tādād 16 thī. har shahr ke gird-o-nawāh kī ābādiyāṅ us ke sāth ginī jātī thīṅ.

⁴²is ilāqe meṅ yih shahr bhī the: libnā, itar, asan,

⁴³yiftāh, asnā, nasībab,

⁴⁴qaīlā, akzīb aur maresā. in shahroṅ kī tādād 9 thī. har shahr ke gird-o-nawāh kī ābādiyāṅ us ke sāth ginī jātī thīṅ.

⁴⁵in ke ilāwā yih shahr bhī the: aqrūn us ke gird-o-nawāh kī ābādiyoṅ aur dehātoṅ samet,

⁴⁶phir aqrūn se le kar maġhrib kī taraf ashdūd tak tamām qasbe aur ābādiyāṅ.

⁴⁷ashdūd ḳhud bhī us ke gird-o-nawāh kī ābādiyoṅ aur dehātoṅ samet is meṅ shāmil thā aur isī tarah ġhazzā us ke gird-o-nawāh kī ābādiyoṅ aur dehātoṅ samet yānī tamām ābādiyāṅ misr kī sarhad par wāqe wādī-e-misr aur samundar ke sāhil tak.

⁴⁸pahāṛī ilāqe ke yih shahr yahūdāh ke qabīle ke the: samīr, yattīr, sokā,

⁴⁹dannā, qiryat-sannā yānī dabīr,

⁵⁰anāb, istamoh, anīm,

⁵¹jushan, haulūn aur jiloh. in shahroṅ kī tādād 11 thī, aur un ke gird-o-nawāh kī ābādiyāṅ bhī un ke sāth ginī jātī thīṅ.

⁵²in ke ilāwā yih shahr bhī the: arāb, dūmā, ish'ān,

⁵³yanūm, bait-taffūah, afīqā,

⁵⁴humtā, qiryat-arbā yānī habrūn aur sīūr. in shahroṅ kī tādād 9 thī. har shahr ke gird-o-nawāh kī ābādiyāṅ us meṅ ginī jātī thīṅ.

⁵⁵in ke ilāwā yih shahr bhī the: maūn, karmil, zīf, yūttā,

⁵⁶yazrael, yuqdiām, zanūh,

⁵⁷qain, jibiā aur timnat. in shahroṅ kī tādād 10 thī. har shahr ke gird-o-nawāh kī ābādiyāṅ us ke sāth ginī jātī thīṅ.

⁵⁸in ke ilāwā yih shahr bhī the: halhūl, bait-sūr, jadūr,

⁵⁹mārāt, bait-anot aur iltaqon. in shahroṅ kī tādād 6 thī. har shahr ke gird-o-nawāh kī ābādiyāṅ us ke sāth ginī jātī thīṅ.

⁶⁰phir qiryat-bāl yānī qiryat-yārīm aur rabbā bhī yahūdāh ke pahāṛī ilāqe meṅ shāmil the. har shahr ke gird-o-nawāh kī ābādiyāṅ us ke sāth ginī jātī thīṅ.

⁶¹registān meṅ yih shahr yahūdāh ke qabīle ke the: bait-arābā, middīn, sakākā,

⁶²nibsān, namak kā shahr aur ain-jadī. in shahroṅ kī tādād 6 thī. har shahr ke gird-o-nawāh kī ābādiyāṅ us ke sāth ginī jātī thīṅ.

⁶³lekin yahūdāh kā qabīlā yabūsiyoṅ ko yarūshalam se nikālne meṅ nākām rahā. is lie un kī aulād āj tak yahūdāh ke qabīle ke darmiyān rahtī hai.