Read Roman Urdu Geo yashūa 17 Bible Online

yashūa 17 - Roman Urdu Geo bible

yashūa 17

¹yūsuf ke pahlauṭhe manassī kī aulād ko do ilāqe mil gae. daryā-e-yardan ke mashriq meṅ makīr ke gharāne ko jiliād aur basan die gae. makīr manassī kā pahlauṭhā aur jiliād kā bāp thā, aur us kī aulād māhir faujī thī.

²ab qur'ā ḍālne se daryā-e-yardan ke maġhrib meṅ wuh ilāqā muqarrar kiyā gayā jahāṅ manassī ke bāqī beṭoṅ kī aulād ko ābād honā thā. in ke chhih kunbe the jin ke nām abīazar, ḳhalaq, asrī'el, sikam, hifar aur samīdā the.

³silāfihād bin hifar bin jiliād bin makīr bin manassī ke beṭe nahīṅ the balki sirf beṭiyāṅ. un ke nām mahlāh, nūsāh, hujlāh, milkāh aur tirzā the.

⁴yih ḳhawātīn ilīazar imām, yashūa bin nūn aur qaum ke buzurgoṅ ke pās āīṅ aur kahne lagīṅ, “rab ne mūsā ko hukm diyā thā ki wuh hameṅ bhī qabāilī ilāqe kā koī hissā de.” yashūa ne rab kā hukm mān kar na sirf manassī kī narīnā aulād ko zamīn dī balki unheṅ bhī.

⁵natīje meṅ manassī ke qabīle ko daryā-e-yardan ke maġhrib meṅ zamīn ke das hisse mil gae aur mashriq meṅ jiliād aur basan.

⁶maġhrib meṅ na sirf manassī kī narīnā aulād ke ḳhāndānoṅ ko zamīn milī balki beṭiyoṅ ke ḳhāndānoṅ ko bhī. is ke baraks mashriq meṅ jiliād kī zamīn sirf narīnā aulād meṅ taqsīm kī gaī.

⁷manassī ke qabīle ke ilāqe kī sarhad āshar se shurū huī aur sikam ke mashriq meṅ wāqe mikmatāh se ho kar junūb kī taraf chaltī huī ain-taffūah kī ābādī tak pahuṅchī.

⁸taffūah ke gird-o-nawāh kī zamīn ifrāīm kī milkiyat thī, lekin manassī kī sarhad par ke yih shahr manassī kī apnī milkiyat the.

⁹wahāṅ se sarhad qānā nadī ke junūbī kināre tak utrī. phir nadī ke sāth chaltī chaltī wuh samundar par ḳhatm huī. nadī ke junūbī kināre par kuchh shahr ifrāīm kī milkiyat the agarche wuh manassī ke ilāqe meṅ the.

¹⁰lekin majmūī taur par manassī kā qabāilī ilāqā qānā nadī ke shimāl meṅ thā aur ifrāīm kā ilāqā us ke junūb meṅ. donoṅ qabīloṅ kā ilāqā maġhrib meṅ samundar par ḳhatm huā. manassī ke ilāqe ke shimāl meṅ āshar kā qabāilī ilāqā thā aur mashriq meṅ ishkār kā.

¹¹āshar aur ishkār ke ilāqoṅ ke darj-e-zail shahr manassī kī milkiyat the: bait-shān, iblīām, dor yānī nāfat-dor, ain-dor, tānak aur majiddo un ke gird-o-nawāh kī ābādiyoṅ samet.

¹²lekin manassī kā qabīlā wahāṅ ke kan'āniyoṅ ko nikāl na sakā balki wuh wahāṅ baste rahe.

¹³bād meṅ bhī jab isrāīl kī tāqat baṛh gaī to kan'āniyoṅ ko nikālā na gayā balki unheṅ begār meṅ kām karnā paṛā.

¹⁴yūsuf ke qabīle ifrāīm aur manassī daryā-e-yardan ke maġhrib meṅ zamīn pāne ke bād yashūa ke pās āe aur kahne lage, “āp ne hamāre lie qur'ā ḍāl kar zamīn kā sirf ek hissā kyūṅ muqarrar kiyā? ham to bahut zyādā log haiṅ, kyūṅki rab ne hameṅ barkat de kar baṛī qaum banāyā hai.”

¹⁵yashūa ne jawāb diyā, “agar āp itne zyādā haiṅ aur āp ke lie ifrāīm kā pahāṛī ilāqā kāfī nahīṅ hai to phir farizziyoṅ aur rafāiyoṅ ke pahāṛī jangloṅ meṅ jāeṅ aur unheṅ kāṭ kar kāsht ke qābil banā leṅ.”

¹⁶yūsuf ke qabīloṅ ne kahā, “pahāṛī ilāqā hamāre lie kāfī nahīṅ hai, aur maidānī ilāqe meṅ ābād kan'āniyoṅ ke pās lohe ke rath haiṅ, un ke pās bhī jo wādī-e-yazrael meṅ haiṅ aur un ke pās bhī jo bait-shān aur us ke gird-o-nawāh kī ābādiyoṅ meṅ rahte haiṅ.”

¹⁷lekin yashūa ne jawāb meṅ kahā, “āp itnī baṛī aur tāqatwar qaum haiṅ ki āp kā ilāqā ek hī hisse par mahdūd nahīṅ rahegā

¹⁸balki jangal kā pahāṛī ilāqā bhī āp kī milkiyat meṅ āegā. us ke jangloṅ ko kāṭ kar kāsht ke qābil banā leṅ to yih tamām ilāqā āp hī kā hogā. āp bāqī ilāqe par bhī qabzā karke kan'āniyoṅ ko nikāl deṅge agarche wuh tāqatwar haiṅ aur un ke pās lohe ke rath haiṅ.”